Дикхљум е Јеховаскере народоскири вера

Асандиљум соске на мислинѓум кај мо амал тано религиозно мануш. Тегани пучљум ле: „Со џанеа тари Библија?“ На мангља одма те одговоринел. Ко крајо вакерѓа кај лескири дај тани Јеховаскоро сведоко хем кај сиклило некобор буќа латар. Мангљум те џанав нешто повише хем адалеске вакерѓум леске те продолжинел.

Амаро разговор трајнѓа џи касно раќате. Мло амал вакерѓа манге кај и Библија откринела кај о Сатана тано владетели е светоскоро (Јован 14:30). Шај ту акава џанеа цело тло живото, ама манге акава сине нешто скроз нево. Ме секогаш шунава сине кај јекх љубезно хем шукар Девел владинела упро свето. Ама акава на сине манге логично соске дикхава сине со случинела пе ко свето. Иако сине ман само 26 берш, дикхљум бут буќа со разочаринѓе ман.

Мо дад сине пилоти ки американско војска. Адалеске, сар терно дарава сине кај шај те почминел јекх нуклеарно војна, соске и војска секогаш сине спремно башо асавко нешто. Џикоте џава сине ко факултети ки Калифорнија, панда трајнела сине и војна ко Виетнам. Џикоте протестиринава сине мле соучениконцар, о полицајција прастана сине пали аменде пендраконцар хем фрдена сине солзавец кова со загушинѓа амен хем керѓа те на дикха шукар. Ко адава време сине немир хем бунт. Сине бут атентатија упро политичарија, сине протестија хем немирија. Саринен сине лен различно размислување башо адава со ваљани те кера. Хем о мануша на џанена сине сар те постапинен.

Ко 1970 берш, кхувѓум ки бути ко северно дело тари Алјаска хем заработинѓум бут паре. Пало адава гељум ко Лондон, кинѓум манге мотори хем возинѓум ко јужно правцо бизо те џанав кај џава. Пало несаве масекија ресљум ки Африка. Ко друмо запознајнѓум манушен кола со исто аѓаар мангле те нашен таро пумаре проблемија.

Са адава со дикхљум хем шунѓум уверинѓа ман кај тано логично адава со сикавела и Библија кај о Бенг контролиринела о буќа ко свето. Ама ако о Девел на контролиринела о свето тегани со керела? Мангљум те џанав адава.

Пало некобор масекија аракхљум о одговор. Ко адава време запознајнѓум хем замангљум буте џенен кола со ко било саве околностија докажинѓе кај тане верна е единствено чачутне Девлеске.

СЕВЕРНО ИРСКА — „И ПХУВ Е БОМБЕНГИРИ ХЕМ Е КУРШУМЕНГИРИ“

Кеда иранѓум ман ко Лондон родинѓум мле амалескере даја хем ој денѓа ман Библија. Покасно кеда гељум ко Амстердам, ки Холандија, јекх Сведоко дикхља сар читинава и Библија ки улица хем поможинѓа манге те дознајнав нешто повише. Пало адава гељум ко Даблин, ки Ирска, хем аракхљум и подружница е Јеховаскере сведоконгири. Кеда кхувѓум андре запознајнѓум јекхе искусно хем мудро пхрале, о Артур Метју. Тегани пучљум ле дали шај те проучинел манцар и Библија хем ов согласинѓа пе.

Дикхава сине сериозно ко проучибе хем едвај аџикерава сине те читинав о лила хем о публикацие. Исто аѓаар читинѓум цело Библија. Уживинава сине ко адава. Ко состанокија дикхава сине кај чак о чхаве џанена сине о одговорија башо пучиба коленге со веконцар несаве учиме мануша на сине лен одговор, сар сој: „Соске иси лошнипе? Кој тано о Девел? Со случинела пе кеда мераја?“ Адалеске со на џанава сине никас ки адаја пхув, дружинава ман сине само Сведоконцар. Хем адава сине шукар соске ола поможинѓе манге те овав попаше е Јеховаја хем те мангав те керав лескири волја.

Крстинѓум ман ко 1972 берш. Пало јекх берш почминѓум е пионерско службаја хем почминѓум те служинав ко јекх тикно собрание ко Новори, ки Северно Ирска. Живинава сине ко јекх кхер киријаја ки планина. Паше узо кхер сине гурумња хем користинава лен сине сар публика те шај англи ленде те вежбинава мле говорија. А ола сар те пхене внимателно шунена ман сине џикоте хана сине чар. Ола нашти сине те советинен ман ама поможинѓе манге те дикхав ки публика џикоте икерава сине говор. Ко 1974 берш уљум специјално пионери заедно е пхралеа Нигел Пит, кова со уло манге паше амал.

Ко адава време ки Северно Ирска сине баро конфликт. Адалеске ој сине пенџарди сар „и пхув е бомбенгири хем е куршуменгири“. Нормално сине те дикха манушен сар марена пе ки улица, пукајбе хем сар о врдија експлодиринена сине. Са акала проблемија сине хем баши политика хем баши религија. Ама хем о протестантија хем о католикија халиле кај е Јеховаскере сведокија на мешинена пе ки политика адалеске шај сине слободно хем безбедно те проповедина. О станарија бут пути џанена сине коте хем кеда ка овел марибе хем адалеске предупрединена амен сине те на џа атхе.

