7. Bann loi ke lé méyeur

Bann gouvèrnman i mèt bann loi an plas pou le bien bann domoun. Le roiyom Bondieu i mèt osi bann loi an plas pou son bann sitoiyin. Lir 1 Korintien 6:9-11 é koz su bann késtion la :

• Dapré ou, koman le monn i sra kan tout bann zumin va suiv bann loi Bondieua ?

• Èske ou trouv rézonab ke Jéova i demann bann sitoiyin le Roiyom réspèk son bann loi ? Poukosa ?

• Kosa i mont ke sak i suiv pa bann loi Bondieu i gingn chanjé ? (gard le vèrsé 11).

Na in bonpe d’moun lé jéné kan i koz su la séksualité. La Bib i pas pa par 4 chemin é i koz de sa èk réspé. Sak li di su la séksualité lé pou nout bien. Jéova lé nout Kréateur é li koné sak lé méyeur pou nou. Avoir le mèm pansé ke li su la séksualité i pèrmèt onor ali é avoir léspoir viv pou toultan.

1. Koman Jéova i konsidèr la séksualité ?

La séksualité lé in kado ke Jéova i fé pou bann moun maryé. Kado la i pèrmèt in mesieu é in madam fé zanfan, é osi fémont zot lamour é zot laféksion pou inn é lot. Dayeur, la Bib i di : « Trouv kontantman èk le madam de out jenès » (Provèrb 5:18, 19). Jéova i ve ke in mari é in madam lé fidèl anvèr inn é lot é ke zot i tronp pa zot konjoin èk in not moun (lir Ébreu 13:4).

2. Kèl konduit séksuèl Bondieu i détès ?

La Bib i di ke « sak i fé bann péché séksuèl [...] va pa érit le roiyom Bondieu » (1 Korintien 6:9, 10). Kan i di « bann péché séksuèl » lé in traduksion le mo grèk pornéïa. Mo la i ve dir 1) bann relasion séksuèla ant 2 moun ke lé pa maryé, 2) lomoséksualité é 3) bann relasion séksuèl ant in moun é in zanimo. Sak i ‘retien ali pou fé bann péché séksuèl’ i gingn bann bienfé é la bénédiksion Jéova (1 Tésalonisien 4:3).

ALON APRANN PLUS

3. Rejèt tout bann péché séksuèl

Jozèf, in jeun jan ke i ièm Bondieu, la sobat pou rès moralman pur. Lir Jenèz 39:1-12 é koz su bann késtion la :

• Poukosa Jozèf la kouri ? (gard le vèrsé 9).

• Èske ou pans ke Jozèf la pran le bon désizion ? Poukosa ?

VIDÉO : Rejèt tout kalité péché séksuèl (5:06)

Jéova i demann tout son bann zadorateur rès pur. Lir 1 Korintien 6:18 é koz su bann késtion la :

• Kèl situasion i pe amèn in moun fé in péché séksuèl ?

• Koman ou pe rejèt tout bann péché séksuèl ?

4. Lé posib rézis la tantasion

VIDÉO : Rejèt la tantasion gras la léktur la Bib (3:02)

• Kosa le frèr la fé kan li la rann ali kont ke son konportman té sa amèn ali èt infidèl ?

Nadfoi mèm in moun ki ièm Jéova, i doi sobat pou anlèv dan son léspri bann pansé ke lé sal. Kosa i fo fé pou pa lès in pansé ke lé sal rès dan nout tèt ? Lir Filipien 4:8 é koz su bann késtion la :

• Kèl kalité zafèr i devré okup nout léspri ?

• Poukosa lir la Bib é èt bien okupé dann sèrvis pou Jéova i èd anou rézis bann tantasion ?

5. Jéova la mèt an plas bann rekomandasion pou nout bien

VIDÉO : Alon pa pèrd nout bon sans (9:31)

• Poukosa le jeun garson la retrouv ali dan in situasion danjereu ? (gard Provèrb 7:8, 9).

• Dapré Provèrb 7:23, 26, in péché séksuèl i pe avoir bann grav konsékans. Si nou rès pur moralman, kèl problèm nou va évité ?

