Frèr é sèr ajé, zot lé bann zarlor dann lasanblé

Riskab aou osi ou gingn pu fé kom avan akoz ou la fine vni vié. É mèm si i fé lontan ou sèrv Jéova, kan ou majine tout sak ou té gingn fé pou li dan out jèn tan par rapor jordi, pétèt sa i dékouraj aou. Si ou pans sa, kosa va èd aou gard out joi ?

KOSA JÉOVA I VÉ OU FÉ

Domand aou : « Kosa Jéova i vé mi fé ? » Bann ti parol ou va trouv dann Détéronom 6:5, va rodone aou kouraj. I di : « Ou doi èm Jéova out Bondié avèk tout out kèr, avèk tout out lam é avèk tout out fors. »

Dann vèrsé-la, Jéova i vé ou sèrv ali èk tout out kèr, tout out lam é tout out fors. Konèt sa, i pé anpèch aou konpar sak ou gingn fé avèk sak lé zot i gingn fé, oubien anpèch aou konpar sak ou lé kapab fé jordi avèk sak ou té kapab fé avan.

Réfléchi ladsi : Kan ou té jèn, kosa ou té gingn done Jéova ? Lé sur ou té done ali out méyèr, é sa dapré out situasion dann tan-la. Kosa ou pé done Jéova jordi ? Lé sur k’ou doi done ali déja out méyèr dapré out situasion jordi, é osi dapré sak ou gingn fé jordi. Si ou oi lé choz komsa, ou va rand aou kont ké jordi ou done Jéova lo mèm zafèr k’ou té done ali avan. Kan ou té jèn, ou té done ali out méyèr, é lé parèy jordi, ou done ali osi out méyèr.

OUT LÈSPÈRIANS I PÉ ÈD LÉ ZOT

Olèrk oir out laj kom in zafèr k’i blok aou, oi ali plito kom in lavantaj ké va pèrmèt aou èd domoun otour d’ou. An vré, si ou gard bien, jordi ou pé fé désèrtin zafèr ké ou té pé pa fé dann tan ou té jèn. Par égzanp, kosa ou pé fé ?

Partaj out lèspèryans èk lé zot. Réfléchi in ti kou su sak dé pèrsonaj la Bib la di :

Lo roi David : « Moin la été jèn é, astèr, moin lé ajé, mé moin la jamé vu lo moun jus èt abandoné ni son bann marmay rod dopin pou manjé » (Ps. 37:25).

Jozué : « Astèr, ékout ! Tard pa, mi sa mor. Èk tout zot kèr é tout zot lam, zot i koné bien ké, an parmi tout bann gayar promès Jéova la fé azot, na poin inn la pa réalizé. Tout la éspasé vréman. Na poin inn la pa réalizé » (Joz. 23:14).

Si David èk Jozué té gingn koz komsa, sé parské zot navé lèspèryans. Zot la viv in bonpé zafèr pandan tout zot vi, sé pou sa tout sak zot la di navé in bonpé la valèr. Aou osi ou néna lèspèryans, é kom banna, out bann ti kozé i pé aoir in bonpé la valèr pou lé zot. Koman ?

Par égzanp si ou sèrv Jéova dépi lontan, ou pé rakont koman li la èd aou dan out vi, oubien koman ou la vu ali èd domoun otour d’ou. Èské ou rapèl in lokazion ousa ou la vu Jéova béni son bann sèrvitèr ? Alor, ézit pa partaj so gayar ti souvnir-la ansanm lé zot ! Surman ou la fine oir, bann ti zistoir komsa i fé toujour plézir. É oui, ou pé ankouraj out bann frèr é sèr kan ou partaj sanm zot tout lèspèryans ou néna dan out sèrvis pou Jéova (Rom. 1:11, 12).

In not fason ankouraj out bann frèr é sèr sé kan ou vien la sal sur plas, é sa chak foi ké lé posib pou ou. Si ou fé sa, ou va ankouraj banna, mé aou osi ou sra ankourajé. Connie, ké nou la vu in pé avan, i di : « Alé la sal i èd amoin pa larg lo kor. Koman mi pouré èt dékourajé, èk tout lamour ké mi gingn kan mi vien la sal ? Mi ésèy osi fé mont mon rokonésans, é pou sa mi done bann ti kado. É mi ésèy kontinié done paké pou Jéova ansanm mon bann frèr é sèr. »

TOUT SAK OU FÉ POU JÉOVA NA LA VALÈR POU LI

Dan la Bib néna plin d’moun ké Jéova té èm malgré banna té limité par zot situasion. Alon gard légzanp Siméon, in gramoun ké la vu Jézu nèt. Kan Siméon té sa o Tanp, surman laba li té oi bann jènjan fé bann travay inportan. Mé koman Siméon li mèm té oi ali ? Pétèt Siméon té pans li té pa util pou Jéova parské li té gingn pu sèrv Jéova kom bann jèn-la. Mé Jéova té pans pa komsa. Pou Jéova, li té in sèrvitèr fidèl, é li la gingn lonèr oir Jézu kan li té ankor ti bébé. Jéova la mèm ansèrv Siméon pou anons in profési su lo Mési ! (Luk 2:25-35). Lé sur Jéova la pa rès kalé su son vié kor fatigé, mé li la vu in bonom ké lavé in foi for é « lèspri sin té gid ali ».

Ou pé èt sur ké Jéova lé kontan kan li oi tout sak ou fé pou li, kinport out bann limit. Donk pou li, in sakrifis k’in moun i fé « dapré sak li néna, é pa dapré sak li na poin, sé sa ké lé surtou aksèpté » (2 Kor. 8:12).

Donk rès kalé su sak ou gingn fé. Par égzanp, domand aou koman ou pé fé pou prèché, mèm si sé pou inn ti pé d’tan ? Èské ou pé téléfone out bann frèr é sèr oubien ékri inn ti kart pou ankouraj azot ? Bann ti zafèr komsa i pé aoir in gran léfé su zot, surtou kan i vien d’in moun k’i sèrv Jéova dépi lontan.

Détroi sé zot kor k’i anpèch azot fé sak zot i vé. Agard sak la arivé dan in péi Lafrik dan lankadré « Sa la sov aèl », lankadré-la i amont ké bann gramoun lé toujour util pou Jéova.

Oubli pa gras out foi é out fidèlité, ou pé ankouraj lé zot. Ou lé in légzanp parské ou la tienbo, é lé sur « Bondié lé pa injus pou oublié sak [ou] la fé é lamour ké [ou] la montré pou son non pou sèrv bann sin é pou kontinié sèrv azot » (Ébré 6:10).

DONE PAKÉ TANK OU GINGN

Néna d’zétud i amont ké kan bann gramoun i pran lo tan pou èd lé zot, zot néna in méyèr santé, zot lèspri i travay mié é zot i viv pli lontan.

Bien sur, lé pa parské zot i fé sa ké zot nora poin traka vié moun. Nou viéi é nou mor parské nou lé péchèr, é na rienk lo roiyom Bondié va gingn tir anou dann péché (Rom. 5:12).

An fin d’kont, kontinié fé sak Jéova i domand, kom èd domoun konèt ali, va èd aou fé grandi out foi ankor plis, é pétèt mèm, aoir in méyèr santé. Azot nou bann frèr é sèr ajé, rapèl azot Jéova i aprésié vréman tout sak zot i fé pou li é zot joli légzanp lé in zarlor pou zot lasanblé.