La vérité su bann zanj

Dann sièl, Jéova néna in gran fami. Bann zanj i fé parti fami la. La Bib i apèl azot « bann garson Bondieu » (Job 38:7). Kosa la Bib i aprann anou su bann zanj ? Kèl linfluans banna néna su bann zumin ? Èske tout bann zanj i fé parti la fami Bondieu ?

1. Kisa i lé bann zanj ?

Jéova la kré bann zanj avan kré la tèr. Kom Jéova, zot lé bann zéspri invizib ki viv dann sièl (Ébreu 1:14). Néna bann zanj par milion, é chakèn néna son pèrsonalité (Révélasion 5:11). Zot i ‘obéi Jéova é zot i mèt an pratik son parol’ (Psom 103:20). Dann tan lontan, nadfoi Jéova la anvoiy bann zanj, pou donn bann mésaj son bann sèrviteur oubien pou port azot sekour. Zordi, bann zanj i gid bann disip Jézu vèr bann domoun ki ve konèt Bondieu.

2. Kisa i lé Satan é bann démon ?

Désèrtin zanj la pa rès fidèl Jéova. Le premié lanj ke la rebèl ali, sé « sak i apèl Diab é Satan, ki tronp le monn an antié » (Révélasion 12:9). Kom li té ve atoupri dominé, Satan la pous bann premié zumin é aprésa bann zanj dézobéi Jéova. I apèl se bann zanj dézobéisan « bann démon ». Jéova la fé poursuiv azot. Zot la kit le sièl. Asteur, zot lé dann zalantour la tèr, é zot i tard pa pou èt détrui (lir Révélasion 12:9, 12).

3. Koman Satan é bann démon i tronp bann zumin ?

Satan é bann démon i tronp in bonpe domoun avèk le spiritism. Le spiritism, sé tout bann moiyin ki égzis, pou rant an kontak avèk bann zéspri. Par égzanp, in bonpe d’moun i gard loroskop, i sar voir bann zastrolog, bann voiyan, bann gériseur oubien bann sorsié. Désèrtin i fé soign azot, avèk bann téknik ke na in rapor èk le spiritism. Dot ankor i kroi ke lé posib koz èk bann mor. Mé Jéova i donn anou komannman la : « Alé pa voir bann médiom é intéroj pa sak i prédi lavnir » (Lévitik 19:31). Li donn anou se lavèrtisman pou protèj anou. Satan é bann démon lé bann zènmi Bondieu, é zot i rod fé anou le mal.

ALON APRANN PLUS

4. Bann zanj i èd sak i ve konèt Jéova

Bann zanj i prèch pa dirèkteman. Mé zot i èd sak i prèch, pou trouv domoun ki ve konèt Bondieu. Lir Révélasion 14:6, 7 é koz su bann késtion la :

• Poukosa nou la bezoin lèd bann zanj kan nou prèch ?

• Bann zanj i pe gid aou vèr domoun ke la bezoin konèt le mésaj la Bib. Èske ou trouv sa ankourajan ? Poukosa ?

5. Rejèt le spiritism

Satan é bann démon lé bann zènmi Jéova. Donk zot lé osi nout bann zènmi. Lir Luk 9:38-42 é koz su késtion la :

• Koman bann démon i aji èk bann zumin ?

Nou ve pa lès bann démon influans anou. Lir Detéronom 18:10-12 é koz su bann késtion la :

• Koman bann démon i ésèy rant an kontak èk nou oubien influans anou ? Kèl pratik ke na in rapor èk le spiritism ou koné ?

• Èske ou trouv rézonab ke Jéova i intèrdi tout bann pratik la ?

Gard le VIDÉO é koz su bann késtion ki vien apré.

VIDÉO : « Opoz azot kont le Diab » (5:02)

• Èske ou pans ke le garanti ke le ti bébé Palesa lavé, té poz in problèm ? Poukosa ?

• Kosa Palesa la fé pou protèj azot kont bann démon ?

Bann vré krétien la toujour opoz azot kont bann démon. Lir Akt 19:19 é 1 Korintien 10:21 é koz su késtion la :

• Si ou néna in nafèr ke na in rapor avèk le spiritism, akoz lé inportan détrui sa ?

6. Ou pe gingn le batay kont Satan é bann démon

Satan lé le chèf bann démon. Mé Michèl, le chèf bann zanj sétadir Jézu, lé le chèf bann zanj fidèl. Èske Michèl, le chèf bann zanj lé puisan ? Lir Révélasion 12:7-9 é koz su bann késtion la :

• Kisa lé plu for ? Michèl é son bann zanj, oubien Satan é son bann démon ?

• Dapré ou, èske bann disip Jézu té doi avoir peur Satan é bann démon ?

Ou pe gingn le batay kont Satan é bann démon. Lir Jak 4:7 é koz su késtion la :

• Koman ou pe sobat kont linfluans Satan é bann démon ?

SAK NOU LA APRANN

Bann zanj fidèl i èd anou. Satan é bann démon lé bann zènmi Jéova é zot i utiliz le spiritism pou tronp bann zumin.

Alon révizé

• Koman bann zanj i èd bann domoun ki ve konèt Bondieu ?

• Kosa la Bib i di su Satan é bann démon ?

• Poukosa ou lé bien désidé rejèt le spiritism ?

GARD SA OSI

Poukosa nou pe di, ke Michèl le chèf bann zanj, sé Jézu ?

« Qui est l’archange Michel ? » (lartik jw.org)

Èske le Diab lé jus sak lé mové dan chak moun ?

« Le Diable : principe du mal ou personne réelle ? » (lartik jw.org)

Koman in madam la libèr aèl linfluans bann démon ?

« Elle a trouvé un but dans la vie » (La Tour de Garde, 1^er juillet 1993)

Koman Satan i utiliz le spiritism pou tronp bann zumin ?

« La vérité sur la magie et la sorcellerie » (La route qui mène à la vie éternelle, section 5)