• Kèl lien néna ant la purté moral é léspoir viv pou toultan ?

Na in pe i pans ke lé in mank lamour, sak la Bib i di su lomoséksualité. Mé Jéova lé in Bondieu lamour. Li ve ke tout bann zumin i viv pou toultan. Mé pousa, zot i doi suiv son bann rekomandasion. Lir 1 Korintien 6:9-11 é koz su késtion la :

• Èske lomoséksualité lé le seul konportman ke Bondieu i détès ?

Nout tout nou doi fé bann chanjman pou gingn la bénédiksion Bondieu. Èske sa i vo le kou ? Lir Psom 19:8, 11 é koz su bann késtion la :

• Dapré ou, èske bann zansègnman biblik ke Jéova i donn su le bien é le mal lé rézonab ? Poukosa ou di sa ?

SAK NOU LA APRANN

La séksualité lé in kado ke Jéova i fé, pou in mesieu é in madam ke lé maryé.

Alon révizé

• Dapré la Bib, kosa i lé in péché séksuèl ?

• Kosa i pe èd anou rejèt tout bann péché séksuèl ?

• Kèl bienfé néna kan i suiv bann zansègnman biblik su le bien é le mal, ke Jéova i donn ?

GARD SA OSI

Poukosa Bondieu i ve ke in mesieu é in madam ki viv ansanm lé maryé ?

« Vivre en couple sans être mariés : Qu’en dit la Bible ? » (lartik jw.org)

Poukosa sak la Bib i di su lomoséksualité i ve pa dir détès bann zomoséksuèl ?

« L’homosexualité : est-ce mal ? » (lartik jw.org)

Poukosa bann loi Bondieu su la séksualité lé in protéksion ?

« Les relations buccogénitales sont-elles vraiment des relations sexuelles ? » (lartik jw.org)

Sak la amèn in lomoséksuèl chanj son fason d’viv (son zistoir « Ils ont respecté ma dignité »).

« La Bible transforme des vies » (La Tour de Garde, 1^er avril 2011)

Pa tout domoun i voi lalkol le mèm fason. Na in pe i ièm boir in vèr tanzantan èk kamarad. Dot i choizi pa boir dutou. Dot ankor i boi juskatank zot lé sou. Kosa la Bib i di su lalkol ?

1. Èske lé mal boi lalkol ?

La Bib i défann pa boir. O kontrèr, li di ke anparmi tout bann kado ke Bondieu la fé bann zumin, néna « le vin ki kontant le keur d’lom » (Psom 104:14, 15). Li di mèm ke désèrtin zadorateur Jéova té boi in pe (1 Timoté 5:23).

2. Kèl konsèy la Bib i donn pou sak i désid boir ?

Jéova i ièm pa kan i boi tro é kan i boi sou (Galat 5:21). Son Parol i di : « Trouv pa ou anparmi sak i boi tro de vin » (Provèrb 23:20). Donk, si nou désid boir—mèm kan domoun i voi pa nou —, nou va pa boir juskatank nou konpran pu rien, nou gingn pu kontrol nout bann parol é sak nou fé, oubien i poz problèm nout santé. É si nou ariv pa kontrol anou kan nou boi, vo mieu arèt boir.

3. Koman nou devré konsidèr bann désizion lé zot su lalkol ?

Chakèn i désid boir ou pa. Donk si in moun i désid boir in pe, nou doi réspèk son désizion. Si in moun i désid pa boir, nou doi pa oblij ali (Romin 14:10). É si in moun i voi anou boir é i poz ali in problèm, nou va désid pa boir (lir Romin 14:21). Nou rod « non pa [nout] prop lavantaj, mé sad lot » (lir 1 Korintien 10:23, 24).

ALON APRANN PLUS

4. Désid si ou va boir ou pa

Koman Jézu té konsidèr lalkol ? Pou konèt, alon koz su le premié mirak ke li la fé. Lir Jan 2:1-11 é koz su bann késtion la :

• Kosa mirak la i aprann anou su le fason Jézu i konsidèr lalkol é sak i boi ?

• Kom Jézu i intèrdi pa boir, koman in krétien i konsidèr in moun ki désid boir ?

