Сар шај редовно те проучине
ДАЛИ туке пхаро редовно те проучине и Библија хем те уживине ко проучибе? Веројатно понекогаш адава тано предизвик сариненге. Ама размислин башо јавера буќа со редовно кераја лен, сар на пример о нанѓојбе. Башо адава ваљани време хем труд, ама кобор осетинаја амен освежиме пало адава. О проучибе е Библијакоро да шај те овел освежувачко „нанѓојбе“ пањеа ко е Девлескоро Лафи (Еф. 5:26). Аке со шај те поможинел тут:
Кер туке распоред. О проучибе и Библија тано јекх таро поважна буќа со мора те кера лен (Фил. 1:10). Те шај те икере тут ко распоред со керѓан ле, чхив ле ко тхан со шај локхесте те дикхе ле, сар на пример ко фрижидери. Или шај те кере туке аларма ко телефони те шај те сетинел тут кеда те проучине.
Бирин кеда тано најшукар време те проучине. Дали шај те ачхове концентриримо повише време, или полокхо туке те проучине повише пути ама пократко? Ту најшукар џанеа кеда туке најлокхо те концентририне тут. Адалеске кер туке плани башо проучибе аѓаар со ка овел тут акала буќа ки годи. Ако нане тут желба те проучине кеда ка авел о време со биринѓан ле, соске на пробинеа те проучине само 10 минутија? Чак ако добором хари проучинеа, адава шај бут те користинел туке. Штом почминеа, адава шај те мотивиринел тут те проучине повише (Фил. 2:13).
Англедер бирин туке теме. Ако аџикереа те авел о време проучибаске хем тегани биринеа со ка проучине, шај о време со иси тут нане те користине ле најшукар (Еф. 5:16). Соске на кереа туке списако статиенцар или теменцар кола со би мангеа те проучине? Кеда ка појавинел пе туке несаво пучибе, пишин ле туке. А ко крајо таро секова проучибе шај ка овен тут јавера да идее башо проучибе со шај те чхиве лен ко тло списако.
Ов флексибилно. Кеда кереа тло распоред ов флексибилно, на пример е времеа хем е теменцар проучибаске. Нане најважно кеда, кобор време или со проучинеа, него кобор редовно проучинеа.
Бут користинела аменге и навика редовно те проучина. Аѓаар оваја попаше е Јеховаја, сикљоваја те постапина мудро хем осетинаја амен охрабриме (Ис. Нав. 1:8).