„Кај сине о Девел?“

КЕДА ОВЕНА ЛОШНА БУЌА, ДАЛИ ПУЧЕА ТУТ: „КАЈ СИНЕ О ДЕВЕЛ?“ ИЛИ АКО ТУ ДОЖИВИНЃАН НЕСАВО ПХАРИПЕ КО ЖИВОТО ШАЈ ПУЧЕА ТУТ: „ДАЛИ Е ДЕВЛЕСКЕ ТАНО ГАЈЛЕ БАШИ МАНДЕ?“

Шај осетинеа тут сар и Шила, која со живинела ки Америка. Ој барили ки фамилија која со бут верујнела сине ко Девел. И Шила вакерела: „Панда сар чхаво верујнава сине кај постојнела Девел хем кај ов створинѓа амен. Сепак, никогаш на осетинѓум ман паше леа. Мислинава манге сине кај ов приметинела ман, ама кај нане леске гајле баши манде. На мислинава сине кај мрзинела ман, ама ни на мислинава сине кај мангела ман“. Соске и Шила сумнинела пе сине кај о Девел мангела ла? Ој вакерела: „Сар фамилија случинѓе пе аменге бут лошна буќа хем изглединела сине сар те пхене о Девел ни хари на поможинела амен“.

Шај ту да верујнеа кај постојнела Девел. Сепак шај пучеа тут дали ов чаче грижинела пе баши туке. О праведно мануш да о Јов сумнинѓа пе иако верујнела сине кај е Девле иси ле моќ хем мудрост (Јов 2:3; 9:4). Откеда случинѓе пе леске некобор трагедие јекх пало јекх хем мислинела сине кај нане нисаво решение баши лескири ситуација, о Јов пучља е Девле: „Соске иранеа тло муј мандар хем ки манде дикхеа сар тло душмани?“ (Јов 13:24).

Спрема и Библија дали о Девел тано криво башо лошна буќа со случинена пе? Иси ли доказија кај о Девел грижинела пе са е манушенге, ама хем секоле јекхеске лично? Сар шај те џане дали о Девел приметинела тут, хаљола тут, сикавела туке сочувство хем поможинела тут те икљове ко крајо е проблеменцар?

Ко следна статие ка дикха сар о начин сар створинѓа амен о Девел сикавела кај ов грижинела пе аменге (Римјања 1:20). Исто аѓаар ка дикха несаве буќа тари Библија кола со сикавена кај о Девел интересинела пе е манушенге. Кобор пошукар запознајнеа е Девле преку лескере створиме буќа хем преку лескоро Лафи, добором поуверимо ка ове кај ов грижинела пе туке (1. Јованескоро 2:3; 1. Петарескоро 5:7).