Donk la Bib i anpèch pa in krétien boi lalkol. Mé dann detroi situasion i sra plu rézonab pa boir. Lir Provèrb 22:3 é koz su le fason mèt an pratik prinsip la, dan bann situasion an d’sou la :

• Ou sar kondui oubien utiliz in machinn.

• Ou lé ansint.

• In médsin i di aou pa boir.

• Ou gingn pa kontrol la kantité ke ou boi.

• La loi i anpèch aou boi lalkol.

• Ou lé èk in moun ke la désid pa boir, parske li lavé problèm lalkol avan.

Èske ou devré sèrv lalkol pou in fèt, par égzanp pou in maryaj ? Avan réponn késtion la, gard le VIDÉO.

VIDÉO : Èske mi devré sèrv lalkol ? (2:41)

Lir Romin 13:13 é 1 Korintien 10:31, 32. Aprésa, koz su késtion la :

• Koman prinsip la, i pe èd aou pran in désizion ke va fé plézir Jéova ?

5. Mèt aou in limit

Si ou désid boir, rapèl aou ke, mèm si Jéova i anpèch pa boir, li kondann kan i boi tro. Poukosa ? Lir Ozé 4:11, 18 é koz su késtion la :

• Kosa i pe ariv in moun ki boi tro ?

Koman évit boi tro ? I fo èt modès é rekonèt son bann limit. Lir Provèrb 11:2 é koz su késtion la :

• Poukosa lé bien mèt in limit su la kantité lalkol ke nou pèrmèt anou boi ?

6. Koman sobat kont lanvi boir toultan lalkol

VIDÉO : « Moin té fatigé èk mon fason d’viv » (6:32)

• Kèl léfé lalkol lavé su Dmitry ?

• Èske li la gingn arèt boi d’in kou ?

• Kosa la èd ali arèt abuz lalkol in foi pou tout ?

Lir 1 Korintien 6:10, 11 é koz su bann késtion la :

• Kèl konsékans grav abuz lalkol i pe avoir ?

• Kosa i mont ke in moun ki abuz lalkol i pe chanjé ?

Lir Matieu 5:30 é koz su késtion la :

• « Koup la min » i lès antann ki fo fé bann sakrifis pou fé plézir Jéova. Kosa ou pe fé si ou sobat kont in problèm lalkola ?

Lir 1 Korintien 15:33 é koz su késtion la :

• Kèl linfluans out bann kamarad i pe avoir su la kantité ou boi lalkol ?

SAK NOU LA APRANN

Jéova la prévu ke lalkol i aport anou la joi, mé li kondann kan i boi tro é kan i gingn pu san pasé.

Alon révizé

• Kosa la Bib i di su lalkol ?

• Kèl danjé néna boir tro ?

• Koman nou doi konsidèr bann désizion lé zot su lalkol ?

GARD SA OSI

Koman in jeun i pe fé bann bon choi par rapor lalkol ?

Boir ou pa : kinport sak i ariv, majinn bann déga ! (2:31)

Bann zidé pratik ki pe èd in moun sobat kont son bann problèm lalkol.

« Quelle place l’alcool a-t-il dans votre vie ? » (La Tour de Garde, 1^er janvier 2010)

Èske in krétien i pe trinké ?

« Questions des lecteurs » (La Tour de Garde, 15 février 2007)

Sak la èd in lalkolik sobat kont son lanvi boir toultan (son zistoir « J’étais une barrique sans fond »).

« La Bible transforme des vies » (La Tour de Garde, 1^er mai 2012)

Mèm si ou ièm Jéova vréman for é ke ou fé zéfor pou pa chagrinn son keur, nadfoi ou va fé bann zéreur. Mé detroi péché lé plu grav ke dot (1 Korintien 6:9, 10). Si ou komèt in péché grav, pans pa ke Jéova i ièm pu ou. Rapèl aou ke li lé paré pou pardonn aou é èd aou.

