In bonpe d’moun i sar pu bann sérémoni relijieu parske zot i trouv pa okin répons pou bien amèn zot vi, ni okin rékonfor dan la relijion. Pou kosa asis bann rénion ke lé fé par bann Témoin Jéova ? Kèl bienfé ou nora ?

Kontantman èt an bonn konpani. Bann krétien premié sièk té organizé an kongrégasion. Zot té rasanm a zot pou ador Bondieu, pou étudié bann Zékritur, é pou ankouraj inn é lot (Ébreu 10:24, 25). Kan zot té retrouv a zot, chakèn té i sousi a zot pou inn é lot avèk lamour. Zot té rasanm a zot avèk zot frèr é seur dan la foi ke lété pou zot bann vré zami (2 Tésalonisien 1:3 ; 3 Jan 14). Nou suiv zot légzanp, é nou resan le mèm joi ke banna.

In formasion pou mèt an pratik bann zansègnman biblik. Kom dann tan biblik, bann zom, bann fam é bann zanfan i réuni a zot ansanm. Bann zansénian ke néna léspèryans, i ansèrv la Bib pou èd a nou konprann koman nou pe mèt an pratik bann zansègnman biblik dann nout vi tou lé jour (Detéronom 31:12 ; Neémia 8:8). Chakèn i pe mont son foi é son léspérans kan li donn bann komantèr é kan li chant kantik (Ébreu 10:23).

Kontantman pou gingn in foi plu for. Lapot Pol la di avèk bann pèrsonn dann in kongrégasion son lépok : « Ma la anvi vréman voir a zot [...] pou ke néna in léchanj lankourajman ant zot, pou ke chakèn lé ankourajé par la foi inn é lot, sad zot kom la mièn » (Romin 1:11, 12). Kan nou réuni a nou toultan avèk dot Témoin Jéova, sa i ranfors nout foi é nout volonté pou mèt an pratik bann vérité biblik.

I diré a ou asis in prochin rénion ke nora dan nout kongrégasion pou profit tout bann bienfé la ? Ou sra bienvnu ! Nout bann rénion lé gratuit ; i fé jamé la kèt.

• Kèl légzanp nou suiv pou organiz nout bann rénion ?

• Kosa nout bann rénion i aport a nou ?

Désèrtin lé pré pou travèrs bann foré danjereu ou suport bann klima ke lé difisil, pou asis chak semèn nout bann rénion. Bann difikulté la vi oubien la fatig apré in bon journé travay, i défann pa nou rasanm a nou avèk dot Témoin Jéova. Kèl bienfé nou gingn kan nou fé tousa zéfor la ?

Nou san a nou bien. Lapot Pol la ankouraj sad i asis bann rénion dann bann kongrégasion pou « fé in kont ansanm inn é lot », sa i ve dir aprann mieu konèt a nou (Ébreu 10:24). Par sak li la di, li ankouraj a nou pou sousi a nou vréman pou lé zot. Kan nou pran le tan pou konèt dot pèrsonn dan la kongrégasion, nou rann a nou kont ke banna la gingn ansort a zot kan zot la rankont mèm difikulté ke nou néna. Nou konpran ke banna i pe èd a nou surmont nout bann difikulté osi.

Bann zamitié solid. Kan nou asis nout rénion, nou retrouv pa seulman bann domoun ke nou koné, mé bann vré zami. Défoi, nou néna lokazion détann a nou ansanm, dann bann lamuzman ki konvien. Kosa bann frékantasion la i aport a nou ? Nou aprann mieu konèt a nou, é sa i ranfors nout lamour pou inn é lot. Apré, kan inn i rankont bann problèm, nou èd a li avèk bon keur, parske néna bann zamitié solid ant nou (Provèrb 17:17). Kan nou frékant tout sak i fé parti nout kongrégasion, nou mont ke « chakèn i sousi a li pou inn é lot » (1 Korintien 12:25, 26).

