Дали о муке тане казна таро Девел?

И ЛУЗИА ЛАНГАЛА ПЕ ЛЕВО ПРЕА. Сар тикни добинѓа детско парализа, бут заразно насвалипе кова со нападинела о нервен систем. Кеда е Луиза сине ла 16 берш, јекх ромни ки која со керела сине бути вакерѓа лаке: „О Девел казнинѓа тут те ове парализирими адалеске со на понашинеа тут сине шукар те дајаја хем на шунеа ла сине“. Иако оттегани накхле бут берша, и Лузиа панда сетинела пе кобор дукхавѓе ла акала лафија.

КЕДА И ДАМАРИС ДОЗНАЈНЃА КАЈ ИСИ ЛА РАКО КИ ГОДИ, лакоро дад пучља ла: „Со керѓан па со случинела пе туке акава? Сигурно керѓан нешто бут лошно. Адалеске о Девел казнинела тут“. О лафија лакере дадескере бут дукхавѓе ла.

О мануша више бершенцар верујнена кај о насвалипа тано казна таро Девел. Ко јекх лил ко кова со керела пе лафи башо обичаија ко библиска пхувја, пишинела кај бут мануша ко време е Исус Христосескоро верујнена сине кај „кеда некој ка насваљовел адава сине казна башо лескере гревија или о гревија лескере фамилијакере“ (Manners and Customs of Bible Lands). Ко јекх јавер лил вакерела кај ко средно веко „несаве мануша верујнена сине кај о Девел мукхља заразно насвалипе те шај те казнинел лен башо ленгере гревија“ (Medieval Medicine and the Plague). Ама кеда ко 14 веко милиоња мануша ки Европа муле таро адава заразно насвалипе, дали о Девел аѓаар казнинѓа е лошна манушен или адава заразно насвалипе ало адалеске со сине бактериско инфекција, сар со покасно хем докажинѓа и медицина? Авдиве да несаве мануша пучена пе дали о Девел користинела о насвалипа те шај те казнинел е манушен башо ленгере гревија.a

РАЗМИСЛИН: Соске о Исус би сасљарела сине насвален ако о Девел казнинела е манушен насвалипаја хем мукенцар? Дали адалеа би сикавела сине кај о Девел нане праведно? (Матеј 4:23, 24). О Исус никогаш на би џала сине против е Девлескири волја. Ов вакерѓа: „Ме секогаш керава адава сој спрема лескири волја хем керава аѓаар сар со заповединѓа манге о Дад“ (Јован 8:29; 14:31).

И Библија јасно вакерела аменге. О Јехова о Девел „нане неправедно“ (5. Мојсеева 32:4). На пример, о Девел никогаш на би керела те перел авиони хем те мерен бут мануша кола со нане крива само адалеске со мангела те казнинел некас сој ко адава авиони. О верно слуга е Девлескоро, о Авраам, сине уверимо кај о Девел тано праведно. Ов вакерѓа кај о Девел никогаш нане те мударел „е праведнико заедно околеа сој лошно“ (1. Мојсеева 18:23, 25). Исто аѓаар, и Библија вакерела кај „нашти о чачутно Девел те керел лошнипе, о Семоќно те на овел праведно“ (Јов 34:10-12).

СО ВАКЕРЕЛА АМЕНГЕ И БИБЛИЈА

О муке со цидаја лен нане казна таро Девел башо несаве амаре гревија. Коркори о Исус јасно вакерѓа акава кеда ов хем лескере ученикија дикхле јекхе мануше кова со бијандило короло. Ки Библија пишинела: „Лескере ученикија пучле ле: ’Раби, кој грешинѓа па со акава мануш бијандило короло, ов или лескере родителија?‘ А о Исус одговоринѓа ленге: ’На грешинѓа ни ов, а ни лескере родителија‘“ (Јован 9:1-3).

Адалеске со ко адава време бут мануша дикхена сине погрешно ко буќа, е Исусескере ученикија сине изненадиме кеда о Исус вакерѓа кај о мануш на сине короло адалеске со ов или лескоро дад хем и дај грешинѓе. О Исус на само со сасљарѓа е короле мануше, него хем ов сикавѓа кај о Девел на казнинела е манушен насвалипаја, сар со погрешно верујнела пе (Јован 9:6, 7). Са околенге со авдиве иси лен пхаре насвалипа, шај те локхјол ленге кеда ка џанен кај о Девел на анела ленге адала муке.

И Библија уверинела амен

• „Нијекх нашти искушинела е Девле лошнипаја, а ов да на искушинела никас лошнипаја“ (ЈАКОВ 1:13). Чаче, о лошна буќа сар сој о насвалипе, о муке хем о мерибе веконцар мучинена е манушен, ама панда хари о Девел ка цидел лен засекогаш.

• О Исус Христос „сасљарѓа са околен со сине насвале“ (МАТЕЈ 8:16). Адалеа со сасљарѓа саринен со авена сине ки лесте, е Девлескоро Чхаво сикавѓа со ка керел е Девлескоро Царство ки цели пхув.

• „[О Девел] ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха. Са со сине англе накхља“ (ОТКРОВЕНИЕ 21:3-5).

КОЈ ТАНО КРИВО БАШО МУКЕ СО ЦИДАЈА ЛЕН?

Соске тегани е манушен иси лен добором муке хем дукха? Акава пучибе мучинела е манушен веконцар. Ако о Девел нане криво башо муке со цидаја лен, тегани кој тано криво? Ки следно статија ка дикха о одговорија ко акала пучиба.