Koman organiz in mariaj k’i done lonèr Jéova

1-2. Koman Jéova i oi lo mariaj ?

ÈSKÉ ou sa marié ? Si oui, nou lé kontan pou ou ! Somanké ou lé bien okipé pou prépar out mariaja. Jéova i vé ou profit a fon lo jour out mariaj é ké zot dé na in gayar ti vi ansanm (Prov. 5:18 ; Chan S. 3:11).

² Jéova i mérit k’i done ali lonèr lo jour zot mariaj. Akoz nou pé di sa ? É koman zot i pé fé sa ? Mèm si sujé-la lé surtou pou sak lé antrinn prépar zot mariaj, bann prinsip la Bib anndan-la, i pé èd nout tout done lonèr Jéova si nou lé invité in mariaj ou si bann marié i domand anou konsèy.

POUKOSA JÉOVA I MÉRIT LONÈR

3. Kan zot i organiz zot mariaj, kosa bann krétien i dévré pran an kont, é poukosa ?

³ Bann krétien k’i organiz zot mariaj i doi pran bann désizion dapré bann prinsip Jéova i done dan la Bib. Poukosa ? Parské sé Jéova la mèt an plas lo mariaj. Li la organiz lo promié mariaj : li la marié Adan èk Èv (Jén. 1:28 ; 2:24). Donk kan zot i organiz lo mariaj, lo pli inportan pou sak i sa marié sé done lonèr Jéova.

4. Pou kèl rézon ankor sak i sa marié i vé done lonèr Jéova ?

⁴ Zot néna in not rézon vréman inportan pou suiv lo fason pansé Jéova lo jour zot mariaj : li lé zot Papa dann sièl é zot méyèr kamarad (Ébré 12:9). É lé sur ké zot i vé pa pèrd lamitié-la ! Jamé zot i voudré k’i ariv in nafèr k’i pouré blès zot kamarad, é surtou pa jour-la (Ps. 25:14). Kan zot i pans tout sak Jéova la fine fé pou zot é tout sak li va fé pou zot, èské lé pa normal mèt ali anlèr lo jour zot mariaj ? (Ps. 116:12).

KOMAN OU PÉ DONE LONÈR JÉOVA

5. Koman la Bib i pé èd bann fiansé organiz zot mariaj ?

⁵ La Bib i done pa in lis su sak i fo fé ou pa pou organiz in mariaj. Bann fiansé i pé organiz zot mariaj dapré sak zot i èm, zot situasion oubien zot kiltir. Bann vré krétien i doi osi obéi la loi bann gouvèrnman su lo mariaj (Mat. 22:21). Kinport sak bann fiansé va désid fé pou zot mariaj, tank zot i suiv sak la Bib i di, sa va done lonèr Jéova é li sra kontan. Alor, kèl prinsip la Bib i pé èd azot ?

6. Akoz lé inportan pou bann fiansé suiv la loi ?

⁶ Suiv la loi (Rom. 13:1, 2). Dan in bonpé péi, sak i vé marié i doi suiv bann loi ké lo gouvèrnman la mèt an plas. Sé pou sa bann fiansé i doi konèt kèl loi i égzis ousa zot i viv. Si zot i koné pa tro koman i èspas dan zot péi, ézit pa domand bann zansienb.

7. Koman fé an sort ké tout i èspas èk rèspé lo jour zot mariaj ?

⁷ Fé an sort ké tout i èspas èk rèspé lo jour out mariaj (1 Kor. 10:31, 32). Lé sur, pandan zot mariaj, zot i vé ké domoun i romark bann joli kalité lo fri lèspri olèrk bann vilin manièr monn-la (Gal. 5:19-26). Kom sé lo marié i sra lo chèf la famiy, sé li i doi fé an sort ké tout i èspas èk rèspé, ké tout domoun i pas in gayar ti moman, é ké jour-la i done lonèr Jéova. Koman i pé fé sa ? Èk in diskour mariaj bazé su la Bib. Kan lo frèr va fé lo diskour, li va fé sa èk rèspé é li va fé mont lamour, komsa li va èd tout sak lé la konpran ké lo mariaj sé in kado Jéova. É osi, va èd banna konpran ké mariaj pa badinaj. Sé pou sa si lé posib, in bonpé i choizi fé zot diskour mariaj la sal lo Roiyom. Si zot i vé fé sa, tard pa pou ékri in lèt pou domand bann zansien si lé posib utiliz la sal.