Nou ankouraj a ou choizi out bann zami parmi sak i fé la volonté Bondieu. Ou va trouv bann zami komsa parmi bann Témoin Jéova. Lès pa rien défann a ou asis bann rénion èk nou !

• Kèl bienfé nou gingn kan nou asis nout bann rénion ?

• Kansa ou èmré fé konésans avèk bann pèrsonn dann nout kongrégasion ?

Bann rénion krétien dann tan premié sièk, lavé rien a voir avèk bann sérémoni relijieu. Kan bann krétien té réuni a zot, lété surtou pou chant kantik, pou priyé, pou lir é diskut su bann vèrsé bann Zékritur (1 Korintien 14:26). Ojourdui, kan nou néna nout bann rénion, nou fé parèy.

In lansègnman pratik é bazé su la Bib. Kan i ariv le ouikèn, chak kongrégasion i retrouv a zot pou ékout in diskour biblik ki dur 30 minut. Bann diskour la, i mont koman la Parol Bondieu lé util pou nout lépok é dan nout vi. Tout sèk lé la, lé ankourajé lir dan zot bib bann vèrsé ke lé sité. Jus apré diskour la, tout sak lé prézan, lé invité pou partisip létud « La Tour de Garde ». Létud la, ke lé in diskusion, i dur in eur tan, é lé bazé su in sujé dan La Tour de Garde. Sa i èd a nou mèt an pratik bann zansègnman biblik dan nout vi. Le mèm sujé lé étudié dan plus 110 000 kongrégasion su tout la tèr.

In formasion pou èd a nou ansègn la Bib. Nou retrouv a nou osi in soir dan la semèn pou in rénion an troi parti ke i apèl Vi Krétien é Ministèr. Se rénion la, lé bazé su bann sujé ke lé tiré dan le Kayé pou la Rénion Vi é Ministèr ke i sort tou lé moi. Le premié parti rénion la, ke i apèl bann Trézor la Parol Bondieu, i èd a nou mieu konprann bann vèrsé la Bib. Sèk i asis rénion la, lé ankourajé pou lir bann chapit la Bib a lavans. Aprésa, néna le parti Aplik a ou pou le ministèr ke i kontien bann démonstrasion pou mont a nou koman diskut su la Bib avèk bann domoun. In konséyé i fé detroi remark pou èd a nou amélior nout fason lir é kozé devan lé zot (1 Timoté 4:13). Dan le dèrnié parti ke i apèl Vi Krétien, nou aprann koman mèt an pratik bann prinsip la Bib dan nout vi tou lé jour. Sa lé fé par in diskusion avèk késtion é répons pou aprofondir nout konésans su la Bib.

La kalité lansègnman biblik ke nou gingn pandan nout bann rénion i sar surprann a ou (Izai 54:13).

• Koman i déroul nout bann rénion ?

• Kèl rénion ou èmré asisté an premié ?

Kan ou regard bann foto ke néna dann brochur la, èske ou la remarké koman bann Témoin Jéova lé bien abiyé pou asis zot rénion ? Pou kosa nout labiman é nout koifur lé vréman inportan pou nou ?

Nou mont nout réspé pou Bondieu. Lé vré ke Bondieu i regard pa seulman nout laparans (1 Samuèl 16:7). Mé kan nou ador a li an group, nou ve vréman avoir in réspé pou li, é pou bann domoun avèk ki nou rasanm a nou. Si nou té doi prézant a nou devan in juj, par réspé pou son pozision, nou va fé atansion nout labiman. Lé parèy, pandan nout rénion, nout labiman i mont nout réspé pou Jéova nout Bondieu « le Juj su tout la tèr », é pou landroi ousa nou ador a li (Jenèz 18:25).

