Na in bonpe d’moun lé jéné kan i koz su la séksualité. La Bib i pas pa par 4 chemin é i koz de sa èk réspé. Sak li di su la séksualité lé pou nout bien. Jéova lé nout Kréateur é li koné sak lé méyeur pou nou. Avoir le mèm pansé ke li su la séksualité i pèrmèt onor ali é avoir léspoir viv pou toultan.

1. Koman Jéova i konsidèr la séksualité ?

La séksualité lé in kado ke Jéova i fé pou bann moun maryé. Kado la i pèrmèt in mesieu é in madam fé zanfan, é osi fémont zot lamour é zot laféksion pou inn é lot. Dayeur, la Bib i di : « Trouv kontantman èk le madam de out jenès » (Provèrb 5:18, 19). Jéova i ve ke in mari é in madam lé fidèl anvèr inn é lot é ke zot i tronp pa zot konjoin èk in not moun (lir Ébreu 13:4).

2. Kèl konduit séksuèl Bondieu i détès ?

La Bib i di ke « sak i fé bann péché séksuèl [...] va pa érit le roiyom Bondieu » (1 Korintien 6:9, 10). Kan i di « bann péché séksuèl » lé in traduksion le mo grèk pornéïa. Mo la i ve dir 1) bann relasion séksuèla ant 2 moun ke lé pa maryé, 2) lomoséksualité é 3) bann relasion séksuèl ant in moun é in zanimo. Sak i ‘retien ali pou fé bann péché séksuèl’ i gingn bann bienfé é la bénédiksion Jéova (1 Tésalonisien 4:3).

ALON APRANN PLUS

3. Rejèt tout bann péché séksuèl

Jozèf, in jeun jan ke i ièm Bondieu, la sobat pou rès moralman pur. Lir Jenèz 39:1-12 é koz su bann késtion la :

• Poukosa Jozèf la kouri ? (gard le vèrsé 9).

• Èske ou pans ke Jozèf la pran le bon désizion ? Poukosa ?

VIDÉO : Rejèt tout kalité péché séksuèl (5:06)

Jéova i demann tout son bann zadorateur rès pur. Lir 1 Korintien 6:18 é koz su bann késtion la :

• Kèl situasion i pe amèn in moun fé in péché séksuèl ?

• Koman ou pe rejèt tout bann péché séksuèl ?

4. Lé posib rézis la tantasion

VIDÉO : Rejèt la tantasion gras la léktur la Bib (3:02)

• Kosa le frèr la fé kan li la rann ali kont ke son konportman té sa amèn ali èt infidèl ?

Nadfoi mèm in moun ki ièm Jéova, i doi sobat pou anlèv dan son léspri bann pansé ke lé sal. Kosa i fo fé pou pa lès in pansé ke lé sal rès dan nout tèt ? Lir Filipien 4:8 é koz su bann késtion la :

• Kèl kalité zafèr i devré okup nout léspri ?

• Poukosa lir la Bib é èt bien okupé dann sèrvis pou Jéova i èd anou rézis bann tantasion ?

5. Jéova la mèt an plas bann rekomandasion pou nout bien

VIDÉO : Alon pa pèrd nout bon sans (9:31)

• Poukosa le jeun garson la retrouv ali dan in situasion danjereu ? (gard Provèrb 7:8, 9).

• Dapré Provèrb 7:23, 26, in péché séksuèl i pe avoir bann grav konsékans. Si nou rès pur moralman, kèl problèm nou va évité ?

• Kèl lien néna ant la purté moral é léspoir viv pou toultan ?

Na in pe i pans ke lé in mank lamour, sak la Bib i di su lomoséksualité. Mé Jéova lé in Bondieu lamour. Li ve ke tout bann zumin i viv pou toultan. Mé pousa, zot i doi suiv son bann rekomandasion. Lir 1 Korintien 6:9-11 é koz su késtion la :

• Èske lomoséksualité lé le seul konportman ke Bondieu i détès ?

Nout tout nou doi fé bann chanjman pou gingn la bénédiksion Bondieu. Èske sa i vo le kou ? Lir Psom 19:8, 11 é koz su bann késtion la :

• Dapré ou, èske bann zansègnman biblik ke Jéova i donn su le bien é le mal lé rézonab ? Poukosa ou di sa ?

SAK NOU LA APRANN

La séksualité lé in kado ke Jéova i fé, pou in mesieu é in madam ke lé maryé.

Alon révizé

• Dapré la Bib, kosa i lé in péché séksuèl ?

• Kosa i pe èd anou rejèt tout bann péché séksuèl ?

• Kèl bienfé néna kan i suiv bann zansègnman biblik su le bien é le mal, ke Jéova i donn ?

GARD SA OSI

Poukosa Bondieu i ve ke in mesieu é in madam ki viv ansanm lé maryé ?

« Vivre en couple sans être mariés : Qu’en dit la Bible ? » (lartik jw.org)

Poukosa sak la Bib i di su lomoséksualité i ve pa dir détès bann zomoséksuèl ?

« L’homosexualité : est-ce mal ? » (lartik jw.org)

Poukosa bann loi Bondieu su la séksualité lé in protéksion ?

« Les relations buccogénitales sont-elles vraiment des relations sexuelles ? » (lartik jw.org)

Sak la amèn in lomoséksuèl chanj son fason d’viv (son zistoir « Ils ont respecté ma dignité »).

« La Bible transforme des vies » (La Tour de Garde, 1^er avril 2011)

Dan désèrtin kultur, bann domoun i pans ke pou èt ereu, i fo èt maryé. Mé, néna bann domoun maryé ke lé malereu é bann sélibatèr ke lé ereu. An vré, la Bib i di ke èt sélibatèr é èt maryé, lé 2 lé in kado Bondieu.

