Èske le monn la va disparèt ?

Kom zot i koné petèt, la Bib i koz su la fin le monn (1 Jan 2:17). Èske i fo konprann par la, ke bann zumin va disparèt ? Èske la tèr va ni in planèt ousa nora pu la vi, oubien tout i sra détrui ?

POU 2 KÉSTION LA, LA BIB I DI NON !

Sak va pa disparèt

BANN ZUMIN

Sak la Bib i di : Bondieu ‘la pa kré la tèr pou rien, mé la fé ali pou ke i abit desu’ (IZAI 45:18).

In gran létan o milieu bann montagn é otour néna in foré.

NOUT PLANÈT

Sak la Bib i di : « In jénérasion i sa va é in jénérasion i ariv, mé la tèr i rès pou toultan » (ÉKLÉZIAS 1:4).

LÉSPLIKASION : Dapré la Bib, la tèr i sra jamé détrui é li sra toultan abité. Alor, kosa i fo konprann par la « fin le monn » ?

RÉFLÉCHI LADSU : La Bib i konpar la fin le monn ke va arivé, a sak la éspasé dann tan Noé. Dann tan la, la tèr lété « ranpli èk la violans » (Jenèz 6:13). Noé li, lété in om jus. Donk, Bondieu la lès viv Noé èk son fami, mé li la détrui bann mové moun dann in déluj. Dapré sak la éspasé, la Bib i di : « Le monn dann tan la lété détrui, kouvèr èk de lo » (2 Pièr 3:6). In monn la vréman disparèt. Mé, kosa la été détrui ? Sé pa la tèr, mé bann mové moun ke té viv su la tèr. Dukou, kan la Bib i koz su la fin le monn, li di pa ke la planèt i sra détrui. Li di ke bann mové moun, ki abit desu la tèr va èt détrui é osi tout sak zot la mèt an plas.

Sak va disparèt

BANN PROBLÈM É LA MÉCHANSTÉ

Sak la Bib i di : « Ankor in pe d’tan, é bann moun ke lé mové va disparèt ; ou va regardé la ousa zot lété, é zot i sra pa la. Mé sak i pran pa zot su la oteur va érit la tèr é zot va aprésié in gran kantité la pé » (PSOM 37:10, 11).

Detroi zimaj a la suit : 1) Bann voleur i sort dan in magazin avèk bann zartik volé. Zot figur lé maské. 2) in mesieu i donn in not mesieu in valiz ranpli larjan.

LÉSPLIKASION : Dann tan Noé, le Déluj la pa fé disparèt la méchansté pou toultan. Apré le Déluj, bann mové moun la arkomans fé pas la mizèr tout domoun. Mé i tard pa, Bondieu va fé disparèt la méchansté. Kom le psalmis la di, « bann moun ke lé mové va disparèt ». Bondieu va fé disparèt la méchansté gras son roiyom, in gouvèrnman dann sièl, ke va dirij tout bann zumin su la tèr, ki ièm la justis.

RÉFLÉCHI LADSU : Èske bann zumin ki gouvèrn le monn zordi, va bien aksèp le roiyom Bondieu ? La Bib i fémont ke i sra pa komsa. Zot i sra fou alé kont le roiyom la (Psom 2:2). Avèk kèl konsékans ? Le roiyom Bondieu va ranplas tout bann gouvèrnman su la tèr é « li touseul va dur pou toultan » (Danièl 2:44). Mé poukosa la dominasion bann zumin va arèt nèt ?

La fin la dominasion bann zumin : i fo vréman sa i arèt

Sak la Bib i di : « Lé pa lom ki march i doi dirij son bann pa » (JÉRÉMI 10:23).

Bann piéton i march devan in mur ousa néna bann zafich pou zéléksion.

LÉSPLIKASION : Bann zumin la pa été kréé pou dirij azot zot mèm. Zot i gingn pa gouvèrn dot zumin é règ tout bann problèm.

RÉFLÉCHI LADSU : Le sit Britannica Academic i lès antann ke okin Léta lé kapab « fé disparèt bann problèm ke néna su la tèr kom la mizèr, la faminn, bann maladi, bann katastrof naturèl, bann gèr oubien dot form la violans ». Lartik i ajout ke, dapré désèrtin « rienk in seul gouvèrnman pou tout la tèr i pe fé in nafèr kont bann problèm la ». Mèm si tout bann gouvèrnman té rasanm azot ansanm, le monn i sré toujour dirijé par bann zumin inparfé, ke lé pa kapab règ bann problèm ke nou la vu odsu. Le roiyom Bondieu lé le seul gouvèrnman, ke lé kapab règ tout bann problèm su la tèr pou toultan.

Donk dapré la Bib, la fin le monn, sétadir la fin bann domoun mové zordi, i doi pa fé peur bann bon moun. O kontrèr, sé in lévènman ke nou lé présé i ariv parske le vieu monn la i sra ranplasé par le gayar monn nouvo Bondieu !

Kansa sa va arivé ? Dékouv le répons ke la Bib i donn, dan lartik i vien apré.