Prézèrv lunité dan lasanblé

Kan nou lé avèk nout bann frèr é seur, nou resan le mèm zafèr ke le roi David : « Kom lé bon é lé gayar pou bann frèr abit ansanm dan lunité ! » (Psom 133:1). Nout lunité i vien pa par azar. Nout tout néna in rol pou joué pou prézèrv se lunité la.

1. Kosa lé inkroiyab dan le peup Bondieu ?

Si ou asis in rénion dan in not péi, petèt ou va pa konprann la lang, mé ou va santi aou kom out kaz. Poukosa ? Parske partou su la tèr, nou utiliz bann mèm publikasion pou étudié la Bib. É nou fémont lamour pou inn é lot. Kinport landroi ousa nou viv, ‘nout tout nou loué le non Jéova é nou ador ali dan lunité’ (Sofoni 3:9, ti not).

2. Kosa ou pe fé pou favoriz lunité ?

« Èm azot inn é lot for mèm, èk le keur » (1 Pièr 1:22). Koman ou pe mèt an pratik konsèy la ? Olèrk gard rienk défo lé zot, rod kèl kalité zot néna. Frékant pa seulman bann moun ki ièm le mèm zafèr ke ou, é aprann konèt bann frèr é seur ki sort in not landroi. Fé tout out posib pou anlèv bann mové santiman oubien bann mové fason pansé ke ou pe avoir su lé zota (lir 1 Pièr 2:17).

3. Kosa ou pe fé kan néna bann dézakor ?

Nou lé uni, mé nou lé inparfé osi. Souvandéfoi, nout tout, nou désoi oubien nou blès lé zot. La Parol Bondieu i di anou : « Kontinué [...] pardonn azot inn é lot èk gran keur », é li ajout : « Parèy kom Jéova la pardonn azot èk gran keur, zot i doi pardonn azot èk gran keur » (lir Kolosien 3:13). Souvandéfoi, nou blès Jéova é pourtan li pardonn anou. Donk li atann ali ke nou pardonn nout bann frèr é seur. É si ou rann aou kont ke ou la blès in moun, fé le premié pa pou fé la péb (lir Matieu 5:23, 24).

ALON APRANN PLUS

4. Rejèt bann mové fason pansé ke ou pe avoir su lé zot

Nou ve èm tout nout bann frèr é seur. Mé lé pa toujour fasil aksèp in moun ke lé pa kom nou. Kosa i pe èd anou ? Lir Akt 10:34, 35 é koz su bann késtion la :

• Jéova i aksèp tout kalité d’moun pou ador ali. Kèl léfé sa i devré avoir, su out fason ou konsidèr sak na poin le mèm zorijinn ke ou ?

• Kèl mové fason pansé su lé zot ke ou doi rejeté, néna koté ou ?

Lir 2 Korintien 6:11-13 é koz su késtion la :

• Dapré ou, koman ou pouré ni plu proch out bann frèr é seur ke na poin mèm zorijinn ke ou ?

5. Pardonn èk gran keur é fé la pé

Jéova i pardonn anou èk gran keur, mèm si li, li nora jamé rien pou fé pardonn ali. Lir Psom 86:5 é koz su bann késtion la :

• Kosa vèrsé la i aprann anou su le pardon Jéova ?

• Poukosa ou lé ereu ke Jéova i pardonn aou ?

• Dan kèl situasion lé parfoi difisil bien antann èk lé zot ?

Koman imit Jéova pou rès uni avèk nout bann frèr é seur ? Lir Provèrb 19:11 é koz su késtion la :

• Si in moun i énèrv aou oubien i blès aou, kosa ou pe fé pou apèz le situasion ?

Nadfoi, sé nou ki blès lé zot. Kan sa i ariv, kosa nou doi fé ? Gard le VIDÉO é koz su le késtion ki vien apré.

VIDÉO : Fé la pé i donn bann bienfé (6:01)

• Kosa in seur la fé pou remèt la pé an plas ?

6. Rod bann poin for ché out bann frèr é seur

Kan nou aprann konèt nout bann frèr é seur, nou dékouv zot poin for é zot poin fèb. Koman nou pe fé pou kal nout léspri su zot bon koté ? Gard le VIDÉO é koz su le késtion ki vien apré.

VIDÉO : Alon mont nout joli kalité ! (5:10)

• Kosa va èd aou voir bann kalité ché out bann frèr é seur ?

Jéova i kal son léspri su nout bann kalité. Lir 2 Kronik 16:9a é koz su késtion la :

• Kosa i fé aou konèt ke Jéova i kal son léspri su nout bann kalité ?

SAK NOU LA APRANN

Ou pe favoriz lunité dan lasanblé, si ou lé pré pou pardoné é si ou fémont out lamour pou tout out bann frèr é seur.

Alon révizé

• Koman ou pe rejèt bann mové fason pansé su lé zot ?

• Kosa ou va fé si ou lé an dézakor avèk in not krétien ?

• Poukosa ou ve imit Jéova pou pardoné ?

GARD SA OSI

In légzanp Jézu ki pe èd anou pa juj lé zot.

Tir le gro morso d’boi dann out zieu (6:56)

Èske i fo mi éskuz amoin, mèm si mi pans ke mi néna rézon ?

« Les excuses contribuent à la paix » (La Tour de Garde, 1^er novembre 2002)

Koman désèrtin la aprann trèt lé zot san choizi in vizaj plis k’in not.

Ne jugeons pas d’après l’apparence (5:06)

Koman règ bann dézakor, avan ki briz la pé dan lasanblé ?

« Règle les désaccords avec amour » (La Tour de Garde, mai 2016)