BANN NOT
1 JÉOVA
Le non Bondieu sé Jéova. Se non la i ve dir osi « li fé devnir ». Jéova sé le Bondieu Toupuisan. Li la kré tout zafèr. Li na le pouvoir pou fé tout sak li désid fé.
Dan la lang ébreu, le non Bondieu i ékri avèk 4 lèt. Dan la lang fransé, bann lèt la i akord avèk bann 4 lèt YHWH oubien JHVH. Nou trouv le non Bondieu apepré 7 000 foi dan le tèks ébreu ékri dann premié débu. Dan le monn antié, bann domoun i pronons diféran fason le non « Jéova ». Zot i pronons se non la, kom zot na labitud kozé dan zot lang.
2 LA BIB LÉ « INSPIRÉ PAR BONDIEU »
Sé Bondieu la fé ékri la Bib, mé li la ansèrv bann zom pou fé sa. Lé parèy kom kan in patron i demann son sekrétèr ékri in lèt. Bondieu la ansèrv son léspri sin pou gid bann zom pou ke banna i ékri son bann pansé. Léspri sin la aji su bann zom la diféran fason. Par égzanp, li la fé voir banna bann vizion oubien bann rèv, é aprésa banna la ékri tout sak zot té i voi dan lo bann vizion é lo bann rèv.
▸ Chap. 2, § 5.
3 BANN VÉRITÉ BIBLIK POU GID A NOU
Bann vérité biblik sé bann zansègnman inportan ki gid a nou toultan. Alon prann deu légzanp. 1) « Bann mové frékantasion i gat bann bon zabitud ke nou néna » (1 Korintien 15:33). Se vérité biblik pou gid a nou, i ansègn ke bann domoun èk kisa nou pas in bonpe d’tan i influans a nou an bien ou an mal. 2) « Sak in moun i sèm, sé sak li va rékolté osi » (Galat 6:7). Se vérité biblik pou gid a nou i ansègn ke nou pe pa évit bann konsékans nout bann zaksion.
4 BANN PROFÉSI
In profési lé in mésaj ke Bondieu i donn. I pe èt pou fé konprann son volonté, i pe èt in lansègnman pou ésplik sak lé bien sak lé mal, i pe èt osi in komannman oubien in jujman. Sa i pe èt osi in mésaj ki anons sak va arivé dan lavnir. In bonpe profési la Bib la finn réalizé.
5 BANN PROFÉSI SU LE MÉSI
Sé Jézu la réaliz tout bann profési konsèrnan le Mési. Regard le tablo « Bann profési su le Mési », paj 209.
6 LE PROJÉ JÉOVA POU LA TÈR
Jéova la kré la tèr pou èt in paradi é pou ke bann zumin ki ièm a li i abit desu. Son projé la pa chanjé. I tard pa, li va anlèv la méchansté é li va donn son bann sèrviteur la vi pou toultan.
▸ Chap. 3, § 1.
7 SATAN LE DIAB
Satan sé lanj ke la komans rebèl a li an premié kont Jéova. I apèl a li Satan, ki ve dir « opozan », parske li opoz a li kont Bondieu. I apèl a li osi Diab, ki ve dir « kalomniateur », parske li ramas manteur pou sali réputasion Bondieu é parske li tronp bann domoun.
▸ Chap. 3, § 4.
8 BANN ZANJ
Jéova la kré bann zanj, é lontan aprésa, li la kré la tèr. Bann zanj la été kréé pou viv dann sièl. Néna plus 100 milion d’zanj (Danièl 7:10). Chak lanj néna in non é néna son prop karaktèr. Bann zanj ke lé fidèl Bondieu i mèt pa zot su la oteur : zot i ve pa dutou ke bann zumin i ador a zot. Désèrtin zanj néna bann gran résponsabilité plus ke dot. Bann zanj i gingn diféran travay pou fé, kom sèrv Jéova devan son tronn, port son bann mésaj, protèj é gid son bann sèrviteur su la tèr, aplik son bann jujman oubien donn in kou d’min pou la prédikasion (Psom 34:7 ; Révélasion 14:6 ; 22:8, 9). Pandan la gèr Armagédon, zot va konbat koté Jézu (Révélasion 16:14, 16 ; 19:14, 15).