8. Koman fé an sort ké la fèt pou zot mariaj i done lonèr Jéova ? (Romin 13:13).

⁸ (Lir Romin 13:13.) Si zot i choizi fé in fèt pou zot mariaj, kosa zot i pé fé pou ké sa i rosanm pa bann fèt dan lo monn ? Dan vèrsé-la i ansèrv in mo grèk pou koz dési bann « fèt dévèrgondé », sé bann fèt ousa domoun i boir in ta é ousa la muzik i joué juska tar dan la nuit (agard lo ti not létud an fransé « fêtes débridées » dann Romin 13:13). Si zot i désid sèrv lalkol, vèy bien ké na poin pèrsone i boir plis k’i n’an foc. Si néna la muzik, fé an sort ké lé pa tro for komsa i déranj pa bann zinvité ké lé antrinn kozé. Fé atansion lo kalité muzik zot va mèt é vérifié osi ké lo bann parol va pa chok pèrsone.

9. Kosa bann fiansé i doi gard an tèt dési bann diskour èk bann lamizman ké nora lo jour zot mariaj ?

⁹ Èské lo jour zot mariaj, nora bann ti diskour, va pas bann zimaj oubien bann vidéo, ou ankor dot kalité lamizman ? Lé sur sa i mèt in bon ti lanbians pou so jour èspésial. Mé sèlman, fé an sort ké tout i rès ankourajan (Fil. 4:8). Domand zot : « Èské lamizman-la va fé mont rèspé pou lé zot ? Èské va fé mont rèspé pou lo mariaj ? » É lo zafèr lo pli inportan zot doi domand azot : « Èské va done lonèr Jéova ? » Lé vré, fé rir la bouch lé bien, mé fé atansion ké na poin rien i chok lé zot, kom par égzanp bann blag su bann zafèr sèksuèl (Éféz. 5:3). Si zot famiy oubien zot bann kamarad la prévu di in nafèr lo jour zot mariaj, fé atansion ké banna la bien konpri é ké banna va rèspèk sak zot la désidé pou so jour-la.

10. Akoz bann fiansé i doi pa atir tro latansion su zot pou zot mariaj ? (1 Jan 2:15-17).

¹⁰ Atir pa tro latansion su zot (lir 1 Jan 2:15-17). Jéova lé kontan kan son bann sèrvitèr i rod pou done ali lonèr olèrk atir tout latansion su zot mèm. Sé pou sa pou zot mariaj, bann krétien va évit dépans in ta larjan ou « fé lo vantar ». Kosa va aport azot si zot i fé in ti mariaj sinp ? Riskab va èspas lo mèm zafèr ké la ariv Mike, in fèr laba Norvèj. Li di : « Nou la pa fé krédi é nou la gingn kontinié nout sèrvis pionié. Nout ti mariaj té sinp mé té tro joli é nou gard bann bon souvnir. » Tabitha, in sèr dann péi Lind i di : « Nou la évit in bonpé traka. Kom nout mariaj té sinp, navé moin d’zafèr pou organizé é nou la évit détroi dézakor ant nou é nout famiy. »

11. Koman bann marié i pé fé pou ké zot laparans i atir pa tro latansion su zot ? (agard osi bann zimaj).

¹¹ Èské zot la fine désidé sak zot sa mèt pou zot mariaj ? Lé sur zot vé kas larmoir pou so jour-la. Mèm dann tan lontan, sak té marié té fé bien atansion zot linj é zot manièr koifé (Izai 61:10). Lé vré, sak zot sa mèt dési zot lo jour zot mariaj sra pa parèy sak zot va mèt dan dot zokazion, mèm ké sa, sa i doi pa chok lé zot (1 Tim. 2:9). Lès pa zot linj ni zot laparans, vni lo zafèr lo pli inportan lo jour zot mariaj (1 Pièr 3:3, 4).

