Èske tout bann fèt i fé plézir Bondieu ?

Jéova i ve ke nou profit la vi é ke nou néna bann moman pou amuz anou. Mé èske tout bann fèt i fé plézir ali ? Koman nou pe fémont nout lamour pou Jéova dann domèn la ?

1. Poukosa in bonpe fèt i fé pa plézir Jéova ?

Ou sra petèt étoné aprann ke in bonpe fèt lé kont bann zansègnman la Bib oubien i sort dan bann fo relijion. Désèrtin néna in rapor avèk le spiritism oubien le lidé ke lam lé imortèl. Dot lé bazé su supèrstision oubien la chans (Izai 65:11). Donk nou konpran poukosa Jéova i donn se lavèrtisman la son bann zadorateur : « Sépar azot [...] é touch pu le zafèr souyéa » (2 Korintien 6:17).

2. Koman Jéova i konsidèr bann fèt ke i donn loneur bann zumin in mové fason ?

Jéova i di anou ke lé danjereu fé « konfians bann sinp zumin » (lir Jérémi 17:5). Désèrtin fèt i onor bann zom politik oubien bann solda. Dot i mèt an lèr bann sinbol le péi oubien lindépandans in péi (1 Jan 5:21). Dot ankor i donn loneur bann mouvman politik oubien dot rasanbleman. Kosa Jéova i resan si nou donn loneur in mové fason in moun oubien in lorganizasion, surtou si li sar kont projé Jéova ?

3. Kèl fason d’fé i rann in fèt pa bon ?

La Bib i kondann ‘kan i boi tro, bann fèt san limit é kan i boi sou’ (1 Pièr 4:3). Dann detroi fèt, domoun i kontrol pu zot oubien i fé bann péché séksuèl. Pou rès kamarad ansanm Jéova, i fo rès loin tousa bann zafèr sal la.

ALON APRANN PLUS

4. Rejèt bann fèt ki fé pa plézir Jéova

Lir Éfézien 5:10 é koz su bann késtion la :

• Kosa i fo vérifié avan partisip in fèt ou pa ?

• Kèl fèt domoun i fé koté ousa ou abit ?

• Dapré ou, èske bann fèt la i fé plézir Jéova ?

Par égzanp, èske ou la finn demann aou kosa Jéova i pans su bann zanivèrsèr nésans ? Dan la Bib, néna okin zistoir ousa in ladorateur Jéova i fèt son lanivèrsèr. Parkont, li rakont lanivèrsèr 2 moun ke té ador pa Jéova. Lir Jenèz 40:20-22 é Matieu 14:6-10 é koz su bann késtion la :

• Kosa lé parèy dann 2 lanivèrsèr la ?

• Dapré ou, kosa bann zistoir la i aprann anou su le fason Jéova i konsidèr bann zanivèrsèr ?

Mé petèt ou demann aou : « Èske pou Jéova lé vréman grav partisip in lanivèrsèr oubien in not fèt ke lé kont bann zansègnman la Bib ? » Lir Égzod 32:1-8. Aprésa, gard le VIDÉO é koz su bann késtion ki vien apré.

VIDÉO : Bann fèt é bann koutum ke Bondieu i aksèp pa (5:07)

• Poukosa lé inportan vérifié si in fèt i fé plézir Jéova ?

• Koman nou pe fé sa ?

Koman konèt si in fèt i fé plézir Bondieu

• Èske li lé bazé su bann zidé ke lé kont la Bib ? Pou konèt sa, rod ousa li sort.

• Èske li donn loneur in mové fason bann zumin, bann lorganizasion oubien bann sinbol in péi ? Sé surtou Jéova ke nou onor, é sé li ke nou fé konfians pou règ bann problèm le monn.

• Èske li na in rapor avèk bann konportman ke lé kont bann zansègnman biblik ? Nou doi rès moralman pur.

5. Èd lé zot réspèk out bann kroiyans

VIDÉO : Ésplik out bann kroiyans èk jantiyès (2:01)

Lir Matieu 7:12 é koz su bann késtion la :

• Dapré prinsip la, èske ou doi di out fami ke lé pa Témoin fé pa tèl ou tèl fèt ?

• Koman rasur out fami, é èd azot konprann ke, mèm si ou fé pu désèrtin fèt ansanm zot, ou ièm azot toujour ?

6. Jéova i ve ke nou lé ereu

Jéova i ve ke nou pas bann bon moman avèk nout fami é nout bann kamarad. Lir Éklézias 8:15 é koz su késtion la :

• Koman vèrsé la i mont ke Jéova i ve ke nou lé ereu ?

Jéova i ve ke son bann zadorateur i amuz azot é i pas bann bon moman ansanm. Gard le VIDÉO ki mont bien sa dan bann lasanblé intèrnasional.

VIDÉO : In lakeuy ki oubli pa pandan bann lasanblé intèrnasional (5:40)

Lir Galat 6:10 é koz su bann késtion la :

• Èske i fo atoupri partisip bann fèt ke tout domoun i fé, pou fé du bien lé zot ?

• Kosa i rann aou plus ereu : donn in kado parske in fèt i oblij aou, oubien donn in kado parske ou la anvi ?

• Bonpe Témoin i organiz bann fèt pou zot marmay é zot i oubli pa fé surpriz é donn kado. Si ou na marmay, koman ou pe fé plézir azot ?

SAK NOU LA APRANN

Jéova i ve ke nou pas bann bon moman avèk nout fami é nout bann kamarad. Mé li ve osi ke nou rejèt bann fèt ke li ièm pa.

Alon révizé

• Kèl késtion i pe èd anou konèt si in fèt i fé plézir Jéova ?

• Koman nou pe èd nout fami é nout bann kamarad konprann nout bann désizion par rapor désèrtin fèt ?

• Koman nou koné ke Jéova i ve nou lé ereu é nou amuz anou ?

GARD SA OSI

Bann fèt ke bann krétien i fé pa.

« Pourquoi les Témoins de Jéhovah ne célèbrent-ils pas certaines fêtes ? » (lartik jw.org)

4 rézon ki mont poukosa Bondieu i ièm pa bann zanivèrsèr nésans.

« Pourquoi les Témoins de Jéhovah ne fêtent pas les anniversaires de naissance ? » (lartik jw.org)

Koman in marmay k’i èm Jéova i réaji kan i invit ali pou in fèt ?

Ou néna la valèr pou Jéova (11:35)

Bann krétien par milion i choizi pa fèt Noèl. Koman zot i viv sa ?

« Ils ont trouvé mieux » (La Tour de Garde, 1^er décembre 2012)