« Protèj lunité ké lèspri sin i done »
LAPOT Pol la ankouraj bann krétien Éfèz pou « suport azot inn é lot èk lamour é fé vréman zéfor pou protèj lunité ké lèspri sin i done, é viv an pé zot tout ansanm » (Éféz. 4:2, 3).
Si an parmi nou néna « lunité », sé gras « lèspri sin ». Sa i vé dir ké néna lunité parské lèspri sin Bondié i aji. Mé kom Pol i di, nou doi protèj lunité-la. Kisa i doi fé sa ? An vré, chak krétien i doi fé zéfor « pou protèj lunité ké lèspri sin i done ».
Alon pran in légzanp, majine in kou in moun i done aou in loto nèv. Kisa i doi pran soin loto-la ? Sa la pa in kèstion pou pozé. Si lo loto la tonb an pane parsk’ou la pa pran soin, la pa la fot sak la done aou lo loto, pa vré ?
Lé parèy, lunité ké nou néna sé in kado Bondié. Chakèn an parmi nou i doi protèj sa. Si nou néna in ralé-pousé èk in frèr ou in sèr, nou doi domand anou : « Èské mi fé mon méyèr posib pou protèj lunité dan lasanblé ? »
« FÉ VRÉMAN ZÉFOR POU PROTÈJ LUNITÉ »
Kom Pol la di, lé pa fasil protèj lunité dan lasanblé surtou kan néna inn an parmi la blès anou. Èské « protèj lunité » i vé dir ké nou lé toultan oblijé alé oir lo moun ké la blès anou ? Lé pa oblijé. Domand aou : « Si mi sa oir ali, èské la situasion sra méyèr ou sra pli pir ? » Nadfoi sra mié pas dési oubien pardoné (Prov. 19:11 ; Mark 11:25).
Domand aou : « Si mi sa oir lo moun, èské la situasion sra méyèr ou sra pli pir ? »
Kom Pol la ékri, alon kontinié ‘suport anou inn é lot èk lamour’ (Éféz. 4:2). Dan in liv i di k’i pé tradui fraz-la, komsa : ‘pran lé zot kom zot i lé’. Sa i vé dir nou aksèp ké nout bann frèr é sèr i fé zérèr, kom nou. Lé sur, nout tout nou doi fé zéfor pou pans é aji kom Jéova (Éféz. 4:23, 24). Sèlman, na poin inn an parmi nou i gingn fé sa kom k’i fo (Rom. 3:23). Si nou tien kont dé sa, sra pli fasil pou nou suport anou inn é lot, pardone lé zot, é donk « protèj lunité lèspri sin i done ».
‘Nou va gingn viv an pé nout tout ansanm’ dan lasanblé si nou pardone lé zot é si nou oubli sak lé zot la fé anou — é sa, mèm dan nout kèr. Dann Éfézien 4:3 i di « viv an pé zot tout ansanm », mé dan la lang grèk, tèr la i ansèrv in mo k’i vé dir « ligaman ». Bann ligaman sé bann parti lo kor k’i atach bann zo ansanm. Lé parèy, la pé èk lamour pou nout bann frèr é sèr va èd anou rès ataché èk banna, é sa, malgré bann ti ralé-pousé k’i pé arivé.
Si na inn dan lasanblé i blès aou, i nèrv aou oubien i fatig aou, ésèy konpran ali olèrk kritik ali (Kol. 3:12). Kom nout tout lé inparfé, d’in manièr ou d’in not, la fine ariv aou osi blès in moun. Si ou gard sa dan out tèt, sa va èd aou « protèj lunité ké lèspri sin i done ».