Le poin d’vu Bondieu su la propté é la purté

Kan in momon i prépar son ti garson pou alé lékol, li fé atansion ke son zanfan lé prop é ke son linj lé bien ranjé ; li koné ke sa lé bon pou la santé son zanfan. Kan in zanfan lé prop sa i mont osi ke son bann paran i okup bien d’li. Lé parèy, pou nout Papa dann sièl la propté é la purté lé inportan. Kan nou lé prop é pur, nou fé ansort ke nou néna in bon santé fizik é moral, é nou onor Jéova.

1. Kosa i ve dir èt prop ?

Jéova i donn anou komannman la : « Zot i doi èt sin » (1 Pièr 1:16). Èt sin, sé èt pur dan le domèn moral, mé osi èt prop. É èt prop, sé lav anou, port bann linj prop é bien aranjé é nétoiy nout kaz, nout loto, nout jardin… Chakèn i pe osi partisip pou nétoiy la sal du Roiyom. Kan nou lé prop, nou onor Jéova (2 Korintien 6:3, 4).

2. Pou èt pur, kosa i fo nou rejèt ?

La Bib i di bien : « Alon rann anou pur de tout sak i sali la chèr èk léspri » (2 Korintien 7:1). Sa i ve dir ke nou doi rejèt tout sak i pe fé mal anou dann domèn fizik, moral é mantal. Pou ke nout bann pansé i fé plézir Jéova, nou doi atoupri tir dan nout tèt sak lé pa bon dutou (Psom 104:34). Nou doi osi survèy nout manièr kozé (lir Kolosien 3:8).

Kosa i pe rann anou sal ? Bann zafèr, kom sigarèt oubien la drog, lé pa bon pou nout kor é nout léspri. Sak i fum pa é i drog pa zot, na in méyeur santé é zot i mont ke zot i réspèk la vi. Èt moralman pur i ve dir osi, sobat kont bann mové labitud kom la masturbasion oubien regard la pornografi (Psom 119:37 ; Éfézien 5:5). Lé pa fasil rejèt bann pratik sal la, mé nou pe kont su Jéova pou èd anou (lir Izai 41:13).

ALON APRANN PLUS

3. La propté i onor Jéova

Bann komannman ke Jéova la donn la nasion Israèl i fé konprann sak li pans su la propté. Lir Égzod 19:10 é 30:17-19 é koz su bann késtion la :

• Kosa bann vèrsé la i aprann anou su le fason Jéova i konsidèr la propté ?

• Kosa i fo fé toultan pou èt in moun prop ?

I demann le tan é zéfor pou èt prop é nétoiy son bann zafèr. Mé sa lé posib kinport nout bann moiyin oubien landroi ousa nou viv. Gard le VIDÉO é koz su késtion la.

VIDÉO : Bondieu i ièm ke nou lé prop (4:10)

• Kan nou lé prop é bien aranjé, kosa domoun va di kan nou prèch èk zot ?

4. Rejèt bann zabitud ke lé sal

In moun i fum oubien i drog ali, i koné ke lé difisil arété. Si sé out ka, réfléchi bann konsékans ke se mové labitud la, néna su out vi. Lir Matieu 22:37-39 é koz su bann késtion la : Si in moun i fum oubien i drog ali, kèl léfé sa néna...

• su son lamitié èk Jéova ?

• su son fami é son lantouraj ?

Mèt an plas in plana. Gard le VIDÉO.

VIDÉO : Koman kultiv la kapasité pou kontrol anou ? (2:47)

Lir Filipien 4:13 é koz su késtion la :

• Kan nou sobat kont in mové labitud, koman la priyèr, létud la Bib é bann rénion lasanblé i pe èd anou ?

5. Koman sobat kont bann mové pansé é pratik ke lé sal

Lir Kolosien 3:5 é koz su bann késtion la :

• Poukosa nou pe di ke la pornografi, bann mésaj séksuèl é la masturbasion, lé bann zafèr ke lé sal pou Jéova ?

• Èske Jéova lé tro dur kan li demann anou èt pur dan le domèn moral ? Poukosa ?

Lé posib sobat kont bann pansé ke lé sal. Gard le VIDÉO.

VIDÉO : Pou rès pur, i fo ou aji (1:51)

Pou mont sak i fo fé pou rès moralman pur, Jézu la utiliz in légzanp. Lir Matieu 5:29, 30 é koz su késtion la :

• Jézu té ve pa di ki fo fé mal anou fizikman, mé pluto ki fo èt bien désidé pou aji. Kosa nou pe fé pou anlèv bann pansé ke lé sal dan nout lésprib ?

Si ou sobat kont bann pansé ke lé sal, i fo ou lé sur ke Jéova i voi out bann zéfor. Lir Psom 103:13, 14 é koz su késtion la :

• Si ou sobat kont in konportman ke lé sal, koman bann vèrsé la i pe ankouraj aou kontinué out bann zéfor ?

Tonbé ! Lévé !

« Kom mi ariv pa, vo mieu mi larg tout ! » Souvan sé sak i retonm i di sa. Mé alon pran légzanp in moun i kour. Sé pa parske son pié la mayé é ke li la tonm atèr, ke lé sur li la pèrd la kours oubien ke li doi retourn depui le dépar. Lé parèy, tonbé i ve pa dir ke ou la pèrd tout. Sa i ve pa dir osi, ke i éfas tout bann progré ke nou la finn fé. I ariv tout domoun retonbé. É souvan sa i èd pou avansé dan la vi. Alor, tienbo larg pa ! Avèk lèd Jéova, ou va gingn niabout out mové labitud.

SAK NOU LA APRANN

Kan nou lé prop é kan nou néna bann pansé ke lé pur, nou onor Jéova.

Alon révizé

• Poukosa la propté é la purté lé vréman inportan ?

• Kosa i ve dir èt prop ?

• Kosa i ve dir avoir bann pansé é in konportman ke lé pur ?

GARD SA OSI

Sak nou pe fé pou èt prop mèm si nou na poin tro moiyin.

Santé é propté : Lav la min (3:01)

Bann konsèy pratik pou arèt fum sigarèt.

« Comment arrêter de fumer » (Réveillez-vous !, mai 2010)

Bann grav léfé la pornografi.

« La pornographie : inoffensive ou dangereuse ? » (La Tour de Garde, 1^er août 2013)

Sak in mesieu la fé pou sobat kont son mové labitud gard la pornografi.

« J’ai échoué bien des fois avant de réussir » (La Tour de Garde n^o 4 2016)