Дали о Девел тано сочувствително?

СО СИКАВЕЛА АМЕНГЕ О НАЧИН САР СИЕМ СТВОРИМЕ

Те сикаве сочувство значинела те хаљове сар осетинена пе о јавера или те хаљове таро со накхена аѓаар со ка чхиве тут ленге ко тхан. О доктори Рик Хансон, кова сој психолого, вакерела кај о сочувство тано аменге ко рат.

РАЗМИСЛИН: Соске сар мануша иси амен способност те сикава сочувство хем адава бут повише таро животне? И Библија вакерела кај о Девел створинѓа е манушен спрема лескоро лико (1. Мојсеева 1:26). Адалеске, џи негде шај те сикава лескере особине. Значи, кеда о мануша поможинена е јаверенге адалеске со иси лен сочувство, тегани сикавена кај тане сар о Девел о Јехова, кова со створинѓа лен (Изреки 14:31).

СО ВАКЕРЕЛА АМЕНГЕ И БИБЛИЈА

О Девел сикавела аменге сочувство хем мрзинела кеда дикхела кај цидаја муке. На пример, ко пурано време о Израелција сине робија ко Египет хем пало адава сине лен бут муке џикоте сине 40 берш ки пустина. И Библија вакерела сар сине тегани е Девлеске: „Ко са о неволје со сине лен ов осетинѓа дукх“ (Исаија 63:9). Таро акава шај те дикха кај о Девел на само со џанља кобор ленге пхаро, него исто аѓаар осетинѓа ленгири дукх. Ов вакерѓа: „Шукар џанава ленгере дукха“ (2. Мојсеева 3:7). Исто аѓаар, вакерѓа: „Кој пипинела тумен, пипинела и зеница мле јакхјакири“ (Захарија 2:8). Кеда о јавера дукхавена амен, тегани ле да дукхала ле.

Шај мислинаја кај на врединаја хем кај на заслужинаја о Девел те сикавел аменге сочувство. Ама, и Библија уверинела амен кај „о Девел тано побаро таро амаро вило хем ов џанела са“ (1. Јованескоро 3:19, 20). О Девел пенџарела амен бут пошукар него амен коркори со џанаја амен. Ов бут шукар џанела таро со накхаја, амаре мисле хем сар осетинаја амен. Хем ов сикавела аменге сочувство.

И Библија уверинела амен

• „Тегани, ту ка викине, а о Јехова ка одговоринел туке. Ту ка роде помош, а ов ка вакерел туке: ’Аке сиум!‘“ (ИСАИЈА 58:9).

• „’Соске ме бут шукар џанава саве тане мле намере туменцар‘, вакерела о Јехова, ’мангава те овел тумен мир, а на неволја, те дав тумен иднина хем надеж. Тумен ка викинен ман, ка авен ки манде хем ка молинен тумен манге, а ме ка шунав тумен‘“ (ЕРЕМИЈА 29:11, 12).

• „Кхеде мле асва ко тло шиши тари кожа. Нане ли ола пишиме ко тло лил?“ (ПСАЛМ 56:8).

О ДЕВЕЛ ПРИМЕТИНЕЛА АМЕН, ХАЉОВЕЛА АМЕН ХЕМ СИКАВЕЛА АМЕНГЕ СОЧУВСТВО

Дали адава со џанаја кај о Девел сикавела аменге сочувство поможинела аменге кеда иси амен проблемија? Размислин башо е Маријакоро искуство:

„Мо чхаво сине дуј берш насвало таро рако. Кеда сине ле 18 берш, муло. Тегани осетинѓум бари дукх хем мислинѓум кај о живото тано пхаро хем нане фер. Сиум сине хољами е Јеховаске соске на керѓа ништо те шај те сасљарел ме чхаве.

Пало шов берш, јекх амалин која со бут грижинела пе сине хем сине ла сочувство спрема манде, шукар шунѓа ман џикоте вакерава лаке сине кај осетинава сар те пхене о Јехова на мангела ман. Откеда саатенцар шунѓа ман бизо те чхинавел ман, вакерѓа манге о стихо таро 1. Јованескоро 3:19, 20 кова со кхувѓа манге ко вило. Адатхе вакерела кај ’о Девел тано побаро таро амаро вило хем ов џанела са‘. Ој објаснинѓа манге кај о Јехова хаљола амаре муке.

Ама сепак ме панда осетинава сине холи. Пало адава, читинѓум ко Псалм 94:19 коте со пишинела: ’Кеда пхердиљум бут мисле со на дена ман мир, ту утешинѓан ман хем смиринѓан ман‘. Осетинѓум сар ка пхене акала стихија сине пишиме манге. Сар накхела сине о време, сине манге полокхо адалеске со шај сине те вакерав е Јеховаске башо адава со мучинела ман адалеске со џанава сине кај ов шунела ман хем хаљовела ман“.

Кобор утешинела амен адава со џанаја кај о Девел хаљовела амен хем сикавела сочувство спрема аменде! Ама, ако тано адава аѓаар, соске иси бут муке? Дали о Девел казнинела амен башо амаре гревија? Дали ка керел нешто те шај те чхивел крајо е мукенге? Башо акава ка кера лафи ко следна статие.