Сој шукар а сој лошно: И Библија чаче шај те поможинел амен
И Библија поможинѓа милиоња манушенге ко штар подрачја таро живото те уверинен пе кај о советија тари Библија чаче тане корисна хем кај шај те овел лен доверба ки ленде.
1. Брако
О мануша различно дикхена ко брако хем ко адава со ваљани те шај јекх брако те овел среќно.
И БИБЛИЈА ВАКЕРЕЛА: „Секова јекх тумендар мора те мангел пле ромња сар коркори пес, а и ромни ваљани хор те поштујнел пле роме“ (Ефешања 5:33).
СО ЗНАЧИНЕЛА АКАВА: О Девел керѓа о брако хем адалеске ов џанела сој тано потребно те шај о брачна парија те овен среќна (Марко 10:6-9). Кеда јекх ром хем ромни грижинела пе повише пле партнереске него песке, тегани о солдуј ка овен среќна. Јекх ром кова со мангела пе ромња ка сикавел адава пле постапкенцар хем адалеа со ка грижинел пе лаке. А јекх ромни која со мангела пе роме ка поддржинел ле хем ка керел леа лафи ко љубезно начин.
И ПОМОШ ТАРИ БИБЛИЈА ЧАЧЕ ТАНИ КОРИСНО: О Квен хем и Тии таро Виетнам мислинѓе кај ленгоро брако никогаш нане те овел среќно. О Квен бут пути на сине љубезно. Ов вакерела: „На сине манге гајле сар осетинела пе и Тии хем бут пути понижинава ла сине“. И Тии мангља те развединен пе. Ој вакерела: „Мислинава сине кај више нашти те овел ман доверба ко мло ром хем кај нашти те поштујнав ле“.
Пало несаво време о Квен хем и Тии дознајнѓе со вакерела и Библија башо брако хем сиклиле сар ко ленгоро брако шај те користинен о лафија сој пишиме ко Ефешања 5:33. О Квен вакерела: „Акава стихо поможинѓа ман те хаљовав кобор тано важно те овав љубезно хем те сикавав мле ромњаке кај мангава ла хем грижинава ман лаке ко материјално, физичко хем емоционално поглед. Кеда керава адава, ој са повише мангела ман хем поштујнела ман“. А и Тии вакерела: „Кобор повише применинава о лафија таро Ефешања 5:33 хем сикавава мле ромеске поштовање, добором повише ов керела те осетинав ман мангли, безбедно хем те осетинав андруно мир“.
Нешто повише башо брако шај те читине ко Разбудете се! бр. 2 2018 е насловеа „12 тајни за среќно семејство“ ки jw.org.
2. Сар те понашине тут е јаверенцар
О мануша бут пути понашинена пе лошно некасаја сој тари јавер раса, националност, башо изглед, иси ле јавер религија или адалеске сој тано хомосексуалцо.
И БИБЛИЈА ВАКЕРЕЛА: „Поштујнен саринен“ (1. Петарескоро 2:17).
СО ЗНАЧИНЕЛА АКАВА: И Библија на одобринела о расизам, национализам хем и хомосексуалност. Наместо адава, ој поттикнинела амен те сикава поштовање са е манушенге бизи разлика тари сави раса тане, националност или дали тане барвале или чороле (Апостолија 10:34). Чак ако на сложинаја амен адалеа ко со ола верујнена или со керена, сепак шај те понашина амен ленцар љубезно хем те сикава ленге поштовање (Матеј 7:12).
И ПОМОШ ТАРИ БИБЛИЈА ЧАЧЕ ТАНИ КОРИСНО: О Даниел сине сикавдо те мислинел кај о мануша тари Азија тане опасна баши лескири пхув. Ов почминѓа те мрзинел е манушен тари Азија хем бут пути вреџинела лен сине англо сарине. О Даниел вакерела: „Мислинѓум манге кај адава керава баши мли пхув. Чак ни на мислинѓум кај о начин сар размислинава хем постапинава тано погрешно“.
Пало несаво време о Даниел дознајнѓа со сикавела и Библија. Ов вакерела: „Ваљанѓум целосно те менинав мло начин сар размислинава хем те сикљовав те дикхав ко мануша аѓаар сар со дикхела лен о Девел — кај сарине сием иста, бизи разлика котар аваја“. О Даниел вакерела сар авдиве дикхела ко мануша: „Бут пути чак ни на размислинава котар авена. Мангава са е манушен хем иси ман паше амала таро цело свето“.
