СТАТИЈА ПРОУЧИБАСКЕ 6
Со вакерела и Библија башо пло Автори?
Пишин ко јекх лил са о лафија со вакерава лен туке (ЕРЕМ. 30:2)
ГИЛИ 96 Е Девлескоро лил — барвалипе
БАШО СО КА КЕРА ЛАФИa
1. Соске сиан благодарно баши Библија?
БУТ сием благодарна е Јеховаске со денѓа амен и Библија. Преку лате ов дела амен мудра советија со шај те поможинен аменге те џана со те кера кеда иси амен проблемија. Исто аѓаар, дела амен јекх бут шужи надеж баши иднина. А сој панда поважно, преку лате ов откринела аменге бут буќа баши песте. Кеда размислинаја башо лескере бут шуже особине, адава поттикнинела амен те ова паше амаре Девлеа (Пс. 25:14).
2. Ко саве различна начинија откринѓа о Јехова саво тано?
2 О Јехова мангела о мануша те џанен ле. Ко пурано време ов користинѓа суне, визие хем чак ангелија те шај те откринел саво тано (4. Мој. 12:6; Дела 10:3, 4). Ама дали ка шај сине те џана акала суне, визие или пораке таро ангелија ако на би овена сине пишиме? Адалеске о Јехова мукхља мануша „те пишинен ко јекх лил“ адава со мангља те џана (Ерем. 30:2). О „друмо е чачутне Девлескоро тано совршено“, адалеске шај те ова увериме кај акава начин сар комунициринела аменцар тано најшукар хем најкорисно (Пс. 18:30).
3. Со керѓа о Јехова те шај те овел амен авдиве и Библија? (Исаија 40:8).
3 Читин Исаија 40:8. Е Девлескоро Лафи некобор милја берша дела мудро водство е верна муршенге хем џувленге. Ама сар шај те овел адава? Акава тано шукар пучибе, соске џанаја кај авдиве нане амен о оригинална свитокија соске сине пишиме англедер бут време хем ко материјали со кирњола. О Јехова водинѓа манушен те препишинен о света списија. Иако акала препишувачија сине несовршена, ола сине бут внимателна. На пример, башо Хебрејска списија јекх изучувачи пишинѓа: „Сигурна сием кај нијекх пурано лил на сине добором точно препишимо сар о Хебрејска списија“. Значи, иако и Библија сине пишими бут време англедер хем ко материјали со распадинела пе, а о мануша со препишинѓе ла сине несовршена шај те ова сигурна кај о лафија со читинаја ки амари Библија пренесинена о мисле е Авторескере, е Јеховаскере.
4. Со ка дикха ки акаја статија?
4 О Јехова дела амен „секова шукар хем совршено поклон“ (Јак. 1:17). И Библија тани јекх таро најшукар поклонија со денѓа амен о Јехова. Таро јекх поклон дознајнаја нешто повише башо окова со денѓа амен адава поклон. На пример, дознајнаја кобор шукар џанела амен хем кај џанела со ваљани аменге. О исто важинела башо окова со денѓа амен и Библија. Кеда истражинаја акава поклон, амен сикљоваја бут башо Јехова. Сикљоваја кобор шукар џанела амен хем кај џанела со ваљани аменге. Ки акаја статија ка дикха со сикавела амен и Библија башо трин таро е Јеховаскере особине: лескири мудрост, лескири правда хем лескоро мангипе. Прво те кера лафи башо адава сар и Библија сикавела е Девлескири мудрост.
И БИБЛИЈА СИКАВЕЛА Е ДЕВЛЕСКИРИ МУДРОСТ
5. Кова тано јекх начин сар и Библија сикавела е Девлескири мудрост?
5 О Јехова џанела кај ваљани аменге лескоро мудро совет. Адалеске лескоро поклон, и Библија, тано пхердо мудро советенцар. О библиска советија позитивно влијајнена упро мануша. И Библија менинела животија. Кеда о Мојсеј пишинѓа о прво лил тари Библија, ов вакерѓа е Девлескере народоске е Израелцонге: „Акала нане чуче лафија него значинена туменге живото“ (5. Мој. 32:47). Окола со сине послушна шај сине те овел лен успешно хем радосно живото (Пс. 1:2, 3). Иако е Девлескоро Лафи сине пишимо англедер бут време, сепак иси ле панда моќ те менинел е манушенгоро живото ко пошукар. На пример ки jw.org, ки рубрика „И Библија менинела животија“ шај те аракхе повише искуствија со сикавена кај е Библија авдиве иси ла моќ те менинел животија (1. Сол. 2:13).