▸ Chap. 3, § 5 ; chap. 10, § 1.
9 LE PÉCHÉ
In moun i komèt in péché, kan li resan, li pans oubien li fé in nafèr ki plé pa Jéova oubien lé kontrèr son volonté. Le péché i gat nout relasion èk Jéova. Sé pousa, pou évit a nou fé bann zafèr ke li ièm pa, Bondieu la donn a nou bann loi é bann vérité biblik pou gid a nou. Dann premié débu, tout sak Jéova lavé kréé lété parfé. Mé Adan èk Èv la choizi dézobéi a li : zot la péché. Donk, zot la pa rès parfé. Zot la viéyi é zot lé mor. Kom Adan la transmèt a nou le péché, a nou osi nou viéyi é nou mor.
▸ Chap. 3, § 7 ; chap. 5, § 3.
10 ARMAGÉDON
Sé la gèr Bondieu. Se gèr la va détrui le monn Satan é va fé disparèt la méchansté.
▸ Chap. 3, § 13 ; chap. 8, § 18.
11 LE ROIYOM BONDIEU
Sé in gouvèrnman ke Bondieu la mèt an plas dann sièl é ke va dirij la tèr. Jézu Kris lé le Roi se Roiyom la. Jéova va ansèrv se Roiyom pou fé disparèt tout la méchansté.
12 JÉZU KRIS
Jéova la kré Jézu an premié, é aprésa li la kré tout lé zot zafèr. Li la anvoiy Jézu su la tèr pou ke li mor pou bann zumin. Jézu la été tué é aprésa li la été résusité par Jéova. Koméla, li lé Roi dann sièl : li lé Roi dann Roiyom Bondieu.
▸ Chap. 4, § 2.
13 LE PROFÉSI BANN 70 SEMÈN
La Bib lavé anonsé lontan avan, ke le Mési noré arivé la fin in pèryod 69 semèn. Bann 69 semèn la, la komansé dann lané 455 avan Jézu Kris é la fini dann lané 29.
Koman nou koné ke bann 69 semèn la fini dann lané 29 ? Bann 69 semèn la komansé dann lané 455 avan Jézu Kris, kan Néémi la ariv Jéruzalèm é la komans rekonstrui la vil (Danièl 9:25 ; Néémi 2:1, 5-8). Dan in semèn, néna 7 jour. Mé dann profési la, bann semèn i dur pa 7 jour. Néna in fason pou kalkul bann profési : « In jour pou in lané » (Nonm 14:34 ; Ézékièl 4:6). Chak semèn i dur alor 7 lané. É donk 69 semèn i fé 483 lané (69 x 7). Si nou kalkul 483 lané a konté 455 avan Jézu Kris, nou ariv lané 29 (na poin lané zéro). Sé égzakteman lané ousa Jézu la été batizé é ousa li lé devnu le Mési ! (Luk 3:1, 2, 21, 22).
Le mèm profési lavé anonsé ke noré in not semèn an plus, sétadir 7 lané an plus. Pandan se pèryod la, dann lané 33, le Mési i sré tué. É a konté lané 36, la bonn nouvèl Roiyom Bondieu i sré préché dann tout bann nasion, é pa rienk an parmi bann Juif (Danièl 9:24-27).
▸ Chap. 4, § 7.
14 LA TRINITÉ : IN ZAFÈR MANTEUR
Bann relijion ki ansègn la Trinité i di ke Bondieu i form 3 moun an 1 seul : le Pèr, le Garson é léspri sin. Mé la Bib i amont ke Jéova lé le Kréateur é ke li la kré Jézu an premié (Kolosien 1:15, 16). Jézu lé pa Bondieu Toupuisan. Li la jamé di ke li lété égal avèk Bondieu. Olèrksa, li la di : « Mon Papa lé plu gran ke moin » (Jan 14:28 ; 1 Korintien 15:28). Dan la Bib, le mo « Trinité » lé pa ékri okin landroi. La Trinité lé in zafèr manteur.
