Bann kèstion la poz anou

Kèl « pansé » i tard pa Jéova va mèt dan lo kèr bann dirijan ?

Pou koz dési lo débu lo gran détrès, Révélasion 17:16, 17 i di : « É bann dis korn ou la vu é lo bébèt sovaj, banna nora la èn pou lo prostitué. Banna va plim aèl, va lès aèl touni ; banna va manj son chèr é va bril aèl an antié. Parské Bondié va mèt son pansé dan zot kèr pou ké zot i fé sak li vé, oui, pou réaliz zot prop lidé kan zot va done zot pouvoir lo bébèt sovaj. » Avan, nout bann publikasion té i di ké Jéova té sa mèt lo « pansé » détrui tout bann fo rolijion dan lo kèr bann dirijan.

Sèlman, nou la bézoin in ti mizajour. Lo « pansé » ké Jéova sa mèt dan lo kèr bann gouvèrnman sé « done zot pouvoir lo bébèt sovaj ». Pou konpran koman sa i sa réalizé, alon répond bann kèstion i suiv.

Dési kisa profési-la i koz ? « Lo prostitué » oubien « Gran Babilone » i roprézant tout bann fo rolijion su la tèr. Lo « bébèt sovaj koulèr rouj vif » i roprézant Lorganizasion bann Nasion Zuni (ONU). La mèt an plas lorganizasion-la an 1919 pou mèt la pé dan lo monn, é avan li té apèl Sosiété bann Nasion (Rév. 17:3-5). Bann « dis korn » i roprézant tout bann gouvèrnman k’i soutien lo bébèt sovaj.

Kèl lien néna ant lo prostitué é lo bébèt sovaj koulèr rouj vif ? Lo prostitué lé « asiz su » lo bébèt sovaj, sa i vé dir k’èl i soutien ali é k’èl i ésèy kontrol ali.

Kosa va ariv prostitué-la ? Lo bébèt sovaj èk lo bann dis korn k’i soutien ali, ‘nora tèlman la èn pou lo prostitué’ ké banna va plim aèl jusko dèrnié é va fé mont tout domoun koman li lé mové. É kom Jéova la anonsé, banna va détrui aèl (Rév. 17:1 ; 18:8). Alor va fini èk tout bann fo rolijion. Sèlman, avan sa i ariv, Jéova va pous bann gouvèrnman pou fé in zafèr ké la jamé arivé avansa.

Kosa Jéova va pous bann gouvèrnman pou fé ? Li va mèt son « pansé » dan lo kèr bann dis korn, sétadir « zot va done lo bébèt sovaj [koulèr rouj vif] zot puisans èk zot lotorité ». É nou rapèl, tèr la lo bébèt sovaj sé l’ONU (Rév. 17:13). Réfléchi su kosa sa i vé dir. Èské bann gouvèrnman va désid par zot mèm done zot puisans èk zot lotorité lo bébèt sovaj ? Non ! Lo profési i amont ké sé Bondié ké va pous azot aji komsa (Prov. 21:1 ; agard Izai 44:28). Èské va fé chanjman-la ti bout par ti bout ? Non, va ariv d’in kou ! Alors, lo bébèt sovaj va détrui tout bann fo rolijion in bon foi pou tout.

Kosa va ariv biento ? Nou la pa bézoin louké tout sak i èspas dan laktualité, pou oir si ti dousman bann gouvèrnman i komans soutien l’ONU. Ala plito kosa i sa arivé : san k’nou atand, Jéova va fé an sort ké tout bann gouvèrnman i done zot pouvoir l’ONU. Kan sa va arivé, na konèt ké lo gran détrès i sa komansé. Pou linstan, « alon kontinié véyé é alon gard nout kapasité pou bien rézoné », parsk’i tard pa bann chanjman-la va ariv d’in kou ! (1 Tés. 5:6).