6. Соске шај те вакера кај и Библија нане сар о јавера лила?
6 Нијекх јавер лил нане сар е Девлескоро Лафи. Соске? Адалеске со о автори акале лилескоро, о Јехова тано Семоќно, Вечно хем Најмудро. Бут јавера лила понадари да читинена пе иако ленгоро автори муло, ама бут пути о советија таро адала лила пало несаво време на врединена. Тари јавер страна, о мудра советија тари Библија тане вечна хем докажинѓе кај тане корисна е манушенге таро било саво време. Џикоте читинаја акава свето лил хем хор размислинаја башо адава, о Автори користинела пло моќно свети дух те поможинел аменге те дикха сар шај те применина о библиска советија ко амаро живото (Пс. 119:27; Мал. 3:16; Евр. 4:12). Оја, о Автори е Библијакоро тано спремно те поможинел тут. Акава ваљани те поттикнинел амен редовно те читина и Библија.
Сар и Библија поможинѓа те овел јекхипе машкар е Јеховаскоро народо хем ко пурано време хем ко амаро време? (Дикх ко пасусија 7-8)
7. Сар и Библија поможинѓа е Девлескере народоске ко пурано време те ачхол ко јекхипе?
7 Јавер начин сар и Библија сикавела е Девлескири мудрост тано аѓаар со поможинела е Девлескере народоске те овел ко јекхипе. Кеда о Израелција кхувѓе ки Ветими пхув, ола на ачхиле заедно ко јекх тхан него почминѓе те живинен ко различна тхана. Несаве уле рибарија, несаве аракхена сине животне а јавера сине земјоделција. О Израелција со живинена сине ко јекх дело тари Ветими пхув шај сине локхе те бистрен те грижинен пе е јавере Израелцонге со живинена сине ко јавер дело тари адаја пхув. Ама о Јехова вакерѓа ленге те кхеден пе заедно некобор пути ко берш те шај те шунен сар лескоро Лафи тано читимо хем објаснимо (5. Мој. 31:10-13; Неем. 8:2, 8, 18). Замислин сар осетинѓа пе јекх Израелцо кеда ресља ко Ерусалим хем шај дикхља милиоња Израелцон таро секова дело тари Ветими пхув. Ко акава начин о Јехова поможинѓа ленге те ачховен ко јекхипе. Покасно, ко христијанско собрание сине мурша хем џувља со керена сине лафи ко различна чхибја. Несаве лендар сине позната, а јавера на. Несаве лендар сине барвале, а несаве чороле. Ама адалеске со сарине мангена сине о списија, ола заедно обожавинена сине е Девле. Окола со уле верникија шај сине те хаљовен е Девлескоро Лафи само ако кхедена пе сине е јаверенцар хем ако о јавера поможинена сине ленге (Дела 2:42; 8:30, 31).
8. Сар и Библија поможинела е Јеховаскере народоске авдиве те овел ко јекхипе?
8 Амаро мудро Девел понадари да користинела и Библија те шај те сикавел пле народо хем те икерел ле ко јекхипе. Ки лате пишинела са о чачипа со ваљани те џана башо Јехова. Редовно кхедаја амен ко амаре состанокија хем конгресија те шуна сар и Библија тани читими хем објасними. Значи е Библија иси ла важно улога ки е Јеховаскири намера те поможинел пле слугенге „те служинен леске сложно“ (Соф. 3:9).
9. Која особина тани важно те шај те хаљовел пе и порака тари Библија? (Лука 10:21).
9 Те дикха јекх јавер доказ баши е Јеховаскири мудрост. Ов мукхља повише делија тари Библија те овен пишиме ко начин со шај те хаљовен лен само о понизна мануша. (Читин Лука 10:21.) О мануша ко цело свето читинена и Библија. Јекх изучувачи вакерѓа кај „на само со и Библија тани о најчитимо лил, него исто аѓаар ој тани о најистражимо лил таро било кова јавер“. Ама само о понизна мануша чаче хаљовена со пишинела ки лате хем применинена адава (2. Кор. 3:15, 16).
