Дали о Девел приметинела тут?

СО СИКАВЕЛА АМЕНГЕ О НАЧИН САР СИЕМ СТВОРИМЕ

О прва 60 минутија откеда о бебе ка бијанѓовел тане важна те шај те прилагодинел пе ко живото аври тари матка е дајакири. Адалеске тано бут важно и дај те овел паше пле бебеа соске адава бут ка поможинел е бебеске те бајрол сар со ваљани.a

Со поттикнинела јекхе даја мангипаја те грижинел пе пле бебеске? Ко јекх списание, и професорка Џенет Креншо објаснинела кај откеда јекх џувли бијанела бајрола о хормони окситоцин „кова со керела о чувствија е дајакере те овен посилна џикоте астарела ле, дикхела ле хем дела ле те пиел тхуд“ (The Journal of Perinatal Education). Јекх јавер хормони со иси ко тело е дајакоро ко акава периоди „поможинела [лаке] те грижинел пе пле бебеске“ хем те осетинел пе радосно кеда тани леа. Соске акава тано важно?

Адава со и дај хем и дај тане добором паше, авела таро амаро мангло Девел о Јехова кова со керѓа са.b О цари о Давид вакерѓа кај о Девел „икалѓа ле таро е дајакоро воги“ хем кај керѓа те осетинел пе сигурно ки ангали пле дајакири. Ов молинѓа пе: „Таро мло бијандипе грижинеа тут манге, ту више сиан мо Девел таро време кеда сиум сине ко мле дајакоро воги“ (Псалм 22:9, 10).

РАЗМИСЛИН: Ако о Девел керѓа мангипаја и дај те грижинел пе пле бебеске, кобор повише о Девел грижинела пе секоле јекхеске амендар сар лескере чхаве! (Апостолија 17:29).

СО ВАКЕРЕЛА АМЕНГЕ И БИБЛИЈА

О Исус Христос, кова со пенџарела е Створителе пошукар таро било кој јавер, вакерѓа: „На бикинена пе ли дуј чирикља јекхе тикне параке? Сепак ни јекх лендар на перела ки пхув бизо те џанел тумаро Дад. А туменге чак секоја бал таро шеро тани гејми. Адалеске, ма даран, тумен врединена повише таро бут чирикља“ (Матеј 10:29-31).

Хари мануша приметинена секоле тикне чирикља, а несаве ни на дикхена кеда јекх чирикли перела ки пхув. Ама, амаро Дад сој ко небо приметинела секоле тикне чирикља. Ни јекх чирикли, па чак ни бут чирикља, нане леске повредна таро мануш. Значи, таро акава сикљоваја кај никогаш на ваљани те дара кај о Девел на приметинела амен. Уствари, амен сием леске бут важна!

И Библија уверинела амен

• „Е Јеховаскере јакхја тане ко секова тхан, дикхена хем е лошна хем е шукар манушен“ (ИЗРЕКИ 15:3).

• „О јакхја е Јеховаскере дикхена е праведникон хем лескере кана шунена кеда ола родена лестар помош“ (ПСАЛМ 34:15).

• „Ка радујнав ман башо тло верно мангипе, адалеске со ту дикхљан мли неволја. Ту џанеа кобор манге пхаро“ (ПСАЛМ 31:7).

„МИСЛИНАВА СИНЕ КАЈ О ЈЕХОВА НА МАНГЕЛА МАН“

Дали ка менинел пе аменге нешто ко живото ако џанаја кај о Девел интересинела пе аменге башо амаро шукарипе хем кај мангипаја грижинела пе аменге? Оја, аке јекх пример. И Ханаc тари Англија, вакерела:

„Бут пути мислинава сине кај о Јехова на мангела ман хем кај на одговоринела ко мле молитве. Мислинава сине кај адава шај тано аѓаар адалеске со нане ман доволно вера. Сине ман чувство кај о Девел казнинела ман хем кај на приметинела ман адалеске со на сиум леске важно. Мислинава сине кај е Девлеске едноставно нане гајле баши манге“.

Ама, авдиве и Хана на мислинела више аѓаар. Со менинѓа пе? Ој вакерела: „Мло стави менинѓа пе хари по хари. Сетинава ман ко јекх библиско говор англедер бут берша кова со керела сине лафи баши откупно жртва е Исусескири. Адава говор бут влијајнѓа упри манде хем уверинѓа ман кај о Јехова мангела ман. Хем кеда ка добинав сине одговор ко мле молитве, бут пути ровава сине соске хаљовава сине кај о Јехова чаче мангела ман. Исто аѓаар, адава со проучинава сине и Библија хем џава сине ко христијанска состанокија поможинѓа манге те сикљовав повише башо Јехова, башо адава саво тано хем башо адава сар дикхела ки аменде. Акана шај јасно те дикхав кај о Јехова мангела амен хем поддржинела амен, ама хем кај грижинела пе секоле јекхеске амендар“.

Акала лафија чаче охрабринена. Ама, сар шај те ове сигурно кај о Девел хаљола сар осетинеа тут хем кај тле чувствија леске важна? О одговор ко акава пучибе шај те дознајне ле ки следно статија.