Сепак сине амен исто аѓаар опасна ситуацие. Јекх диве ме хем о Денис Кариген, јекх пионери, проповединѓем ки јекх диз колате со сием сине само јекх пути хем колате со на сине Сведокија. Јекх џувли обвининѓа амен кај сием тајна британска војникија, веројатно мислинѓа аѓаар адалеске со никој амендар на керела сине лафи ирско акцентеа. Акава даравѓа амен соске ко адава време чак те поздравине тут сине јекхе војникоја ов шај сине те мударел тут или те пукајнел тут ко пре. Џикоте ко шудро аџикераја сине те авел о автобуси дикхлем сар јекх врда ачхило ко кафичи коте со сине и џувли со обвининѓа амен. Ој иклили хем керѓа лафи е дује муршенцар ко врда хем сикавѓа ки аменде. Ола похари возинѓе џи ки аменде хем пучле амен кеда ка авел о автобуси. Кеда ресља о автобуси ола керѓе лафи е возачеа. Нашти сине те шуна со керена лафи. Ко автобуси на сине јавера мануша адалеске мислинѓем кај мангена те керен аменге нешто аври тари диз. Ама адава на случинѓа пе. Кеда хулиљум таро автобуси пучљум е возаче: „Дали адала мануша со керѓе туја лафи пучле тут нешто баши аменде?“ Ов одговоринѓа: „Вакерѓум кој сиен соске џанава тумен. Ма секиринен тумен. Нане со те даран.“

Ко 1976 берш ко областно конгресa ко Даблин, запознајнѓум јекхе специјално пионерка со посетинѓа амен тари Англија, и Паулине Ломакс, јекх духовно, скромно хем љубезно пхен. Ој хем лакоро пхрал о Реј бијандиле ко чачипе. Пало јекх берш ме хем и Паулина лелем амен хем понадари да служинаја сине сар специјална пионерија ки Балимина, ки Северно Ирска.

Јекх време сием сине ки покраинско служба хем служинаја сине е пхраленге ко Белфест, Лондондери хем јавера тхана. Сием сине охрабриме тари вера е пхраленгири хем е пхењенгири кола со отфрлинѓе о религиозна ховајба, и пристрасност хем и омраза само те шај те служинен е Јеховаске. Ов сигурно наградинѓа лен хем заштитинѓа лен.

Живинѓум ки Ирска 10 берш. Тегани ко 1981 берш сием сине каниме те учествујна ко 72 класи ки школа Гилеад. Пали школа сием сине бичхалде те служина ки Сиера Леоне ки Западно Африка.

СИЕРА ЛЕОНЕ — СИНЕ ЛЕН ВЕРА ИАКО СИНЕ ЧОРОЛЕ

Живинаја сине панда 11 пхраленцар хем пхењенцар ко јекх мисионерско кхер. Делинаја сине јекх кујна, трин тоалетија, дуј тушија, јекх телефони, јекх машина шеенѓе хем јекх машина шуќарибаске. Бут пути на сине амен струја соске таро јекх пути ачхола сине. Ко крови сине стаорција а теле ко подруми сине кобре.

Иако о условија коте со живинѓем на сине шукар, сепак амен уживинаја сине ки служба. О мануша поштујнена сине и Библија хем внимателно шунена сине кеда кераја сине лафи. Бут џене проучинѓе хем прифатинѓе о чачипе. Атхе викинена ман сине „господин Роберт“. А е Паулина „госпоѓа Роберт“. Пало несаво време керава сине повише бути ки подружница а похари џава сине ки служба, адалеске ола почминѓе те викинен е Паулина „госпоѓа Паулине“, а ме добинѓум о анав „годподин Паулине“. Е Паулинаке свиџинѓа пе адава.

Бут пхраља сине чороле, ама о Јехова секогаш грижинела пе сине башо ленгере потребе понекогаш ко чудна начинија (Мат. 6:33). Сетинава ман ки јекх пхен кола со сине ла паре те кинел хајбаске само адале дивеске песке хем пе чхавеске. Ама ој денѓа адала паре јекхе насвале пхралеске те шај те кинел песке иљачи баши маларија. О исто диве, изненадено али јекх џувли хем пучља е пхења дали шај те платинел ла те шај те керел лакере бала. Сине бут асавке ситуацие.

НИГЕРИЈА — СИКЛИЛЕМ НЕВИ КУЛТУРА

Ки Сиера Леоне сием сине 9 берш. Пало адава сием сине бичхалде ко јекх баро Бетел ки Нигерија. Керава сине и исто бути со сине ман ки Сиера Леоне, ама е Паулинаке акава сине јекх бари хем пхари промена. Ој секова масек џала сине ки служба 130 саатија хем сине ла шукар библиска курсија. А акана лакири задача сине секова диве те сивел пхаравде шеја. Ваљанѓа лаке време те прилагодинел пе, ама халили кај о јавера бут ценинена лакири бути хем концентриринѓа пе те аракхел прилике те охрабринел е јавере бетелитен.

