• Koman la Bib i pe èd aou ?
    Viv ereu pou toultan ! (Diskusion biblik vivan)
    • Leson 1. In bib ke lé ouvèr.

      LESON 01

      Koman la Bib i pe èd aou ?

      Nout tout, nou poz anou bann késtion su la vi, la soufrans, la mor oubien lavnir. Nou néna osi traka dan nout vi tou lé jour : par égzanp, koman fé viv nout fami é rann ali ereu ? In kantité d’moun la remarké ke la Bib i réponn bann késtion inportan su la vi, é ke li èd azot osi dan zot vi tou lé jour. É ou mèm, èske ou pans ke la Bib i pe èd anou ?

      1. Kèl késtion la Bib i réponn ?

      La Bib i réponn se bann késtion inportan la : Koman la vi la komansé ? Poukosa nou lé su la tèr ? Poukosa na domoun inosan i souf ? Kosa i éspas apré la mor ? Si tout domoun i ve viv an pé, akoz néna tousa la gèr la ? Kosa i sar ariv la tèr dan lavnir ? Lé normal poz anou bann késtion la. É domoun par milion, la rekonèt ke bann répons ke la Bib i donn lé vré.

      2. Èske la Bib i pe èd aou dan out vi tou lé jour ?

      Dan la Bib néna bann bon konsèy. Par égzanp, li èd bann fami pou èt vréman ereu. Li donn bann konsèy pou jèr le strès é pou trouv la joi dan le travay. Dan bann paj ki vien apré, ou va dékouv sak la Bib i ansègn su bann sujé la é su dot zafèr ankor. Lé sur, ou va voir par ou mèm ke ‘tout Lékritur [sétadir tout sak néna dan la Bib] i pe èt util pou ou’ (2 Timoté 3:16).

      Liv la i ankouraj aou étudié la Bib, mé li ranplas pa la Bib. Sé pousa, nou invit aou lir bann vèrsé ke néna dan le bann leson é vérifié bann vèrsé la, par rapor sak ou aprann.

      ALON APRANN PLUS

      Alon voir koman la Bib la èd domoun, sak ou pe fé pou èm lir ali é poukosa lé plu fasil konprann la Bib, kan in moun i èd anou.

      3. La Bib i pe gid anou

      La Bib lé kom in lanp ki éklèr for. Li èd anou pran bann bon désizion, é gras ali, nou koné kosa lavnir i rézèrv anou.

      Lir Psom 119:105 é koz su bann késtion la :

      • Kosa sak la ékri psom la, té pans de la Bib ?

      • É aou mèm, kosa ou pans de la Bib ?

      Kan fénoir i ariv, in mesieu i march dann chemin galé su le bor la rivièr ; li éklèr devan li èk in lanp torch.

      4. La Bib i réponn bann késtion ke nou poz anou

      In madam té poz ali bann késtion depui lontan. Li la trouv le bann répons dan la Bib. Gard le VIDÉO é koz su bann késtion la :

      VIDÉO : I fo jamé pèrd léspoir ! (1:48)

      • Kèl késtion madam la té poz ali ?

      • Koman létud la Bib la èd ali ?

      La Bib i ankouraj anou poz bann késtion. Lir Matieu 7:7 é koz su késtion la :

      • Pou kèl késtion ou ièmré trouv le bann répons dan la Bib ?

      5. I pe èt gayar lir la Bib

      In bonpe d’moun i ièm lir la Bib. Zot i di ke sa i fé azot du bien. Gard le VIDÉO é koz su bann késtion la :

      VIDÉO : Lir la Bib (2:05)

      • Dann vidéo la, èske bann jeun i ièm lir ?

      • Mé poukosa zot i ièm lir la Bib ?

      Sak la Bib i ansègn i konsol anou é i donn anou in léspoir. Lir Romin 15:4 é koz su késtion la :

      • Èske ou ve konèt plus su sak la Bib i di su la konsolasion é léspoir ?

      6. Lé plu fasil konprann la Bib kan in moun i èd anou

      In bonpe d’moun i ièm lir la Bib, mé zot i trouv osi ke lé bien koz de sa èk dot moun. Lir Akt 8:26-31 é koz su késtion la :

      Montaj : 1. Filip, lévanjélizateur, i ésplik lé Zékritur in mesieu étiopien. 2. In madam Témoin Jéova i koz su la Bib avèk in momon é son 2 zanfan.

      Le mesieu étiopien lavé bezoin lèd pou konprann sak li té lir. Zordi osi, in bonpe d’moun i trouv inportan diskut su la Bib avèk dot moun.

      NADFOI DOMOUN I DI : « Étudié la Bib, i fé pèrd amoin le tan. »

      • É ou mèm, kosa ou pans ? Akoz ou di sa ?

      SAK NOU LA APRANN

      Dan la Bib néna bann bon konsèy pou la vi d’tou lé jour. La Bib i réponn bann késtion inportan su la vi, li konsol anou é li donn anou in léspoir.

      Alon révizé

      • Kèl konsèy i trouv dan la Bib ?

      • Di detroi késtion ke la Bib i réponn.

      • Kosa ou ièmré aprann gras la Bib ou ?

      Sak mi doi fé

      GARD SA OSI

      Bann konsèy la Bib lé toujour valab zordi.

      « Une sagesse à l’épreuve du temps » (La Tour de Garde no 1 2018)

      La Bib la èd in mesieu ke té malereu é té i souf depui li lé p’ti.

      Ma la fini par konèt le boneur (2:53)

      Bann konsèy la Bib util pou bann fami.

      « 12 clés du bonheur familial » (Réveillez-vous ! no 2 2018)

      Kisa i dirij vréman le monn ? La Bib i fé bien konèt la vérité su késtion la.

      Pou kosa étudié la Bib ? (vidéo plu long) (3:14)

  • La Bib lé le mésaj Bondieu pou bann zumin
    Viv ereu pou toultan ! (Diskusion biblik vivan)

    • 1. Si sé bann zom la ékri la Bib, poukosa i di sé la Parol Bondieu ?

      La Bib la été ékri par apepré 40 bonom, pandan anviron 1 600 zan, depui 1513 avan nout tan juska apepré 98 de nout tan. Bann zékrivin la, lavé poin le mèm vi. Anparmi zot, lavé bann gardien mouton, bann pécheur poison é bann roi. Pourtan, zot tout lété dakor. Mé koman sa lé posib ? Parske sé Bondieu la fé ékri la Bib (lir 1 Tésalonisien 2:13). Bann zékrivin la pa ékri sak zot té i pans, zot « la kozé de la par Bondieu » parske zot lété « pousé par léspri sina » (2 Pièr 1:21). Bondieu la ansèrv son léspri sin pou inspir bann zom, sétadir pou pous banna ékri son bann pansé (2 Timoté 3:16).