Дали о Девел хаљола тут?

СО СИКАВЕЛА АМЕНГЕ О НАЧИН САР СИЕМ СТВОРИМЕ

Размислин башо адава кобор тане паше о мануша сој идентична близнакија. Ола тане поврзиме ко јекх посебно начин. И Ненси Сегал, која сој тани директорка ко Центар башо истражибе е близнакон хем кола со лате да иси ла близначка, вакерела кај несаве близнакија чак „џанена сар и те вакерен песке нешто хем скроз те хаљон пе бизо бут те керен лафи“. Јекх ромни објаснинѓа кобор тане паше ој хем лакири идентично близначка акале лафенцар: „Амен едноставно џанаја са јекх јекхаке“.

Соске шај о близнакија добором шукар те хаљон пе? О истражувања сикавена кај о тхан коте со бариле хем сар сине воспитиме влијајнела упри ленде, ама највише влијајнела адава со о идентична близнакија иси лен бут слична генија.

РАЗМИСЛИН: О Девел кова со керѓа акаја чудесно генетика, сигурно најшукар пенџарела секоле мануше. О псалмисти о Давид пишинѓа: „Аракхљан ман џикоте сиум сине ме дајаке ко воги. Мле кокала на сине туке гаравде џикоте бајровава сине ко тхан коте со никој нашти сине те дикхел ман... Тле јакхја дикхле ман ко воги мле дајакоро, ко тло лил сине пишиме са о делија таро мло тело“ (Псалм 139:13, 15, 16). Само о Девел целосно џанела хем хаљола амари генетика. Освен адава, ов џанела со доживинѓем хем сар са адава влијајнѓа упри аменде. Адава со о Девел добором шукар пенџарела амен хем амари генетика, уверинела амен кај ов целосно хаљола амен.

СО ВАКЕРЕЛА АМЕНГЕ И БИБЛИЈА

О Давид молинѓа пе: „Јехова, ту дикхљан хор ки манде хем ту пенџареа ман. Ту џанеа кеда бешава хем кеда уштава, хем ту чак дурал џанеа со иси ман ки годи. Панда англедер те вакерав нешто, ту Јехова, више џанеа со мангава те вакерав“ (Псалм 139:1, 2, 4). Исто аѓаар, о Јехова џанела со иси амен хор ко вило, па чак џанела са амаре мисле хем желбе (1. Летописи 28:9; 1. Самоилова 16:6, 7). Со сикавена аменге акала стихија башо Девел?

Чак хем кеда на вакераја ки молитва е Девлеске адава со мислинаја хем со осетинаја, ов дикхела со кераја ама хем хаљола соске кераја нешто. Исто аѓаар, ов дикхела кола шукар буќа би мангаја те кера лен, чак кеда баши амари несовршеност нашти те кера адава со би мангаја те кера. Хем адалеске со о Девел створинѓа амен аѓаар те шај те осетина мангипе, ов мангела те џанел амаре мисле хем амаре мотивија хем радујнела пе кеда кераја са таро мангипе (1. Јованескоро 4:7-10).

И Библија уверинела амен

• „Е Јеховаскере јакхја дикхена околен сој праведна хем лескере кана шунена ленгере молитве вакерде таро вило“ (1. ПЕТАРЕСКОРО 3:12).

• О Девел ветинела: „Ка поможинав тут те хаљове о буќа хем ка сикавав тут башо друмо пало кова со ваљани те џа. Ка дав тут совет, мли јакх ка овел упри туте“ (ПСАЛМ 32:8).

О ДЕВЕЛ БУТ ШУКАР ЏАНЕЛА САР И АМЕНГЕ

Дали адава со џанаја кај о Девел хаљола ки сави ситуација сием хем сар осетинаја амен, шај те поможинел аменге полокхесте те икљова ко крајо амаре проблеменцар? Размислин башо адава со уло е Анаке тари Нигерија. Ој вакерела: „Адалеске со аракхљовава сине ки пхари ситуација, пучава ман сине дали воопшто врединела те живинав. Сиум сине удовица хем грижинава ман сине ме чхајаке која со сине ки болница адалеске со сине ла хидроцефалус (одвише пани ки годи). Ко адава периоди аракхле манге рако ки годи хем ваљани сине те џав ки операција, хемотерапија хем радиотерапија. Сине манге бут пхаро со мора сине те овав ки болница ко исто време кеда сине ми чхај да“.

Со поможинѓа е Анаке те накхел са акала пхарипа? Ој пхенела: „Размислинѓум башо стихија таро Филипјања 4:6, 7 коте со пишинела кај ’о мир таро Девел, кова сој упредер таро адава со шај о мануш те хаљол, ка аракхел тумаре виле хем тумаре мисле‘. Секова пути кеда ка сетинав ман сине ко акава стихо, осетинава ман сине бут паше е Јеховаја хем џанава сине кај ов хаљола ман пошукар него ме коркори ман. Бут охрабринѓе ман мле мангле пхраља хем пхења таро христијанско собрание.

Иако понадари да боринава ман мле састипаја, хем ме хем ми чхај акана сием пошукар. Адалеске со о Јехова тано аменцар, сиклилем те на размислина негативно кеда ка овен амен проблемија. О стихо таро Јаков 5:11 уверинела амен: „Башо окола со истрајнѓе вакераја кај тане среќна. Шунѓен кобор истрајнѓа о Јов хем џанена сар о Јехова благословинѓа ле ко крајо — џанена кај о Јехова тано пхердо сочувство хем милост.‘“ О Јехова целосно халило ки сави ситуација сине о Јов, а шај те ова увериме кај ов хаљола таро со накхела секова јекх амендар.