И култура ки Нигерија сине нешто нево аменге хем ваљанѓем бут те сикљова. Ки јекх прилика ало јекх пхрал ки мли канцеларија јекхе пхењаја со почминѓа те керел бути ко Бетел. Кеда мангљум те поздравинав ман лаја ој таро јекх пути поклонинѓа пе манге џи ко пре. Акава бут изненадинѓа ман. Дуј стихија але манге ки годи, Дела 10:25, 26 хем Откровение 19:10. Пучава ман сине дали те вакерав лаке те на керел адава. Ама тари јавер страна халиљум кај ој исполнинѓа о условија те кхувел ко Бетел хем кај џанела шукар и Библија.

Осетинѓум ман бут незгодно џикоте кераја сине лафи, ама кеда завршинѓем е разговореа, истражинѓум. Халиљум кај и пхен постапинѓа спрема и традиција сој вообичаено ко несаве делија тари адаја пхув. О мурша да постапинена сине ко исто начин. Аѓаар сикавела пе сине поштовање. Адава на сине обожавибе исто сар со шај те дикха таро бут примерија ки Библија (1. Сам. 24:8). Бут сиум сине благодарно со на вакерѓум нешто колеа со ка лаџакерав сине е пхења.

Запознајнѓем буте пхрален тари Нигерија со сикавѓе бершенцар бари верност. На пример о Исаија Адагбонаb. Сар терно ов запознајнѓа о чачипе ама пало адава дознајнѓа кај иси ле лепра. Бичхалѓе ле ко јекх тхан со живинена сине окола со иси лен лепра хем атхе ов сине о единствено Сведоко. Иако сине противибе, ов поможинѓа повише таро 30 манушенге со сине лен лепра те прифатинен о чачипе хем аѓаар атхе те овел собрание.

КЕНИЈА — О ПХРАЉА СИНЕ СТРПЛИВА МАНЦАР

Ко 1996 берш сием сине бичхалде ки подружница ки Кенија. Акава сине о прво пути пало бут време со иранѓем амен ки акаја пхув. Живинаја сине ко Бетел. Ко дворо ко Бетел сине бут верветна мајмуња. Ола чорена сине о овошје таро пхења. Јекх диве јекх пхен мукхља и пенџерка пхравди хем кеда иранѓа пе дикхља сар јекх група мајмуња хана песке андре. Кеда дикхља лен, ој пиштинѓа хем нашља, ама о мајмуња да пиштинѓе хем нашле кеда дикхле ла.

Ме хем и Паулине почминѓем те служина ко јекх собрание ки чхиб свахили. Пало кратко време почминѓум те водинав о Собраниско проучибе о лил (акана пенџардо сар Проучибе и Библија ки дворана). Ама панда сине манге пхаро те керав лафи ки адаја чхиб. Спреминава ман сине англедер башо материјали те шај те читинав о пучиба хем те хаљовав о одговор со ка ден. Ама ако коментиринена сине поразлично таро адава со пишинела, нашти сине те хаљовав со вакерена. Бут сине манге незгодно. Жалинѓум е пхрален хем е пхењен, ама воодушевинѓум ман со сине стрплива манцар џикоте водинава сине адава состанок.

САД — СИКАВЃЕ ВЕРА ИАКО СИНЕ ЛЕН БУТ КО МАТЕРИЈАЛНО ПОГЛЕД

Ки Кенија сием сине похари таро јекх берш. Тегани ко 1997 берш викинѓе амен ко Бетел ко Бруклин (Њујорк). И Америка тани барвали пхув хем адава шај те овел проблеми буте пхраленге (Изр. 30:8, 9). Ама чак ки асавки пхув, амаре пхраља хем пхења сикавена бари вера. Ола на користинена пумаро време хем адава со иси лен те шај барваљовен, него те поддржинен е Јеховаскири организација.

Ко са акала берша дикхлем и вера амаре пхраленгири со сине лен различна околностија. Ки Ирска дикхлем и вера амаре пхраленгири иако сине насилство. Ки Африка дикхлем и вера амаре пхраленгири иако сине чороле хем живинена сине ко тхана коте со на сине јавера Сведокија. А ки Америка дикхлем и вера амаре пхраленгири иако сине лен бут ко материјално поглед. О Јехова сигурно тано бут бахтало кеда дикхела сар лескере слуге сикавена пумаро мангипе спрема лесте ки било сави ситуација.

О берша накхле бут сигате (Јов 7:6). Акана служинаја ко светско седиште ко Ворвик, Њујорк. Хем понадари да шај радосно те кера бути манушенцар кола со сикавена чачутно мангипе јекх јекхеске. Амен сием радосна хем задоволна соске шај те поддржина амаре Царе, е Исус Христосе, кова со панда хари ка наградинел околен сој верна (Мат. 25:34).