Кеда ка авел о крајо? Со пхенѓа о Исус?

РАЗМИСЛИН БАШО АКАЛА ДУЈ БУЌА СО ВАКЕРЃА ЛЕН О ИСУС БАШО КРАЈО:

„Ачховен џангавде, соске, на џанена ни о диве ни о време“ (МАТЕЈ 25:13).

„Пазинен, овен џангавде, соске на џанена кеда тано о време те овел адава“ (МАРКО 13:33).

Никој ки Пхув на џанела кеда точно ка авел о крајо акале светоскоро. Ама, о Девел одрединѓа „о диве хем о време“ кеда ка авел о крајо (Матеј 24:36). Дали адава значинела кај амен нашти те џана дали о крајо тано паше? На. О Исус вакерѓа пле учениконге те дикхен о бут настанија со ка сикавен кај о крајо тано бут паше.

О ЗНАКО

Акала настанија ка овен о знако таро крајо акале светоскоро. О Исус вакерѓа: „Ка уштел народо против народо, хем царство против царство, хем ка овел бокхалипе хем земјотресија ко разна тхана“ (Матеј 24:3, 7). Исто аѓаар, ов вакерѓа кај ка овен „заразна насвалипа“, јавере лафенцар епидемие (Лука 21:11). Дали дикхеа сар исполнинена пе о настанија со пророкујнѓа лен о Исус?

Авдиве о мануша цидена муке адалеске со иси војне, бокхалипе, земјотресија хем јавера катастрофе кола со овена јекх пало јекх. На пример, ко 2004 берш јекх бут баро земјотрес ко Индиско Океани предизвикујнѓа цунами кова со мударѓа околу 225.000 манушен. Само трине бершенге, и пандемија КОВИД-19 мударѓа 6,9 милиоња манушен ко цело свето. О Исус вакерѓа кај акала настанија сикавена кај о крајо е светоскоро тано паше.

„О ПОСЛЕДНА ДИВЕ“

О периоди англедер те авел о крајо и Библија викинела ле „последна диве“ (2. Петрово 3:3, 4). Ко 2. Тимотеј 3:1-5 пишинела кај о мануша ка овен са полошна хем полошна. (Дикх и рамка „Кратко англедер те авел о крајо акале светоскоро“.) Дали авдиве дикхеа мануша кола сој тане себична, алчна, насилна хем на сикавена мангипе јекх јекхеске? Акава тано панда јекх доказ кај о крајо тано бут паше.

Кобор ка трајнен о последна диве? И Библија пхенела само „хари време“. Пало адава, о Девел ка уништинел „околен со уништинена и пхув“ (Откровение 11:15-18; 12:12).

ПАШЕ ТАНО О РАЈ КИ ПХУВ!

О Девел више одрединѓа о диве хем о време кеда ка уништинел са о лошна буќа таро акава свето (Матеј 24:36). Ама, иси панда јекх шукар хабери — о Девел „на мангела никој те овел уништимо“ (2. Петрово 3:9). Ов дела са е манушенге прилика те сикљовен баши лесте хем те овен леске послушна. Соске? Адалеске со мангела те преживина о крајо акале светоскоро хем те живина ко лескоро нево свето, кеда цело Пхув ка овел рај.

О Девел грижинѓа пе те шај са о мануша те сикљовен сар шај те овен дело таро лескоро нево свето коте со ка владинел лескоро Царство. О Исус вакерѓа кај о шукар хабери башо е Девлескоро Царство „ка проповединел пе ко цело свето“ (Матеј 24:14). Ко цело свето, е Јеховаскере сведокија накхавѓе повише милијарде саатија те сикавен хем те проповединен е јаверенге о хабери баши надеж со дела ла и Библија.

Панда хари ка авел време кеда о мануша нане више те владинен. Ама, о шукар хабери тано кај ту шај те преживине о крајо акале светоскоро хем те ове дело таро рај кова со ветинѓа ле о Девел. И следно статија ка керел лафи башо адава со ваљани те кере те шај те живине ко адава нево свето.