Ma la dézobéi papa momon... kosa i fo fé astèr ?

Dan la plipar bann famiy, néna bann règ k’i fo suiv, pétèt dési lèr pou rant la kaz, pou ansèrv téléfone ou dot zaparèy, dési bann joli manièr, é dot zafèr ankor.

Èské ou la dézobéi out papa momon ? Si oui, ou gingn pu chanj sak la èspasé, mé ou pé évit agrav out ka. Dan lartik-la, ou va oir koman ou pé fé sa.

• Sak i fo pa fé

• Lo méyèr zafèr ou pé fé

• Kosa banna i pans

Sak i fo pa fé

• Si out papa momon i koné pa ké ou la dézobéi azot, ou pouré èt tanté kamouf lo zafèr.

• Si banna i koné k’ou la dézobéi azot, ou pouré èt tanté rod pou défand aou, oubien rojèt la fot dési in not moun.

Lé pa bon ditou fé bann zafèr komsa. Poukosa ? Parské kan nou kachièt sak la èspasé oubien kan nou rod anou bann zèskuz, sa i fé mont ké nou néna ankor dolé dann né. Sa i fé mont sèlman out papa momon, ké ou lé bézoin grandi ankor.

« Ramas mantèr, va pa èd aou ditou. In jour ou lot i fini par konèt la vérité, é la, la punision lé plis dur, alor vo mié di toutsuit la vérité » (Diana).

Lo méyèr zafèr ou pé fé

• Rokoné sak ou la fé. La Bib i di : « Sak i kachièt son bann péché, i avansra pa li rien » (Provèrb 28:13). Out papa momon i atand pa ké ou fé tout kom k’i fo. Parkont, zot i vé ké ou lé onèt dan tout sak ou fé.

  « Bann papa momon nora plis lanvi pardone anou, kan nou di azot la vérité. Kan, toutsuit nou di sak nou la fé, sa i pous azot ankor plis pou kroir ké nou lé onèt é ké nou march droit » (Olivia).

• Domand pardon. La Bib i di : « Mèt zot sintur lumilité » (1 Pièr 5:5). I fo lumilité pou domand pardon, é rojèt lanvi pou rod in ta zèskuz pou défand aou.

  « Bann moun k’i rod toultan bann zèskuz, i pé afébli zot konsians. Aforstan, zot lé mèm pu jéné kan zot i fé in mové zafèr » (Heather).

• Aksèp sak i ariv aou. La Bib i di : « Ékout la korèksion » (Provèrb 8:33). Rod pa lo bout, aksèp san boudé lo punision ké out papa momon i done aou.

  « Plis nou souplingn d’in punision, plis nou agrav nout ka. Vo mié aksèp sak i ariv anou olèrk rès kalé su sak nou la pèrd » (Jason).

• Rogingn la konfians out papa momon. La Bib i di : ‘Rojèt lo vié tanpéraman, ké lé bazé dési zot fason viv avan’ (Éfézien 4:22). Kontinié pran bann saj désizion é gard bon labitud-la pou rogingn la konfians out papa moman.

  « Si nout papa momon i oi ké nou pran toultan bann saj désizion é ké nou va pa rofé lo mèm lérèr, nou va rogingn zot konfians » (Karen).

IN KONSÈY : Kan out papa momon i domand fé kèkchoz, ézit pa fé dot zafèr an plis, komsa zot va oir k’i pé fé aou konfians. Par égzanp, in prochin kou, kan ou va sorti, dèk ou pran chemin pou artourné, fé konèt out papa momon, mèm si ou lé pa an rotar. Sra komsi ou di azot : « Mi vé rogingn zot konfians. »