Léspri sin lé la fors ke Bondieu i ansèrv pou fé in bonpe zafèr, la puisans invizib ke li utiliz pou fé son volonté. Léspri sin lé pa in moun. Bann premié krétien lété « zot tout ranpli èk léspri sin ». É Jéova la di : « Mi sar répann in parti mon léspri su tout kalité domoun » (Akt 2:1-4, 17).
▸ Chap. 4, § 12 ; chap. 15, § 17.
15 LA KROI
Bann vré krétien i ansèrv pa la kroi pou ador Bondieu. Pou kosa ?
Bann fo relijion i ansèrv la kroi depui lontan. Dann tan lontan, bann payin té ansèrv la kroi pou ador la natur ousoi pou zot bann sérémoni séksuèl payin. Apré la mor Jézu, pandan 300 zan, bann krétien té i ansèrv pa la kroi pou ador Bondieu. Aprésa, le gran chèf romin Konstantin la pran la kroi kom sinbol pou reprézant le relijion krétien. Pou kosa ? Sé pou atir plus domoun ankor dan le relijion krétien. Mé la kroi na poin okin rapor èk Jézu Kris. In liv katolik i ésplik ke i trouv la kroi dan bann peup ke té égzis avan Jézu Kris é an parmi bann peup ke lé pa krétien.
Jézu lé pa mor su in kroi. Bann mo grèk ke lé tradui par « kroi » i ve dir « poto », « boi » ousoi « piédboi ». In Bib pou fé létud (The Companion Bible) i di ke, dan le « Nouvo Téstaman » ékri an grèk, la poin rien i fé pansé ke lavé deu morso d’boi. Donk Jézu lé mor su in poto.
Jéova i ve pa ke nou ansèrv bann zimaj oubien bann sinbol pou ador a li (Égzod 20:4, 5 ; 1 Korintien 10:14).
16 LE MÉMORYAL
Jézu la donn lord son bann disip sélèb le Mémoryal son mor. Banna i fé sa tou lé zan, le 14 Nizan, mèm dat ousa bann Zisraélit té i fèt la Pak. Kan néna le Mémoryal, nou fé pasé parmi bann domoun ke lé la, le pin èk le vin : sa i reprézant le kor é le san Jézu. Bann zumin ki sra roi èk Jézu dann sièl i manj le pin é i boir le vin. Bann zumin ke na léspoir viv pou toultan su la tèr i asis èk réspé le Mémoryal, mé zot i manj pa le pin é zot i boir pa le vin.
17 LAM
Dann Traduksion monn nouvo, le mo « lam » lé utilizé pou 1) in moun, 2) in zanimo oubien 3) la vi in moun ou in zanimo.
1) In moun. « Dann lépok Noé, [...] na inn ti pe d’moun, sétadir 8 lam, lété sové parske zot la été transporté su d’lo » (1 Pièr 3:20). Tèrla, le mo « lam » sé bann domoun : Noé, son madam, son 3 garson èk zot madam.
2) In zanimo. Bondieu la di : Ke « do lo » lé ranpli èk bann « zanimo [oubien “bann zam vivan”, dapré la not], é ke bann zanimo volan i vol o desu la tèr ». Bondieu la di osi : « Ke la tèr i produi bann zanimo [oubien “bann zam vivan”, dapré la not] dapré zot léspès : bann zanimo i viv parmi domoun, bann zanimo i ranp é bann zanimo sovaj su la tèr » (Jenèz 1:20, 24).
3) La vi in moun ou in zanimo. Jéova la di èk Moiz : « Tout bann zom ke té i rod tué a ou [oubien “té i rod out lam”, dapré la not] lé mor » (Égzod 4:19). Kan Jézu lété su la tèr, li la di : «Na poin in moun néna in plu gran lamour ke sak i donn son vi [oubien son “lam”, dapré la not] pou son bann kamarad. » (Jan 15:13).
