Берекетија околенге со поможинена е јаверенге

Буте џененге ко свето ваљанела храна хем тхан живибаске. А несавенге са со ваљани тани и надеж баши иднина. О Девел мангела те поможина асавке манушенге хем ка дел амен берекетија ако кераја адава.

СО ПИШИНЕЛА КО Е ДЕВЛЕСКОРО ЛАФИ

„Кој сикавела шукарипе е чоролеске, дела заем е Јеховаске хем ов ка платинел леске башо адава со керела“ (ИЗРЕКИ 19:17).

СО ЗНАЧИНЕЛА ТЕ ПОМОЖИНА АДАЛЕНГЕ СО ВАЉАНИ ЛЕНГЕ ПОМОШ

О Иса вакерѓа јекх споредба башо јекх мануш со сине мардо таро чора хем со мукхле ле те мерел (Лука 10:29-37). Јекх јабанџија ачхило хем поможинѓа ле. Ов керѓа адава иако сине тари јавер националност.

Акава мануш на само со пханља лескере ране хем денѓа ле материјално помош, него исто аѓаар локхјарѓа лескири дукх.

Со сикљоваја тари акаја споредба? О Иса сикавѓа кај ваљани те кера са со шај те поможина околенге со ваљанела ленге несави помош (Изреки 14:31). Таро е Девлескоро Лафи дознајнаја кај о Девел панда хари ка чхивел крајо е чоролипаске хем е мукенге. Шај пучаја амен сар хем кеда ка овел адава? Ки следно статија ка дикха саве берекетија ка дел амен амаро Створители ки иднина.