Нешто повише шај те читине ко Разбудете се! бр. 3 2020 е насловеа „Има ли лек за предрасудите?“ ки jw.org.
3. Паре
Бут мануша пробинена те барваљовен те шај те овен среќна хем те овел лен пошукар иднина.
И БИБЛИЈА ВАКЕРЕЛА: „И мудрост тани заштита, исто сар со о паре тане заштита. Ама, и предност тани кај о знаење хем и мудрост аракхена е манушескоро живото“ (Проповедник 7:12).
СО ЗНАЧИНЕЛА АКАВА: Ваљани аменге паре, ама ола нане гаранција кај ка ова среќна или кај ка овел амен пошукар иднина (Изреки 18:11; 23:4, 5). Дали чаче ка ова среќна хем дали ка овел амен сигурно иднина зависинела таро адава дали применинаја и мудрост таро Девел која со аракхљола ки Библија (1. Тимотеј 6:17-19).
И ПОМОШ ТАРИ БИБЛИЈА ЧАЧЕ ТАНИ КОРИСНО: Јекх мануш тари Индонезија кова со викинела пе Кордо мангља те барваљовел. Ов вакерела: „Сине ман са о буќа кола со повише мануша мангена сине те овел лен. Шај сине те патујнав хем те кинав луксузна буќа, врдија хем кхера“. Ама акава сине само кратко. Ов вакерела: „Ховавѓе ман хем о паре баши кола со керѓум бути са акала берша нашавдиле таро јекх пути. Цело живото керѓум бути те шај те барваљовав, а ко крајо нашавѓум са хем осетинава ман сине разочаримо хем кај на врединава“.
Ов почминѓа те применинел о советија тари Библија башо паре хем више на трудинела пе те барваљовел него одлучинѓа те водинел поедноставно живото. Ов вакерела: „Акана осетинава кај сиум чаче барвало адалеске со сиум паше е Девлеа. Акана совава рахати хем чаче сиум среќно“.
Нешто повише башо адава сар те дикхел пе ко паре шај те читине ко Разбудете се! таро септември 2015, е насловеа „Како гледаш на парите?“ ки jw.org.
4. Секс
Е манушен иси лен различно мислење башо адава сој тано прифатливо кеда керела пе лафи башо секс.
И БИБЛИЈА ВАКЕРЕЛА: „Циден тумен подур таро блуд. Секова јекх тумендар ваљани те џанел сар те контролиринел пло тело те шај те овен света хем о Девел те одобринел тумен. Ма овен сар о мануша со на пенџарена е Девле, соске иси лен алчна сексуална желбе со нашти контролиринена лен“ (1. Солунјања 4:3-5).
СО ЗНАЧИНЕЛА АКАВА: Ки Библија иси несаве ограничувања башо адава сар те задоволина амаре сексуална желбе. Ко блуд, или сексуално неморал тане вклучиме о буќа сар сој прељуба, проституција, сексуална односија машкар окола со нане ко брако, хомосексуалност хем сексуална односија е животненцар (1. Коринќања 6:9, 10). О сексуална односија тане поклон таро Девел хем ов мангља аѓаар те сикавел пе мангипе само машкар о мурш хем и џувли кола сој ко брако (Изреки 5:18, 19).
И ПОМОШ ТАРИ БИБЛИЈА ЧАЧЕ ТАНИ КОРИСНО: Јекх џувли тари Австралија која со викинела пе Кајли, вакерела: „Кеда сиум сине беќарка мислинѓум манге кај ако иси ман секс ка осетинав ман мангли хем сигурно. Ама на сине аѓаар. На осетинава ман сине сигурно хем сиум сине разочарими“.
Покасно и Кајли дознајнѓа со вакерела и Библија башо секс хем почминѓа те применинел адава. Ој вакерела: „Халиљум кај е Девлескере мерилија заштитинена амен те на ова повредиме. Акана осетинава ман сигурно хем мангли адалеске со керава о буќа аѓаар сар со мангела о Јехова. Адава со применинава о советија тари Библија заштитинѓа ман таро бут дукха ко вило“.
Нешто повише шај те читине ки статија „Што вели Библијата за заедничкиот живот пред брак?“ ки jw.org.
Амаро створители поможинела амен те џана сој шукар, а сој лошно. Иако нане секогаш локхо те ова послушна ко адава со вакерела ов, врединела те трудина амен те кера адава. Шај те овел амен доверба кај ко крајо секогаш ка ова среќна.