1. Kèl lavantaj néna kan ou lé sélibatèr ?

Nou lir dan la Bib : « Sak i maryé i fé bien, mé sak i maryé pa va fé mieu » (lir 1 Korintien 7:32, 33, 38). Poukosa la Bib i di ke in sélibatèr i fé « mieu » ? Kom li na poin in konjoin, li lé plu lib. In légzanp, lé plu fasil pou li alé prèch la bonn nouvèl dan in not landroi oubien in not péi. É surtou, li na plus le tan pou rann for son lamitié avèk Jéova.

2. Kèl lavantaj néna kan ou lé maryé ?

Kom pou bann sélibatèr, bann domoun maryé na in bonpe bienfé. La Bib i di ke « deu i vo mieu ke inn » (Éklézias 4:9). É sa lé vré kan bann konjoin i aplik bann prinsip la Bib. In mesieu èk in madam ki désid maryé i promèt èm azot é réspèk azot. Donk zot i san azot plus an sékurité ke bann koup i viv ansanm é ke lé pa maryé. É maryaj i donn lokazion zot zanfan grandi dan in landroi ke lé sur.

3. Koman Jéova i konsidèr le maryaj ?

Kan Jéova la béni le premié maryaj, li la di : « Lom va kit son papa é son momon, é li va rès avèk son madam » (Jenèz 2:24). Jéova i ve ke in mari é in madam i ièm azot é i rès ansanm tank zot lé an vi. Li pèrmèt le divors kan inn ant lé 2 konjoin la tronp lot. Dann situasion la, Jéova i lès le konjoin inosan désid si li va divorsé oubien nona (Matieu 19:9). Jéova i otoriz pa bann krétien avoir pluzieur madam oubien pluzieur mesieu (1 Timoté 3:2).

ALON APRANN PLUS

4. Profit ke ou lé sélibatèr

Pou Jézu, èt sélibatèr lété in kado Bondieu (Matieu 19:11, 12). Lir Matieu 4:23 é koz su késtion la :

• Koman Jézu la utiliz se kado la, pou sèrv son Papa é fé le bien otour d’li ?

Kom Jézu, in krétien i pe trouv la joi èt sélibatèr. Gard le VIDÉO é koz su le késtion ki vien apré.

VIDÉO : Bann sélibatèr ke lé fidèl (3:11)

• Dan kèl gayar zaktivité bann krétien sélibatèr i pe donn azot a fon ?

Ou té koné sa ou ?

La Bib i di pa kèl laj in moun i pe maryé. Parkont li konsèy anou atann ke « la fleur la jeunès », la finn pasé. Sé in pèryod dan la vi ousa bann dézir séksuèl i pe tronp nout jujman (1 Korintien 7:36).

5. Choizi bien out konjoin

Choizi in konjoin i fé parti bann désizion plu zinportan dan la vi. Lir Matieu 19:4-6, 9 é koz su késtion la :

• Poukosa in krétien i devré pran le tan réfléchi avan maryé ?

La Bib i di sak nou doi chèrché ché in konjoin. Le plu zinportan sé ke li ièm Jéovab. Lir 1 Korintien 7:39 é 2 Korintien 6:14 é koz su bann késtion la :

• Poukosa nou devré maryé rienk avèk in sèrviteur Jéova ?

• Si in krétien i désid maryé avèk in moun i sèrv pa Jéova, kosa Jéova va resanti ?

6. Voi le maryaj kom Jéova i voi

Dan in tan an Israèl, bann bonom té divors pou bann rézon égois. Lir Malaki 2:13, 14, 16 é koz su késtion la :

• Poukosa Jéova i détès kan i divors pou rien ?

Gard le VIDÉO é koz su le késtion ki vien apré.

VIDÉO : Le maryaj : in lien ki dur pou toultan (4:30)

• Si ou lé maryé èk in moun i ador pa Jéova, kosa ou pe fé pou réusi out maryaj ?

7. Réspèk sak Jéova i demann su le maryaj

VIDÉO : Zot la chanj zot vi dapré sak Jéova i demann su le maryaj (4:14)

Lir Ébreu 13:4 é koz su bann késtion la :

• Èske bann rekomandasion Jéova su le maryaj lé rézonab ? Akoz ou di sa ?

Dan la plupar bann péi, néna bann loi pou anrejis bann maryaj é bann divors. Jéova i demann bann krétien obéi bann loi la. Lir Tit 3:1 é koz su késtion la :

• Si ou lé maryé, èske ou la asur aou ke out maryaj lé bien anrejistré devan la loi ?

SAK NOU LA APRANN

Èt sélibatèr é èt maryé lé bann kado Jéova. Lé 2 i donn la joi si nou suiv bann prinsip Jéova.

Alon révizé

• Koman in sélibatèr i pe profit son situasion ?

• Poukosa la Bib i di i fo maryé rienk avèk in sèrviteur Jéova ?

• Kosa i lé le seul rézon biblik pou divorsé ?

GARD SA OSI

Sak i ve dir « maryé rienk èk in disip le Sénieur ».

« Questions des lecteurs » (La Tour de Garde, 1^er juillet 2004)

Bann bon konsèy su bann frékantasion é le maryaj dan in vidéo an 2 parti.

Bien prépar anou pou le maryaj (11:53)

Koman Jéova la béni in frèr ke la pran bann désizion èk kouraj ?

Mi té éspèr ke li noré aksèp la vérité (1:56)

Kosa i fo réfléchi avan pans divors oubien séparasion ?

« Honore “ce que Dieu a uni” » (La Tour de Garde, décembre 2018)