Nou mont nout réspé pou bann prinsip biblik. La Bib i ankouraj bann krétien abiy a zot « in fason sinp é avèk bon sans » (1 Timoté 2:9, 10). Kan nou abiy « in fason sinp », sa i ve dir ke nou doi pa atir latansion su nou. Nou va évit port bann linj tro voiyan, provokan, é ki mont la form nout kor. Si nou néna le « bon sans », sa va èd a nou choizi bann joli linj ke lé pa débrayé, ou bien bizar. Mèm si nou suiv bann prinsip la, nou na kan mèm in bonpe choi pou abiy a nou selon nout gou. San kozé, nou fé an sort « ke lansègnman nout Soveur lé atiran » é i « rann gloir Bondieu » par in labiman bien choizi (Tit 2:10 ; 1 Pièr 2:12). An vré, kan nou lé bien abiyé pou asis nout bann rénion, nou donn in bon témoiniaj su nout ladorasion pou Jéova.

I fo pa ke out fason abiyé i anpèch a ou asis nout bann rénion ! Ou la pa bezoin mèt bann linj chèr oubien suiv la mod pou èt bien abiyé é prop.

• Pou kosa nout labiman lé inportan kan nou ador Bondieu ?

• Kèl prinsip i doi gid a nou pou choizi nout labiman ?

Si ou étudié la Bib avèk in Témoin Jéova, ou fé surman bann zéfor pou prépar a ou avan chak létud. Ou koné, lé bien ke ou fé komsa osi avan asis in rénion. Si ou fé sa, ou va gingn bien konprann sak lé ansénié. Sak i fodré, sé avoir in bon program.

Choizi in bon moman é in bon landroi. Dann in journé, kansa ou lé plus konsantré ? Èske sé gran matin avan komans out travay oubien kan bann marmay la finn dormi le soir ? Mèm si ou gingn pa étudié tro lontan, désid konbien d’tan ou va étudié. Surtou, fé an sort ke la poin rien i vien kas out program. Ou pe trouv inn ti landroi trankil, ousa la poin radio, télé oubien out téléfonn pou déranj a ou. Avan ou komans étudié, fé in priyèr. Sa va èd a ou mèt tout out bann traka dan la journé in koté. Aprésa, ou va gingn mèt tout out léspri dan la Parol Bondieu (Filipien 4:6, 7).

Soulign bann zidé ke lé inportan é prépar bann komantèr. Ou pe komans fé a ou in lidé su le sujé, kan ou lir a li an antié. Aprésa, ou pe réfléchi su le tit le leson ou le chapit. Ou pe ésèy konprann le lien ke néna ant le tit é chak soutit. Regard bien bann zimaj. Oubli pa lir bann késtion révizion ki rapèl bann poin inportan dan le leson. Kan ou la finn fé sa, ou pe lir bann paragraf é trouv bann répons pou chak késtion. Kom néna osi bann vèrsé la Bib ke lé doné pou lir, ou pe ésèy trouv le lien ke néna ant le leson é bann vèrsé la (Akt 17:11). Asteur, kan ou la finn trouv le répons pou le késtion le paragraf, ou pe soulign detroi mo ou detroi zidé, pou èd a ou retenir. Pandan la rénion, si ou souèt, ou pe lèv out min pou donn inn ti komantèr, avèk out prop mo.

Si ou réfléchi in pe su tout bann sujé ke lé étudié pandan nout rénion chak semèn, ou va gingn ajout dot « pèrl » dann out konésans biblik ke lé in trézor (Matieu 13:51, 52).

• Kèl program ou pouré mèt an plas pou prépar bann rénion ?

• Koman ou pe prépar inn ti komantèr pou in rénion ?

Depui dann tan lontan, Jéova i ve ke chak pèrsonn dan la fami i retrouv a zot ansanm pou étudié é ranfors zot lien avèk Jéova é ant zot (Detéronom 6:6, 7). Sé pousa mèm ke bann Témoin Jéova i rézèrv in tan dan la semèn pou ador Bondieu avèk tout la fami. Kan zot i fé sa, zot i choizi in landroi ousa zot i san a zot bien, é zot i koz su bann sujé biblik éspésialman pou zot bezoin. Mèm si ou viv touseul, ou pe trouv in tan pou ador Bondieu é pou étudié in sujé biblik ki intérès a ou.

