О СВЕТО КО ХАОС

3 | Ачхов паше околенцар со мангеа лен

СОСКЕ ТАНО ВАЖНО

Себепи о хаос со иси ко свето, бут мануша тане са посекириме хем бизо те овен свесна цидена пе таро окола со мангена лен.

О мануша мангена повише те овен коркори него пле амаленцар.
О брачна парија са повише акошена пе.
О родителија скоро ич на дикхена со мучинела ленгере чхавен.

Со ваљани те џане

О амала тане важна адалеске со ола поможинена амен те ачхова састе ко физичко хем ко емоционално поглед, посебно ко пхаре времија.
О стрес таро хаос со иси ко свето шај те анел аменге проблемија ки фамилија со на очекујнаја лен.
Кеда о чхаве шунена башо лошна буќа адава шај бут те даравен лен.

Со шај те кере панда акана

Ки Библија пишинела: „О чачутно амал сикавела мангипе ко секова време хем пхрал овела ко пхаре диве“ (Изреки 17:17).

Размислин некасте со шај те поможинел тут хем со шај те дел тут шукар советија. Адава со џанеа кај некој грижинела пе туке шај те дел тут сила те икљове ко крајо е секојдневно пхарипаја.

СО ШАЈ ТЕ КЕРЕ — Корисна советија

Акала советија шај те поможинен тут те ачхове паше околенцар со мангеа лен

КЕР ПОЗОРАЛО ТЛО БРАКО

Кер позорало тло брако

Ки Библија пишинела: „Дујенге тано пошукар него јекхеске... Соске, ако јекх перела, о дујто ка поможинел пле амалеске те уштел“ (Проповедник 4:9, 10). О брачна парија ваљани те овен сар играчија таро исто тими колен со иси лен исто цел, те побединен, а на сар играчија таро различна тимија кола сој против јекх јекхесте.

Овен одлучна те на икален и нервоза јекх јекхеске. Овен стрплива.
Барем јекх пути ко курко, керен лафи башо несаво проблеми со шај иси тумен. Хем ма бистрен, и цел на ваљани те овел те нападинен јекх јекхе, него ваљани те нападинен о проблеми.
Одвојнен туменге време те керен нешто колесте со о солдуј ка уживинен.
Сетинен тумен ко шуже моментија со накхлен лен аѓаар со ка дикхен слике тари тумари венчавка или таро јавера шуже настанија.

„О ром хем и ромни шај нане те согласинен пе башо са, ама адава на значинела кај нашти те соработинен сар тими. Шај те анен заедно несави одлука, а пало адава те керен бути ки лате те шај те остваринен ла“ (Дејвид).

АЧХОВ ПАШЕ ТЛЕ АМАЛЕНЦАР

Ачхов паше тле амаленцар

Шукар тано кеда добинеа поддршка тле амалендар, ама размислин сар шај ту да те де лен поддршка. Кеда охрабринеа е јаверен, охрабринеа туте да.
Јавин тут или пишин некоборе амаленге секова диве те шај те дикхе сар тане.
Пуч тле амален сар икљона ко крајо е проблеменцар со иси лен слична сар тле.

„О пхаре периодија тане споредиме сар јекх бура. Кеда о бршим хем и бавлал керена аменге пхаре те дикха, тегани о амала шај те поможинен амен те дикха кај сием хем кај ваљани те џа. Адава шај те керен ле аѓаар со ка сетинкерен тут ко буќа со више шај џанеа лен. Тле амала мангена тут хем џанена кај ту да лен мангеа“ (Никол).

ПОМОЖИН ТЛЕ ЧХАВЕНГЕ

Поможин тле чхавенге

Ки Библија пишинела: „Секова мануш ваљани те овел спремно сигате те шунел, а похари те керел лафи“ (Јаков 1:19). Ко почеток те чхавенге шај те овел пхаро те вакерен состар дарана хем со мучинела лен, ама ако стрпливо шунеа лен ка поможине ленге отворено те керен туја лафи.

Поможин тле чхавенге слободно те керен туја лафи башо са. Несаве чхавенге полокхо тано те керен лафи ки опуштими ситуација, него само формално те керен лафи пле родителенцар. Шај те чхавенге ка овел полокхо те керен туја лафи џикоте возинеа или џикоте пхирена.
Трудин тут те чхаве те на шунен бут буќа со ка вознемиринен лен.
Вакер те чхавенге со керѓан те шај и фамилија те овел безбедно.
Планиринен сар ка постапинен ко итна ситуацие хем вежбинен адава е чхавенцар.

„Керен лафи е чхавенцар хем мукхен лен ола да те вакерен со мучинела лен. Шај гаравена ки песте дар, холи или нешто јавер. Вакер кај туте да понекогаш мучинена тумен асавке буќа хем вакер со поможинела тут те икљове ко крајо ленцар“ (Бетани).