1. Kosa i fo fé pou èt pardoné par Jéova ?

Sak i ièm Jéova néna in gran tristès, kan zot i konpran ke zot la komèt in péché grav. Mé zot lé rékonforté par se promès Jéova la : « Mèm si zot péché lété bien rouj fonsé, zot va ni blan parèy la nèj » (Izai 1:18). Si zot i repan azot vréman, Jéova va pardonn azot totalman. Koman repanti anou ? Nou arèt fé sak lé mové, é nou va supli Jéova pardonn anou parske nou regrèt vréman sak nou la fé. Aprésa, nou fé tout pou chanj nout bann pansé é nout bann mové labitud ke la amèn anou péché. É nou fé zéfor pou viv dapré bann rekomandasion Jéova ke lé pur (lir Izai 55:6, 7).

2. Koman Jéova i utiliz bann zansien pou èd in pécheur ?

Si nou fé in péché grav, Jéova i di : « Ke li apèl koté li bann zansien lasanblé » (lir Jak 5:14, 15). Bann zansien i ièm Jéova é son bann brebi. Zot néna bann kalité ki fo, pou èd bann pécheur retrouv son bann bon relasion ansanm Jéova (Galat 6:1).

Koman bann zansien i èd in krétien ke la komèt in péché grav ? Gras la Bib, 2 oubien 3 zansien i ésplik poukosa sak li la fé lé mové. Zot i donn osi bann konsèy pratik pou pa rekomansé. Si in krétien la komèt in péché grav, é i repan pa li, bann zansien va ranvoiy ali pou protèj lasanblé de son mové konduit.

ALON APRANN PLUS

3. Konfès anou i pèrmèt la gérizon

Kan nou pèch, nou blès Jéova. Donk, lé normal ke nou konfès anou. Lir Psom 32:1-5 é koz su késtion la :

• Poukosa lé mieu konfès nout bann péché avèk Jéova pluto ésèy kachièt ali ?

VIDÉO : « Jéova i fouèt sak li ièm » (3:01)

• Koman bann zansien la èd Canon revni vèr Jéova ?

Nou doi èt onèt avèk bann zansien ; zot lé la pou èd anou. Lir Jak 5:16 é koz su késtion la :

• Poukosa lé plu fasil pou bann zansien èd anou si nou lé onèt èk banna ?

4. Jéova i fé mont la pitié èk sak i fé in péché

In moun ke la komèt in péché grav é ki refuz suiv bann rekomandasion Jéova, lé ranvoiyé lasanblé, é nou frékant pa li. Lir 1 Korintien 5:6, 11 é koz su bann késtion la :

• Kosa i éspas kan nou mèt le levin dan in pat ? Kèl léfé in pécheur ki repan pa li, i pe avoir su lasanblé ?

5. Jéova i pardonn bann pécheur repantan

Gras in légzanp, Jézu la éspliké sak Jéova i resan kan in moun i repanti ali. Lir Luk 15:1-7 é koz su késtion la :

• Kosa légzanp la, i aprann anou su Jéova ?

Lir Ézékièl 33:11 é koz su késtion la :

• Kosa i mont ke in moun lé vréman repantan ?

SAK NOU LA APRANN

Si nou la komèt in péché grav mé ke nou regrèt vréman é ke nou lé bien désidé arèt fé sak lé mal, Jéova va pardonn anou.

Alon révizé

• Poukosa lé bien konfès nout bann péché avèk Jéova ?

• Kosa nou doi fé pou ke nout bann péché lé pardoné ?

• Si nou fé in péché grav, poukosa nou doi demann lèd bann zansien ?

GARD SA OSI

Le zistoir in mesieu ke la vu, ke Jéova lé vréman mizérikordieu kom i di dann Izai 1:18.

Dout jamé le pardon Jéova (5:02)

Koman bann zansien i fé pou èd in moun ke la fé in péché grav.

« Les anciens répondent au péché par l’amour et la miséricorde » (La Tour d’Gard, out 2024)

I fé mont la pitié é lamour pou sak la repanti azot, parske zot la péché

« Comment les anciens aident ceux qui sont renvoyés de l’assemblée » (La Tour d’Gard, out 2024)

Le zistoir in mesieu ke la éloign ali la vérité, mé ke Jéova la atir ali ankor in foi (son zistoir « Il fallait que je revienne vers Jéhovah »).

« La Bible transforme des vies » (La Tour de Garde, 1^er avril 2012)