О суно башо баро каш

Јекх рат, о Навуходоносор сине ле страшно суно. Адалеске викинѓа са е мудра манушен те вакерен леске со значинела о суно. Ама, никој нашти сине те вакерел леске. Ко крајо, о цари керѓа лафи е Даниелеа.

О Навуходоносор вакерѓа е Даниелеске: „Ко суно дикхљум јекх каш. Барило добором бут учо со ресља џи ко небо. Шај сине те дикхел пе тари секоја страна ки Пхув. Сине ле шуже листија хем бут плодија. О животне одморинена пе сине тели лескири сенка хем о птице керена сине гнездо ко лескере гранке. Тегани хулило таро небо јекх ангели. Ов вакерѓа: ‘Чхинен о каш хем лескере гранке. Ама, мукхен о стебло е коренонцар, хем околу лесте чхивен састрнале хем бакарна обрачија. О вило е каштескоро ка менинел пе таро манушикано ко животинско, хем адава ка трајнел ефта времија. Са о мануша ка дикхен кај о Девел тано Владетели хем ов дела о царство каске со мангела‘“.

О Јехова сикавѓа е Даниелеске со значинела о суно. Кеда о Даниел халило со значинела о суно, ов бут дарандило. Ов вакерѓа е цареске: „Пошукар акава суно те овел сине те душманенге, ама, акава тано туке. О баро каш со сине чхиндо, сиан ту. Ка нашаве о царство хем ка ха чар ко ливаде сар диво животно. Ама, адава со вакерѓа о ангели те мукхел пе о стебло е коренонцар значинела кај палем ка ове цари“.

Пало јекх берш, о Навуходоносор пхирела сине ко рамно крови ки пли палата, хем дикхела сине кобор тано шужо о Вавилон. Ов вакерѓа: „Кобор шужи диз градинѓум! Чаче сиум бут важно мануш!“ Џикоте керела сине лафи, јекх гласо таро небо вакерѓа леске: „Навуходоносор! Акана о царство нане више тло“.

Ко адава моменти, о Навуходоносор нашавѓа пи годи хем уло сар диво животно. Мора сине те џал песке тари палата хем те живинел е диво животненцар. О бала лескере бариле сар пердувија е орлоскере, а лескере нокте сар о канџе е птиценгере.

Кеда накхле ефта берш, о Навуходоносор уло палем нормално хем о Јехова керѓа ле те овел цари ко Вавилон. О Навуходоносор вакерѓа: „Фалинава е Јехова, о Цари е небоскоро. Акана џанава кај о Јехова тано о Владетели. Сикавела е горда манушен те овен понизна, хем чхивела цари кас мангела“.