10. Ко кова јавер начин и Библија сикавела е Јеховаскири мудрост?
10 Тари Библија сикљоваја јавер да нешто баши е Јеховаскири мудрост. О Јехова на користинела и Библија те сикавел амен само сар група, него исто аѓаар те шај секоле јекхе лично те сикавел хем те утешинел. Кеда читинаја е Јеховаскоро Лафи шај те дикха кај ов интересинела пе секоле јекхеске лично (Иса. 30:21). Кобор пути случинѓа пе туке кеда сине тут проблеми те ле и Библија хем те читине јекх стихо кова со ка пхене сине пишимо баш туке? Ама и Библија тани денди милиоња манушенге, тегани сар шај ки лате те овен пишиме буќа кола со баш туке ваљанена? Иси само јекх одговор башо адава — и Библија тани пишими таро најмудро Автори (2. Тим. 3:16, 17).
И БИБЛИЈА СИКАВЕЛА Е ДЕВЛЕСКИРИ ПРАВДА
11. Сар сикавѓа о Девел кај тано непристрасно кеда и Библија сине пишими?
11 Јекх јавер особина е Јеховаскири тани и правда (5. Мој. 32:4). Некој сој тано праведно често тано исто аѓаар непристрасно, хем о Јехова тано баш асавко (Дела 10:34, 35; Рим. 2:11). Лескири непристрасност шај те дикха ла таро адава ко саве чхибја сине пишими и Библија. О прва 39 лила тари Библија главно сине пишиме ки хебрејско чхиб. Ко адава време адаја чхиб сине најпенџарди машкар е Девлескоро народо. Ама ко прво веко а.е., о побаро дело таро христијања керена сине лафи ки грчко чхиб. Адалеске о последна 27 лила тари Библија главно сине пишиме ки адаја чхиб. О Јехова на ограничинѓа лескоро Лафи те овел пишимо само ки јекх чхиб. Авдиве иси околу 8 милијарде мануша ко свето кола со керена лафи ко различна чхибја. Сар шај добором мануша те сикљон башо Јехова?
12. Кова тано јекх начин колеа со исполнинена пе о лафија таро Даниел 12:4 ко акала последна диве?
12 Преку о пророко о Даниел о Јехова ветинѓа кај ко последна диве „о чачутно пенџарибе“ со аракхљола ки Библија „ка бајрол“. Бут џене ка хаљон адава чачипе. (Читин Даниел 12:4.) Јекх начин сар о пенџарибе барило тано аѓаар со превединѓа пе, издајнѓа пе хем денѓа пе Библие хем библиско литература. И Библија ули о најпреведимо хем о најдостапно лил ко свето. О библиска преводија кола сој печатиме таро фирме тане понекогаш бут скупа. Ама е Јеховаскоро народо џи акана превединѓа е Девлескоро Лафи, целосно или несаве делија лестар, ко повише таро 240 чхибја хем секој шај бесплатно те добинел и Библија. Адалеске о мануша таро са о нацие ка шунен „о шукар хабери башо Царство“ англедер те авел о крајо (Мат. 24:14). Амаро Девел сој праведно мангела те дел со повише манушенге и прилика те пенџарен ле аѓаар со ка читинен лескоро Лафи. Ов керела адава соске бут мангела амен.
И БИБЛИЈА СИКАВЕЛА Е ДЕВЛЕКОРО МАНГИПЕ
13. Соске шај те вакера кај и Библија сикавела е Јеховаскоро мангипе? (Јован 21:25).
13 И Библија поможинела аменге те хаљова кај е Јеховаскири најбари особина тани о мангипе (1. Јов. 4:8). Размислин башо адава со мукхља о Јехова те овел пишимо ки Библија, а со на. Ов пишинѓа само адава со ваљани аменге те шај те ова леа паше, те овел амен шукар живото акана хем вечно живото ки иднина. Ама адалеске со мангела амен, ов на пхерѓа амен буте информациенцар кола со на ваљани аменге. (Читин Јован 21:25.)