In tan pou raproch a ou koté Jéova. « Aproch a zot koté Bondieu, é li va aproch koté zot » (Jak 4:8). Kan nou dékouv dan la Bib kèl karaktèr Jéova néna, é osi tout sèk li fé, nou aprann konèt a li ankor plus. In bon moiyen pou mèt an plas létud familial, sé réuni toulmonn pou lir la Bib ansanm, pou ke tout la fami i gingn antann. Petèt ke zot i pouré suiv le program pou la Rénion Vi é Ministèr pou la semèn. Chak pèrsonn dan la fami i pe lir in bout. Aprésa, chakèn son tour i pe dir sèk li la aprann su bann vèrsé ke zot la lir.

In tan pou raproch a ou koté out fami. Kan in mari é son madam, bann paran é bann zanfan, i pas in tan pou étudié la Bib ansanm, zot lien i ranfors plus. Sa i devré èt in moman gayar é trankil ke toulmonn dan la fami i atann avèk inpasians. Désèrtin paran i choizi bann sujé ke lé util pou diskut avèk zot zanfan. Pousa, zot i tien kont laj zot marmay. I pe èt par égzanp in problèm ke le marmay la rankontré dan lékol é zot i regard osi koman règ le problèm. Zot i ansèrv osi bann sujé dan La Tour de Garde ou Réveillez-vous !, oubien nout sit ouèb, jw.org. Poukoi pa regard in program su la télédifuzion (tv.jw.org) ansanm é diskut desu apré ? Désèrtin, i aprési osi pou boir ou manj inn ti kékchoz apré létud an fami.

Se gayar moman pasé chak semèn pou ador Jéova, va èd tout domoun dan la fami prann plézir pou étudié la Bib. Bondieu i oublira pa donn son bénédiksion pou bann zéfor ke zot i fé pou étudié avèk la fami (Psom 1:1-3).

• Pou kosa prann in tan pou fé létud avèk la fami ?

• Koman bann paran i fé pou ke la fami i pas in bon moman kan i fé létud familial ?

Akoz bann domoun la, lé kontan komsa ? Parske zot i asis inn nout bann zasanblé. Dann tan lontan, Bondieu la demann son bann sèrviteur rasanm a zot troi foi dan lané. Ojourdui lé parèy, nou lé présé retrouv a nou osi dann nout bann gran zasanblé (Detéronom 16:16). Tou lé zan nou nana osi troi zasanblé : deu zasanblé sirkonskripsion ki dur in jour é in lasanblé réjional ki dur troi jour. Kèl bienfé bann zasanblé la i aport a nou ?

I raproch a nou avèk nout bann frèr é seur. Bann zisraélit lété kontan rann gloir Jéova « dann bann foul rasanblé ». A nou osi, nou lé kontan ador Jéova ansanm, dann nout bann zasanblé (Psom 26:12 ; 111:1). Bann zasanblé la, i donn a nou lokazion rankont oubien retrouv bann Témoin dot kongrégasion, ou mèm dot péi. Nou rès ansanm pou la poz midi, é sa i pèrmèt a nou pas in bon moman ant zami (Akt 2:42). Pandan bann zasanblé la, nou resan par nou mèm koman lamour i uni « tout la fami nout bann frèr » su tout la tèr (1 Pièr 2:17).

I èd a nou mèt an pratik bann zansègnman biblik. Bann Zisraélit lété kontan osi kan zot la « konpri bann parol » dé Zékritur ke lavé ésplik a zot (Neémia 8:8, 12). Kom zot, a nou osi, nou ièm lansègnman biblik ke nou gingn dan nout bann zasanblé. Chak jour lasanblé lé bazé su in vèrsé la Bib. Gras bann diskour èk bann démonstrasion, nou aprann koman fé la volonté Bondieu dan nout vi. An plus, nou lé ankourajé kan nou antan koman bann krétien i fé zéfor pou obéi Bondieu, malgré se lépok difisil. Dann bann zasanblé réjional, nana bann piès téat bazé su bann zistoir biblik ki ansègn a nou bann leson ke lé util pou nou. Dann chak lasanblé, tout sak i ve mont domoun ke zot la désid prann pozision pou Bondieu, i fé batiz a zot.

