LESON 06
Koman la vi la komansé ?
« Le komansman la vi i sort koté » Bondieu (Psom 36:9). Èske ou kroi sa ? Désèrtin i pans ke la vi la ariv par azar. Si sa lé vré, i ve dir ke nou osi nou la ariv komsa. Parkont, si sé Bondieu la kré la vi, lé sur, la vi na in sansa. Dann leson la, ou va voir dapré la Bib, koman la vi la komansé, é poukosa lé rézonab kroir sa.
1. Koman lunivèr la komansé ?
La Bib i di : « O komansman, Bondieu la kré le sièl èk la tèr » (Jenèz 1:1). Prèske tout bann siantifik lé dakor pou di ke lunivèr lavé in komansman. Koman Bondieu la kré sa ? Li la ansèrv son « fors ki aji », sétadir son léspri sin, pou fé tout sak i égzis dan lunivèr : bann galaksi, bann zétoil, bann planèt, é dot choz ankor (Jenèz 1:2).
2. Poukosa Bondieu la kré la tèr ?
Jéova ‘la pa kré la tèr pou rien, mé la fé ali pou ke i abit desu’ (Izai 45:18). Li la fé nout planèt pou ke bann zumin i viv bien desu, é pou toultan (lir Izai 40:28 é 42:5). La sians i fémont ke na poin 2 kom la tèr. Sé le seul planèt ousa néna tout sak i fo pou ke bann zumin i gingn viv.
3. Kosa i fé ke bann zumin lé pa parèy bann zanimo ?
Kan li té finn fé la tèr, Jéova la kré la vi desu. An premié, li la mèt in bonpe plant èk zanimo su la tèr. Aprésa, li ‘la kré lom a son resanblans’ (lir Jenèz 1:27). Poukosa bann zumin lé unik ? Sé parske nou lé fé kom Bondieu, sa i ve dir ke nou pe fémont son bann kalité, kom lamour èk la justis. Bondieu la kré anou osi èk la kapasité pou aprann bann lang, pou aprésié sak nou lé kapab fé, é la muzik. É nou lé pa parèy bann zanimo, nou gingn ador nout Kréateur.
ALON APRANN PLUS
Alon voir bann preuv ki mont ke la vi la été kréé, é ke nou pe kroir sak la Bib i di su la kréasion. Alon gard osi kosa bann kalité ke bann zumin néna, i aprann anou su Bondieu.
4. La vi la été kréé
Kan in moun i fabrik in nafèr ki resanm sak nou voi dan la natur, souvandéfoi i donn ali loneur pousa. Mé kisa i fo donn loneur pou avoir fé sa an premié ? Gard le VIDÉO é koz su le késtion ki vien apré.
Kosa bann zumin la invanté, lé kopié su sak i trouv dan la natur ?
Lé sur, in kaz lé pansé é lé konstrui par in moun. Mé kisa la majiné é la konstrui tout sak i trouv dan la natur ? Lir Ébreu 3:4 é koz su bann késtion la :
Kosa i mark aou le plus dan la natur ?
Èske lé lojik kroir ke sé in moun la fé lunivèr é tout sak néna dedan ? Akoz ou di sa ?
Ou té koné sa ou ?
Su jw.org, ou va trouv bann zartik é bann vidéo su sujé la dan bann parti « Évolution ou conception ? » é « Points de vue sur l’origine de la vie ».
« Tout kaz lé konstrui par kèlkin, é sak la konstrui tout zafèr, sé Bondieu. »
5. I pe kroir sak la Bib i di su la kréasion
Dann Jenèz chapit 1, la Bib i ésplik koman la tèr la aparèt é koman la vi la komansé. Èske nou pe kroir sak lé di, oubien sé rienk in zistoir manteur ? Gard le VIDÉO é koz su bann késtion ki vien apré.
Èske la Bib i ansègn ke la tèr é la vi la été kréé an 6 jour ki fé 24 eur chakèn ?
Èske ou pans ke sak la Bib i di lé lojik, é èske i pe kroir sa ? Akoz ou di sa ?
Lir Jenèz 1:1 é koz su késtion la :
Bann siantifik i di ke lunivèr lavé in komansman. Èske sak ou vièn lir dan la Bib, i akord èk sak banna la fini par di la d’su ?
Désèrtin i demann azot si Bondieu la ansèrv lévolusion pou kré la vi. Lir Jenèz 1:21, 25, 27 é koz su bann késtion la :
Èske la Bib i ansègn ke Bondieu la kré in form la vi sinp, apré li la lès sa évolué an poison, an mamifèr é an zumin ? Oubien èske li ansègn ke Bondieu la kré tout bann gran group « léspès » vivan ?
6. Bann zumin lé in kréasion Bondieu ke lé unik
Jéova la kré anou avèk bann kapasité ki rann anou diféran bann zanimo. Lir Jenèz 1:26 é koz su késtion la :
Nou néna la kapasité pou donn lamour é fémont la pitié. Kom nou lé fé a la resanblans Bondieu, kosa sa i fémont anou su son pèrsonalité ?
NADFOI DOMOUN I DI : « Sak la Bib i di su la kréasion, sé in zistoir manteur sa. »
Kosa ou pans ou ? Akoz ou di sa ?
SAK NOU LA APRANN
Jéova la kré lunivèr é tout kalité la vi.
Alon révizé
Kosa la Bib i ansègn su le komansman lunivèr ?
Èske Bondieu la lès évolué tout bann léspès vivan apartir in form la vi sinp, oubien sé li la kré tout ?
Poukosa bann zumin lé in kréasion vréman pa kom lé zot ?
GARD SA OSI
Bann zégzanp ki fémont bien ke la natur lavé in kréateur.
« Qu’enseigne la nature ? » (Réveillez-vous !, septembre 2006)
In papa i ésplik son p’ti garson sak la Bib i di su la kréasion.
Èske lévolusion i akord avèk sak la Bib i di ?
« Èske Bondieu la ansèrv lévolusion pou kréé tout kalité zéspès vivan ? » (lartik jw.org)
Èske bann fosil oubien bann léspèryans siantifik i mont ke la vi la été kréé oubien ke li la ariv par azar ?