12. Poukosa bann fiansé i doi rojèt bann tradision ké lé pa an akor èk la Bib ?

¹² Rojèt bann tradision ké lé pa an akor èk la Bib (Rév. 18:4). Partou dan lo monn jordi, dan bann mariaj néna bann tradision an lien èk lo fo rolijion, èk bann démon, é bann supèrstision. Jéova i fé bien konpran anou k’i fo pa may èk so bann « zafèr souyé » (2 Kor. 6:14-17). Si la ousa zot abit zot koné pa si désèrtin tradision lé bon, alé fé rochèrch pou trouv ousa i sort bann tradision-la é rod osi bann prinsip la Bib ké va èd azot pran in bon désizion su sak zot doi fé dan zot mariaj.

13. Koman bann fiansé i pé aoir lo mèm fason pansé Jéova su bann kado ?

¹³ Èské domoun na labitud of kado bann marié la ousa zot abit ? Pa tout zinvité va choizi of lo mèm kalité kado, chakèn va choizi son kado dapré sak li néna. Bien sur, bann krétien lé ankourajé doné é sa i fé plézir azot (Prov. 11:25 ; Akt 20:35). Parkont, nou voudré pa ké akoz dé nou, nout bann zinvité i san azot oblijé done in kado ou ké banna i san azot mal parské nou vé pa bann ti kado pa chèr. Alon pran légzanp su Jéova, é pou sa i fo nou néna in bon fason pansé su bann kado é alon lès lé zot done èk zot kèr dapré sak zot i pé (2 Kor. 9:7).

ÉVIT É SURMONT BANN DIFIKULTÉ

14. Kèl difikulté détroi moun la pas dédan pou zot mariaj ?

¹⁴ Zot pé trouv difisil ésèy organiz in mariaj k’i done lonèr Jéova. Par égzanp, lé pa fasil fé in ti mariaj sinp. Charlie, k’i sort dan bann zil Salomon, i rakont : « Té vréman konpliké choizi kisa nou té sa invité pou nout mariaj. Nou néna in bonpé kamarad, é dan nout kiltir tout domoun i atand k’i invit azot ! » Tabitha, ké nou la vu avan, i di : « Ousa mi viv, na labitud fé gran mariaj. La pran lo tan avan nout bann paran i aksèp ké nou invit rienk 100 moun. » Sarah, k’i sort péi Lind, i partaj sanm nou : « Néna i rès rienk kalé su larjan é su koman domoun va oir azot. Tout mon bann kouzin la fé bann gran mariaj, donk sa la mèt amoin la présion pou ké mi fé inn ankor pli gran. » Kosa i pé èd azot surmont bann difikulté-la é dot ankor ?

15. Poukosa la priyèr lé inportan kan i organiz in mariaj ?

¹⁵ Pri souvan pou lorganizasion zot mariaj. Zot i pé koz èk Jéova dan la priyèr su tout kalité problèm zot i rankont oubien dévid zot kèr sanm li (Fil. 4:6, 7). Zot i pé domand ali èd azot pran bann bon désizion, rès kalm kan lo strès i mont, é done azot kouraj kan zot la bézoin (1 Pièr 5:7). Zot nora plis konfians an Jéova kan zot va oir ali répond zot bann priyèr. Tabitha, i kontinié rakonté : « Amoin èk mon fiansé nou lavé pèr k’i ariv bann dézakor ant nout dé é osi èk nout famiy. Donk sé pou sa chak foi nou té sa koz su lorganizasion lo mariaj, nou té komans par in priyèr. Nou la vréman santi Jéova èd anou é nou la aprésié ké tout la èspas dan la pé. »

16-17. Koman koz èk rèspé i pé èd in famiy kan i organiz in mariaj ?

