LESON 12

Kosa va èd aou kontinué out létud la Bib ?

Vèrsion inprimé

Kan nou fé in voiyaj, nou dékouv bann gayar zafèr, mé nou pe rankont osi bann difikulté. Kan nou étudié la Bib, lé in pe parèy. Nadfoi nou va demann anou si nou sra kapab kontinué. Mé poukosa i vo le kou fé sa ? É kosa va èd aou kontinué malgré bann difikulté ?

1. Poukosa lé inportan étudié la Bib ?

« La parol Bondieu lé vivan é puisan » (Ébreu 4:12). La Bib néna in bonpe la valeur. Ladan Bondieu i fé konèt anou sak li pans é sak li resan pou nou. Dan la Bib, nou pe aprann in kantité zafèr, li pe rann anou osi saj é donn anou in léspoir. É an plus ke sa, li pèrmèt anou vni kamarad ansanm Jéova. Kan nou étudié la Bib, nout vi lé vréman plu gayar.

2. Poukosa i fo nou akord in bonpe la valeur pou bann vérité ke néna dan la Bib ?

Bann vérité ke néna dan la Bib lé in vré trézor. Sé pousa la Bib i di anou : « Achté la vérité é vann pa li jamé » (Provèrb 23:23). Kan nou konpran vréman la valeur trézor la néna, nou va pa larg nout létud la Bib, mèm si néna zafèr i rod kal nout lélan (lir Provèrb 2:4, 5).

3. Koman Jéova i pe èd aou kontinué out létud la Bib ?

Jéova, le Kréateur Toupuisan é out Kamarad, i ve èd aou konèt ali. É pousa, li pe donn aou « an mèm tan lanvi é la fors pou aji » (lir Filipien 2:13). Si nadfoi ou la pa anvi d’fé out létud la Bib, oubien mèt an pratik sak ou aprann, ou pe kont su li pou èd aou. Si ou la bezoin la fors pou afront bann difikulté, li pe donn aou sa. Sé pousa mèm, ou pe pri toultan Jéova out Papa dann sièl, pou èd aou kontinué out létud la Bib (1 Tésalonisien 5:17).

ALON APRANN PLUS

Alon voir kosa i fo fé pou kontinué out létud la Bib mèm si ou néna kantité zafèr pou fé dan out vi ou mèm si ou néna difikulté. Aprésa alon voir koman Jéova i èd anou.

4. Mèt an premié out létud la Bib dan out vi

Nadfoi nou néna tèlman zafèr pou fé, ke nou di anou ke nou na poin le tan pou étudié la Bib. Alor kosa i fo fé ? Lir Filipien 1:10 é koz su bann késtion la :

Dapré ou, kosa i lé le « bann zafèr le plu zinportan » dan la vi ?
Kosa i fo fé pou mèt out létud la Bib an premié dan out vi ?

A. Detroi zimaj ki mont koman ranpli in so èk galé é le sab. 1. In ta le sab é in ta galé. 2. In so prèske ranpli èk le sab. 3. Bann galé lé pozé su le sab é zot i dépas le so ; dot la pa gingn rantré é lé pozé koté le so.

B. Detroi zimaj a la suit : 1. Le mèm ta le sab é le mèm ta galé. 2. Le mèm so prèske ranpli èk galé. 3. Le sab i pas a travèr bann galé é i ranpli le so jusko bor. I rès rienk inn ti pe le sab koté le so.

Si i mèt le sab avan, na poin asé la plas pou tout bann galé.
Si i mèt bann galé avan, néna asé la plas pou prèske tout le sab. Dan la vi, si nou fé pas « bann zafèr le plu zinportan » avan, nou nora le tan fé azot, é va rès anou ankor le tan pou fé dot choz.

Nout létud la Bib i aprann anou konèt é ador Bondieu. Lir Matieu 5:3 é koz su késtion la :

Kosa i ariv kan nou mèt létud la Bib an premié dan nout vi ?

5. Kontinué out létud la Bib mèm si désèrtin i rod pou dékouraj aou

Lé posib ke désèrtin i rod pou dékouraj aou étudié la Bib. Gard kosa la ariv Francesco. Gard le VIDÉO é koz su bann késtion ki vien apré.

VIDÉO : Son bann zéfor la été béni (5:22)

In zimaj le vidéo « Son bann zéfor la été béni ». Francesco i sava loin son bann kamarad kan li la fini di banna ke li frékant pu zot.

Kan Francesco la koz avèk son bann kamarad é son momon su sak li té aprann, koman banna la réaji ?
Koman son bann zéfor la été béni ?

Lir 2 Timoté 2:24, 25 é koz su bann késtion la :

Kosa out fami é out bann kamarad i pans su sak ou aprann ?
Dapré bann vèrsé la, koman ou devré réaji si in moun lé trakasé parske ou étudié la Bib ? Poukosa ou di sa ?

6. Kont su Jéova pou èd aou

Plus nou kos koté Jéova, plus nou la anvi d’fé plézir ali. Lé vré, nou pe trouv difisil fé désèrtin chanjman dan nout vi pou fé sak Jéova i demann anou. Si sa i ariv aou, dékouraj pa ou. Jéova lé la pou èd aou. Gard le VIDÉO é koz su bann késtion ki vien apré.

VIDÉO : Jéova i èd anou chanj nout konportman (3:56)

Kèl chanjman Jim la fé dan son vi pou fé plézir Jéova ?
Kosa la mark aou dan son légzanp ?

Lir Ébreu 11:6 é koz su bann késtion la :

Kosa Jéova i fé pou « sak i rod ali èk tout zot keur », sétadir pou sak i fé zéfor pou konèt ali é pou fé plézir ali ?
Dapré vèrsé la, kosa Jéova i resan kan li voi bann zéfor ke ou fé pou étudié la Bib ?

DOMOUN I POURÉ DEMANN AOU : « Poukosa ou étudié la Bib ? »

Kosa ou noré réponn ?

SAK NOU LA APRANN

Étudié la Bib i pe donn aou la vi pou toultan. Pousa i fo fé zéfor, mé si ou kont su Jéova, li va béni aou.

Alon révizé

Poukosa bann vérité ke néna dan la Bib na in bonpe la valeur pou ou ?
Kosa ou pe fé pou mèt an premié bann « zafèr le plu zinportan » ?
Poukosa ou devré demann Jéova èd aou pou kontinué out létud la Bib ?

Ma la fini le parti 1 le :

Sak mi doi fé

Kontinué fé mon létud la Bib omoin 1 foi par semèn. Si mi gingn pa étudié le jour ke ma la choizi, mi trouv in not moman pou mon létud.

Sak mi ve fé an plus :

Ékri ali tèrla

GARD SA OSI

4 prinsip ki èd bonpe domoun bien jèr zot tan.

« Comment bien gérer son temps » (Réveillez-vous !, février 2014)

In momon té fé bonpezéfor pou fé plézir Bondieu,mé son mari té konpran pa èl. Koman Jéova la èd madam la ?

Jéova i donn anou la fors pou port nout bann traka (5:05)

Zistoir in mesieu ke lé devnu kamarad Bondieu gras bann zéfor ke son madam la kontinué fé pou konèt Bondieu.

Ma la pous la vérité devan tribunal (6:30)

Nadfoi i di bann Témoin Jéova i kas bann fami. Èske sa lé vré ?

« Èske bann Témoin Jéova i kas bann fami oubien i èd banna vni plu for ? » (lartik jw.org)