An plus ke sa, kan kèlkin i fé in nafèr « èk son lam an antié », li fé sa èk in keur antié é li ansèrv tout son kapasité pou fé sa (Matieu 22:37 ; Detéronom 6:5). La Bib i parl osi din mor ou le kor in moun mor kom in « lam ke lé mor » (Nonm 6:6, dapré la not ; Ajé 2:13, dapré la not).
▸ Chap. 6, § 5 ; chap. 13, § 10 ; chap. 15, § 17.
18 LÉSPRI
Dann Traduksion monn nouvo, bann mo ébreu é grèk tradui par « léspri » i pe èt in paké d’zafèr. Mé toultan sa i ve dir ke sé kékchoz ke nou voi pa, kom le van, la réspirasion in moun oubien sak in zanimo. Bann mo la, i pe aplik osi pou bann zanj oubien pou léspri sin, sétadir la fors Bondieu ki aji. La Bib i ansègn pa ke, kan in moun i mor, in nafèr i sort dan son kor pou kontinué viv (Égzod 35:21 ; Psom 104:29 ; Matieu 12:43 ; Luk 11:13).
▸ Chap. 6, § 5 ; chap. 15, § 17.
19 LA JÉÈN
A koté Jéruzalèm, lavé in landroi té i apèl Jéèn, ousa té i brul é té i détrui la salté. Na poin rien i prouv ke dann tan Jézu, bann zanimo ou bann zumin lété torturé ou sinonsa brulé vivan dann landroi la. Donk la jéèn i reprézant pa in landroi invizib ousa bann mor i sré torturé é brulé pou toultan. Kan Jézu la di ke désèrtin i sré jeté dan la jéèn, li té ve dir ke bann moun la, i sré détrui pou toultan (Matieu 5:22 ; 10:28).
20 LE NOTRE PÈR
Sé in priyèr ke Jézu la donn son bann disip kom in légzanp, pou aprann banna koman priyé. I apèl sa osi la priyèr modèl. Jézu la aprann a nou priyé se fason la :
« Ke out non lé sanktifié »
Nou pri pou ke Jéova i lav son non, sétadir son réputasion, par rapor tout bann zafèr manteur ke la sali son non. Nou pri osi pou ke toulmonn dann sièl é su la tèr i donn loneur son non.
« Ke out roiyom i vien »
Nou pri pou ke gouvèrnman Bondieu i détrui le monn Satan, pou ke li dirij la tèr é pou ke li chanj la tèr an paradi.
« Ke out volonté lé fé [...] su la tèr »
Nou pri pou ke projé Bondieu pou la tèr i réaliz. Bondieu i ve ke bann zumin ki obéi a li, i devien parfé é i viv pou toultan dann Paradi. Kan li la kré bann zumin, sé sa mèm li té i ve.
▸ Chap. 8, § 2.
21 LA RANSON
Jéova la pèy la ranson pou sov bann zumin le péché èk la mor. La ranson lété le pri ke lavé bezoin péyé pou rachèt la vi parfé bann zumin ke Adan, le premié om lavé pèrd. Se ranson la, noré pèrmèt osi bann zumin retrouv in bon relasion èk Jéova. Bondieu la anvoiy Jézu su la tèr pou ke li donn son vi pou tout bann pécheur. Gras son mor, bann zumin i poura viv pou toultan é devnir parfé.
▸ Chap. 8, § 21 ; chap. 9, § 13.
22 POU KOSA 1914 LÉ IN LANÉ TÈLMAN INPORTAN ?
Dapré le profési dann Danièl chapit 4, Bondieu té sar mèt an plas son Roiyom an 1914.
Le profési : Dann in rèv, Jéova la févoir le roi Nabukodonozor in gran piédboi antrèn èt koupé. Son chiko d’boi lété antouré èk in sintur an fèr é in sintur an kuiv pou ke li arpous pa pandan « 7 tan ». Mé apré se pèryod la, li té sar arpousé (Danièl 4:1, 10-16).