¹⁶ Koz èk rèspé (Prov. 15:22). An tank fiansé, zot nora in bonpé désizion pou pran pou lo jour zot mariaj. Fodra zot i désid la dat, larjan zot i sa dépansé, kisa zot i sa invité é dot zafèr ankor. Avan pran in désizion, agard ansanm kosa lé posib fé é koz su bann prinsip la Bib ké zot i pé mèt an pratik. Zot i pé koz osi su bann ti konsèy ké zot la gingné èk bann frèr é sèr na lèspèryans é ké lé bann bon zégzanp. Kan zot i diskit su sak zot i èmré, rès janti, rézonab é tien kont sak lé zot i préfèr osi. Si in moun out famiy proch, kom out papa momon, i propoz in zafèr k’i rès rézonab, ésèy aksèp sak banna i vé. Pou banna osi sa lé in lokazion èspésial. Si i gingn pa fé kom banna i domand, èsplik azot akoz lé pa posib é fé sa èk rèspé (Kol. 4:6). Fé bien konpran zot famiy ké sak zot i vé sé ké zot mariaj i done lonèr Jéova é ké tout domoun i pas in gayar ti moman.

¹⁷ I pé èt difisil pou zot èsplik zot choi ansanm zot bann paran, surtou si zot lé pa dan la vérité, mé zot va niabou fé sa. In frèr laba dann péi Lind, k’i apèl Santhosh i di : « Nout famiy té vé ké nou té suiv bann tradision la rolijion indou. La pran anou lo tan pou èsplik azot nout désizion ladsi. Parkont nou la aksèp détroi domand parské nou té koné té sa pa chagrine Jéova. Par égzanp, nou la désid chanj nout ropa pou fé plézir azot, é osi nou la pa mèt bann ti chanté é bann dans parské nout famiy té pa abitué èk sa ».

18. Kosa va èd azot pou ké tout i èspas bien lo jour zot mariaj ? (1 Korintien 14:40 ; agard osi lo zimaj).

¹⁸ Organiz bien lé choz. Si tout lé bien organizé zot sra moin strèsé lo jour zot mariaj (lir 1 Korintien 14:40). Wayne, k’i abit Tayouane, i rapèl ali : « Détroi jour avan, nou la fé in rénion èk tout sak té vé done in kou d’min pou nout mariaj. Nou la koz su lorganizasion é nou la répèt détroi zafèr pou lo mariaj, komsa tout i èspas bien. » Zot va mont ké zot i rèspèk zot bann zinvité si zot i fé tout zot posib pou ké na poin d’rotar dan lo program.

19. Kosa va èd azot gard lo kontrol pou ké tout i èspas bien lo jour zot mariaj ?

¹⁹ In bonpé problèm i pé èt évité si zot i réfléchi a lavans dési sak i pé arivé (Prov. 22:3). Par égzanp, si ousa zot i viv néna bann frodèr mariaj, réfléchi su sak zot i pé fé o ka ou sa i ariv. Fé bien konpran out famiy k’i sèrv pa Jéova koman i èspas lo mariaj é èsplik azot kosa nou pans dési désèrtin tradision. Zot pé partaj sanm banna lo ti lartik lintèrnèt « Comment se passe un mariage chez les Témoins de Jéhovah ? » su jw.org. Zot pouré domand in frèr ké zot i fé konfians pou fé dirèktèr mariaj, komsa li vèy si tout i èspas bien pandan la fèt (Jan 2:8). Si zot i èsplik ali bien kosa lé prévu pou lo mariaj, li pé èd azot pou ké tout i èspas èk rèspé é ké lo jour zot mariaj i èspas kom zot i vé.

20. Kosa sak i sa marié i doi rapèl azot dési zot mariaj ?

²⁰ Pétèt zot san azot dépasé kan zot majine tout sak i fo fé pou organiz zot mariaj. Mé oubli pa, zot fèt mariaj lé rienk su in jour. Sé lo promié jour ousa zot va komans in gayar ti vi ansanm kom sèrvitèr Jéova. Fé tout zot posib pou aoir in mariaj sinp é ké tout i èspas èk rèspé lo jour-la. Fé konfians Jéova. Zot pé èt sur, k’avèk son lèd zot va gingn organiz in mariaj ké zot va pa oubliyé, ousa zot nora poin d’rogré é zot va gard bann gayar ti souvnir lo jour-la (Ps. 37:3, 4).