14. Ко кова јавер начин и Библија сикавела кај о Девел мангела амен?
14 О Јехова исто аѓаар сикавела аменге мангипе адалеа со на понижинела амен кеда комунициринела аменцар. Ов на дела амен баро списако правилонцар хем на вакерела аменге со те кера а со на ко секова дело таро амаро живото. Наместо адава, поттикнинела амен коркори те размислина аѓаар со користинела искуствија, пророштвија хем корисна советија те шај те поможинел амен те ана шукар одлуке. Ко асавко начин е Девлескоро Лафи поттикнинела амен те манга ле хем таро вило те ова леске послушна.
Соске ваљани те размислина башо адава сар о Јехова постапинѓа пле слугенцар ко пурано време? (Дикх ко пасус 15)
15. а) Сар о Јехова сикавела кај грижинела пе околенге со читинена лескоро Лафи? б) Сар со дикхаја ки слика, башо кола библиска личностија размислинена и тикни чхај, о терно пхрал хем и попхури пхен? (1. Мој. 39:1, 10-12; 2. Цар. 5:1-3; Лука 2:25-38).
15 И Библија сикавела кај о Јехова бут грижинела пе аменге. Сар? Ки лате иси бут извештаија коте сој опишиме е манушенгере чувствија. Амен шај те хаљова акале манушен соске лен да сине лен „чувствија исто сар амаре“ (Јак. 5:17). А сој панда поважно кеда дикхаја сар о Јехова понашинѓа пе е манушенцар сој слична сар аменде, амен панда повише шај те хаљова кај „о Јехова тано пхердо сочувство хем милост“ (Јак. 5:11).
16. Со сикљоваја башо Јехова кеда ки Библија читинаја башо мануша со грешинѓе? (Исаија 55:7).
16 И Библија сикавела е Јеховаскоро мангипе спрема аменде ко јекх јавер да начин. Ој уверинела амен кај о Девел нане те цидел пе амендар кеда ка грешина. О Израелција бут пути грешинѓе против о Јехова, сепак кеда таро вило каинѓе пе о Девел простинѓа ленге. (Читин Исаија 55:7.) О христијања таро прво веко исто аѓаар џанле кај о Девел бут мангела лен. Машкар ленде сине јекх мануш кова со керела сине баро грево хем пало адава каинѓа пе, ама водимо таро Девел о апостол Павле поттикнинѓа е јавере христијанен те простинен леске хем те утешинен ле (2. Кор. 2:6, 7; 1. Кор. 5:1-5). Кобор тано охрабрувачко со о Јехова на отфрлинѓа пле слуген само адалеске со грешинѓе леске. Наместо адава, о Јехова пружинѓа ленге пло вас, исправинѓа лен хем дозволинѓа ленге палем те овен леа паше. Ов ветинела кај ка керел о исто са околенге со каинена пе авдиве (Јак. 4:8-10).
ЦЕНИН О „ШУКАР ПОКЛОН“ И БИБЛИЈА
17. Соске и Библија тани јекх посебно поклон?
17 О Јехова денѓа амен бут шужо поклон. Соске лескоро Лафи тано посебно? Сар со дикхлем, и Библија сикавела е Девлескири мудрост, лескири правда хем лескоро мангипе. Акава лил сикавела кај о Јехова мангела те џана ле. Ов мангела те ова лескере амала.
18. Сар шај те сикава кај сием благодарна башо е Јеховаскоро „шукар поклон“ и Библија?
18 На мангаја те бистра кај е Девлескоро Лафи тано скапоцено поклон (Јак. 1:17). Адалеске понадари да те сикава амари благодарност аѓаар со ка читина акава лил хем хор ка размислина башо адава. Џикоте кераја адава шај те ова сигурна кај е Библијакоро Автори ка наградинел амаро трудо хем аѓаар ка пенџара шукар е Девле (Изр. 2:5).
ГИЛИ 98 И Библија тани денди таро Девел
a И Библија поможинела аменге те ова паше е Јеховаја. Со шај те сикљова таро акава свето лил баши е Девлескири мудрост, правда хем мангипе? Адава со ка дикха шај те поможинел аменге панда повише те ценина е Девлескоро Лафи хем те хаљова кај и Библија тани поклон таро амаро небесно Дад.