Увод

О лил Библиска стихија со поможинена амен ко живото ка поможинел тут полокхе те аракхе библиска стихија хем извештаија со ка поможинен тут те икљове ко крајо е проблеменцар со иси тут. Исто аѓаар ка поможинел тут те аракхе баш адала стихија со ваљани те шај те охрабрине е јаверен хем те поможине лен те анен одлуке со ка анен чест е Јеховаске. Бирин и тема со интересинела тут хем атхе шај те аракхе интересна пучиба хем кратка објаснувања башо библиска извештаија. (Дикх и рамка „Сар те користине акава лил“.) Ко акава лил шај те аракхе советија хем утеха тари Библија. Исто аѓаар ка шај те аракхе корисна начелија тари Библија коленцар со ка шај те поможине хем те охрабрине е јаверен.

Сар те користине акава лил

Те шај те аракхе несави тема, пишин адава со мангеа те аракхе ко дело „Роде“ или шај те роде спрема и главно тема. О лил Библиска стихија со поможинена амен ко живото тано делимо ко ефта главна теме: Духовност, Особине, Предизвикија, Секојдневно живото, Собрание, Фамилија хем Шукар хем лошна постапке. Најверојатно ка аракхе и тема со родеа ко јекх таро акала главна теме. Бирин јекх таро акала главна теме хем аракх и тема која со родеа. Ама, ако на џанеа која главно тема те бирине те шај те аракхе адава со родеа, шај те џа ко Са те шај те дикхе са о теме со аракхљона ко акава лил хем те бирине адаја со ваљани туке. Ки секоја тема ка дикхе кај иси реченице кола сој покале. Несаве лендар тане керде сар пучиба. Кеда ка читине о стихија шукар размислин сар ола тане поврзиме е реченицаја или сар одговоринена ко пучибе. Несаве теме тане делиме ко поднасловија те шај посигате те аракхе адава со родеа. Понекогаш ко дело „Дикх хем“ иси јавера да стихија. Ки ленде иси мисле кола сој поврзиме е темаја. Бут пути ко теме исто аѓаар ка аракхе „Библиско извештај“ или „Библиска извештаија“. Адатхе шај те аракхе реченице кола со кратко објаснинена и главно цел е стихонгири. Откеда ка читине о стихо, читин и реченица која со ка поможинел туке те размислине башо стихо.

Ко акава лил, нане чхивде са о стихија сој поврзиме јекхе темаја. Кердо тано аѓаар те шај те аракхе о стихија со највише ка користинен туке, ама ако мангеа похор те истражине шај те користине јавера алатке истражибаске (Из 2:1-6). Те шај те истражине похор, користин о маргине тари Библија — превод Нево свето хем о белешке коте со иси повише информацие башо несаво стихо (на пример акала белешке ко англиски викинена пе study notes), ако тане достапна ки несави чхиб со хаљовеа ла. Користин о Прирачнико истражибаске е Јеховаскере сведоконгоро или о Индекс башо публикацие таро е Јеховаскере сведокија те шај пошукар те хаљове со значинена о стихија.

О лил Библиска стихија со поможинена амен ко живото нека поможинел тут те дознајне и мудрост, о џандипе хем о хаљојбе со иси ки Библија. Џикоте користинеа акаја публикација ка ове панда поуверимо кај „е Девлескоро лафи тано џивдо хем силно“ (Ев 4:12).