• Pou kosa nou lé kontan asis nout bann zasanblé ?

• Kèl bienfé ou pouré ganié si ou asis in lasanblé ?

Inn ti pe avan son mor, Jézu la di : « Bonn nouvèl roiyom la i sra préché su tout la tèr abité kom in témoiniaj pou tout bann nasion; é aprésa, la fin va arivé » (Matieu 24:14). Mé koman prédikasion la, i sra fé su tout la tèr ? Sé kan i suiv légzanp ke Jézu la lésé (Luk 8:1).

De port an port. Jézu la aprann son bann disip koman prèch la bonn nouvèl de kaz an kaz (Matieu 10:11-13 ; Akt 5:42 ; 20:20). Bann premié krétien lavé zot prop téritoir ousa zot i devé préché (Matieu 10:5, 6 ; 2 Korintien 10:13). Lé parèy ojourdui, nout prédikasion lé bien organizé : chak kongrégasion i prèch dann in landroi ke lé rienk pou li. Kan nou fé sa, nou akonpli sad Jézu la demann a nou : préché é donn in témoiniaj konplé (Akt 10:42).

Dot manièr préché. Jézu té i prèch dann bann zandroi publik, partou ousa li té i trouv domoun, é sa, té pe èt su in plaj oubien a koté in pui d’lo (Mark 4:1 ; Jan 4:5-15). A nou osi, nou suiv son légzanp, é nou sar diskut su la Bib avèk bann domoun partou ousa nou gingn : i pe èt dann chemin, ousa zot i travay, dann bann park, é dot plas ankor. In not manièr ankor, nou ésèy apèl domoun par téléfonn. I ariv osi, kan lokazion i prézant, nou prèch avèk nout bann voizin, nout bann kolèg travay, bann kamarad é nout fami osi. Gras tout bann zéfor la, domoun par milion su tout la tèr, la antann « la bonn nouvel [la] délivrans » (Psom 96:2).

Avèk kisa ou ièmré anons bonn nouvèl le Roiyom Bondieu la é sèk li va aporté pou lavnir ? Gard pa mésaj léspoir la pou ou touseul. Ézit surtou pa, parl sa otour de ou !

• Kèl « bonn nouvèl » i doi èt anonsé ?

• Kèl métod Jézu nou utiliz pou préché ?

An tan normal, le mo « pionié » lé utilizé pou in moun ki dékouv in nouvo laktivité an premié oubien in landroi é ki rouv le chemin pou lé zot. Nou pe dir ke Jézu lété in pionié, parske li lété anvoiyé su la tèr pou komans préché. Li la anons in mésaj i donn la vi, pou donn bann zumin léspoir pou èt sové (Matieu 20:28). Ojourdui, son bann disip i fé parèy ke li. Zot i pas le plus le tan posib pou fé dot disip (Matieu 28:19, 20). Désèrtin i gingn fé sèk nou apèl le sèrvis pionié.

Sé kèlkin ki prèch a plin tan. Tout bann Témoin Jéova i anons la bonn nouvèl. Mé désèrtin la organiz zot tan pou èt pionié pèrmanan é pou prèch 70 zeur pou le moi. Pou gingn fé sa, zot i préfèr souvandéfoi rod in travay mi tan. Detroi, lé anvoiyé kom pionié éspésial dann bann zandroi ousa la poin asé Témoin Jéova pou préché, é zot i fé 130 eur pou le moi. Bann pionié i kontant a zot viv in fason sinp, zot i fé konfians ke Jéova va donn a zot sèk zot la bezoin pou viv (Matieu 6:31-33 ; 1 Timoté 6:6-8). Sèk i pe pa prèch a plin tan, i pe èt pionié oksilièr, é zot i prèch 30 ou 50 eur pou in moi.