Sak le profési i ve dir : Le piédboi i reprézant dominasion Bondieu. Pandan in bonpe d’zané, Jéova la ansèrv bann roi Jéruzalèm pou dirij le peup Israèl (1 Kronik 29:23). Mé bann roi la, la pa gard zot fidélité pou Bondieu é zot dominasion la arèt nèt. Jéruzalèm la été détrui dann lané 607 avan Jézu Kris. Sé lané la ke bann « 7 tan » la komansé (2 Roi 25:1, 8-10 ; Ézékièl 21:25-27). Kan Jézu la di ke Jéruzalèm i sré « ékrazé par bann nasion juskatank le tan ke la donn bann nasion lé fini », li té i parl pou bann « 7 tan » (Luk 21:24). Donk, kan Jézu lété su la tèr, bann « 7 tan » lété pa ankor fini. Jéova lavé promèt ke li va mèt in roi a la fin bann « 7 tan ». La dominasion Jézu, an tank nouvo Roi té sar aport bann gran bénédiksion pou bann sèrviteur Bondieu su la tèr, bann bénédiksion pou toultan (Luk 1:30-33).
Konbien d’tan i dur bann « 7 tan » : Bann « 7 tan » la dur 2 520 lané. Si nou kalkul 2 520 lané a konté lané 607 avan Jézu Kris, nou ariv lané 1914 (na poin lané zéro). Sé lané ousa Jéova la mèt Jézu Kris Roi son Roiyom dann sièl.
Koman nou koné ke bann « 7 tan » la dur 2 520 lané ? La Bib i di ke 3 tan é demi i fé 1 260 jour (Révélasion 12:6, 14). « 7 tan », lé 2 foi plus, sétadir 2 520 jour. Néna in fason pou kalkul bann profési : « In jour pou in lané. » Donk 2 520 jour i fé 2 520 lané (Nonm 14:34 ; Ézékièl 4:6).
23 LARKANJ MICHÈL
Le mo « larkanj » i ve dir « chèf bann zanj ». La Bib i parl in seul larkanj : Michèl (Danièl 12:1 ; Jud 9).
Michèl lé le chèf larmé Bondieu, ousa néna bann zanj fidèl. Révélasion 12:7 i di : « Michèl é son bann zanj la konbat le dragon [...] é son bann zanj. » Le liv Révélasion i di osi ke Jézu lé le chèf larmé Bondieu. Donk, Michèl lé in not non ke Jézu i port (Révélasion 19:14-16).
24 BANN DÈRNIÉ JOUR
Bann dèrnié jour sé le pèryod avan la déstruksion le monn Satan par le Roiyom Bondieu. La Bib lavé anonsé ke, pandan se pèryod la, bann zévènman inportan va arivé su la tèr. Dot mo, kom « la fin se monn la » é « la prézans le Garson lom », sé le mèm pèryod (Matieu 24:3, 27, 37). Bann « dèrnié jour » la komansé an 1914, kan la mèt an plas Roiyom Bondieu dann sièl. Bann dèrnié jour la, va arété kan le monn Satan sra détrui pandan Armagédon (2 Timoté 3:1 ; 2 Pièr 3:3).
▸ Chap. 9, § 2.
25 LA RÉZURÉKSION
Kan in moun lé résusité, sé Bondieu ki fé reviv a li. La Bib i rakont koman 9 moun la été résusité. Éli, Élizé, Jézu, Pièr é Pol la résusit bann domoun. Zot la gingn fé bann mirak la rienk parske Bondieu la donn a zot le pouvoir pou fé sa. Jéova i promèt ke li va résusit su la tèr « bann moun jus » é « bann moun injus » (Akt 24:15). La Bib i parl osi in rézuréksion dann sièl. Désèrtin zumin choizi par Bondieu lé résusité pou viv dann sièl èk Jézu (Jan 5:28, 29 ; 11:25 ; Filipien 3:11 ; Révélasion 20:5, 6).
26 RANT AN KONTAK ÈK BANN ZÉSPRI
Rant an kontak èk bann zéspri, sé ésèy kontak bann démon, dirèkteman ousoi par le moiyin in not moun, par égzanp in sorsié ou in devineur. Sé in nafèr ke lé mové. Bann domoun ki rant an kontak èk bann démon i kroi in zafèr manteur : zot i kroi ke, kan in moun i mor, son lam i rès vivan é i devien in léspri puisan. Bann démon i pous bann zumin dézobéi Bondieu. Lastroloji, alé voir devineur, la maji, la sorsèlri, bann supèrstision, kontak èk le monn invizib é bann zafèr surnaturèl lé an lien èk bann mové zéspri. Bann zoroskop, é in bonpe liv, magazinn, fim, postèr é mèm bann muzik, i fé parèt bann démon, la maji oubien le surnaturèl kom bann zafèr san danjé ou i fé ri domoun. In bonpe zafèr ke lé fé pou bann mor lé an lien èk bann démon (par égzanp : bann sakrifis pou bann mor, bann fèt pou bann mor, bann zanivèrsèr pou le mor, bann sérémoni pou bann veuv ou la véyé). Souvandéfoi, bann domoun ki ve ansèrv le pouvoir bann démon i drog a zot (Galat 5:20, 21 ; Révélasion 21:8).
▸ Chap. 10, § 10 ; chap. 16, § 4.
27 GRAN DOMINASION JÉOVA
Jéova lé le Bondieu Toupuisan. Li la kré lunivèr an antié (Révélasion 15:3). Tout zafèr i apartien a li. Li néna in gran dominasion, sétadir le plu gran lotorité, é li na le droi rénié su son kréasion (Psom 24:1 ; Izai 40:21-23 ; Révélasion 4:11). Li la mèt an plas bann loi pou tout zafèr li la kréé. Li na osi lotorité pou mèt an plas bann dirijan. Nou aport nout soutien pou le gran dominasion Bondieu kan nou mont ke nou ièm a li é kan nou obéi a li (1 Kronik 29:11).
28 LAVORTMAN
Fé lavortman sé kan in madam i tir son zanfan é donk li tué le ti bébé ke lé ankor dan son vant. Sa lé pa in laksidan, é sa lé pa non plu akoz in fos kouch. Kan in madam i tonm ansint, son ti bébé lé pa jus in parti son kor : li lé in moun.
29 TRANSFUZION LE SAN
Sa lé in téknik utilizé par bann dokteur pou mèt le san oubien inn parmi lé kat konpozan le san dan le kor in moun. Fé transfuzion sé kan i mèt dan le kor in moun, son prop san ke la été ramasé in koté, oubien le san kèlkin dot. Bann kat konpozan inportan ke néna dan le san sé le plasma, bann globul rouj, bann globul blan é bann plakèt.
30 KAN NOU LÉ KORIJÉ
Dan la Bib, « korijé » lé pa rienk puni. Kan nou lé korijé, nou lé ansénié é formé. Kan Jéova i korij in moun, lé jamé pou fé le mal oubien pou èt kruèl (Provèrb 4:1, 2). Li lé vréman in bon légzanp pou bann paran. Son fason korijé lé tèlman éfikas, ke i pouré arivé ke in moun i ièm èt korijé (Provèrb 12:1). Jéova i ièm son bann sèrviteur é li éduk a zot. Li ansègn a zot koman korij zot mové fason voir lé choz é li aprann a zot koman pansé é aji kom li. Pou bann paran, korij in marmay, sé èd a li osi konprann pou kosa li doi obéi. Sé an mèm tan aprann a li èm Jéova, aprann a li èm son Parol, la Bib, é èd a li konprann son bann vérité biblik ke lé la pou gid a nou.
31 BANN DÉMON
Bann démon lé bann zéspri invizib ke na in gran puisans par rapor bann zumin. Sé bann zanj mové. Kan zot la dézobéi Bondieu, zot lé devnu mové (Jenèz 6:2 ; Jud 6). Alor, zot lé devnu son bann zènmi. Zot la rojouèn Satan kan li la rebèl kont Jéova (Detéronom 32:17 ; Luk 8:30 ; Akt 16:16 ; Jak 2:19).