Sé kèlkin ki ièm Bondieu é bann domoun. Kom Jézu, nou rann a nou kont ke in bonpe domoun na gran bezoin konèt Bondieu (Mark 6:34). Nou pe utiliz sèk nou la aprann pou èd a zot koméla mèm, é sa, va aport a zot in léspérans sur. In pionié sé kèlkin ki èm bann domoun. Sé pousa ke li donn avèk gran keur son tan é son fors pou fé konèt a zot la bonn nouvèl (Matieu 22:39 ; 1 Tésalonisien 2:8). Avèk sa, li gingn in foi plu for, li raproch a li koté Bondieu, é li gingn in bonpe kontantman (Akt 20:35).

• Kosa i lé in pionié ?

• Kosa i pous désèrtin pou èt pionié ?

Depui lontan, bann Témoin Jéova na labitud mèt an plas bann formasion téokratik. Bann krétien ki prèch a plin tan, i pe profit bann formasion éspésial pou zot « akonpli a fon [zot] ministèr » (2 Timoté 4:5).

Lékol pionié. Kan li la finn prèch in lané a plin tan, le pionié pèrmanan i suiv in formasion ki dur sis jour. La plupar du tan, sa lé fé dann in Sal du Roiyom pa tro loin landroi li abit. Lékol la, i èd le pionié raproch a li ankor plus koté Jéova. Parsa, li devien plu gabié dann tout manièr préché é pou kontinué rès fidèl dan son sèrvis.

Lékol zévanjélizateur du Roiyom. Sé in formasion ki dur deu moi. Lékol la, i form bann pionié ke néna léspèryans. Banna i doi èt pré pou kit landroi ousa zot i abit, pou sèrv dann ninport kèl landroi ousa zot i sré util. Pou zot, sé in fason dir : « Moin lé la ! Anvoiy a moin ». Zot i suiv légzanp le plu gran Prédikateur ke lété su la tèr, Jézu Kris (Izai 6:8 ; Jan 7:29). Kom zot i kit landroi ousa zot i abit pou alé viv loin, i fo ke zot i mèn souvandéfoi in vi sinp. Parfoi i fo pansé ke la kultur, le klima é le manjé lé pa parèy dutou ke sak zot té koné. I fo petèt mèm aprann in nouvo lang. Lékol la, lé rézèrvé pou bann frèr é seur sélibatèr ou maryé, ke nana ant 23 é 65 an. Li èd a zot kultiv bann kalité éspirituèl ke zot nora bezoin ousa va anvoiy a zot. Avèk formasion la, zot va dévlop bann kapasité ke va èd a zot ankor plus sèrv Jéova èk son lorganizasion.

Lékol biblik Giléad. An ébreu, le mo « Giléad » i ve dir « in Ta [ki sèrv kom] Témoin ». Kan la mèt an plas lékol la an 1943, nana plus 8 000 misionèr ke lété anvoiyé pou prèch in manièr éfikas « juska léstrémité la tèr » (Akt 13:47). In légzanp, kan bann misionèr la ariv dann péi Pérou, navé poin okin kongrégasion. Ojourdui, nana plus 1 000 kongrégasion dann péi la. Pou le Japon, lavé moin 10 Témoin kan bann misionèr la komans préché. Asteur, dann péi la, nana plus 200 000 Témoin. Lékol Giléad i dur 5 moi, é la Parol Bondieu lé étudié an profondeur. Bann pionié éspésial, bann misionèr, bann Bétélit, bann survéyan sirkonskripsion èk zot madam lé invité pou asis lékol la. Zot i resoi in formasion ke lé pousé, pou ranfors é fé progrès la prédikasion su tout la tèr.

• Pou kosa la mèt an plas in Lékol pionié ?

• Kisa i pe asis Lékol zévanjélizateur du Roiyom ?