Сар те ове чачутно амал

ДАЛИ понекогаш осетинеа кај ваљани коркори те борине тут е проблеменцар? Амен живинаја ко „бут пхаро време“ хем адава шај те керел те осетина амен коркори хем обесхрабриме (2. Тим. 3:1). Сепак, на ваљани коркори те борина амен е проблеменцар со иси амен ко живото. И Библија вакерела кај тано важно те овен амен чачутне амала ко пхаре диве (Изр. 17:17).

САР ШАЈ ТЕ ПОМОЖИНЕН О ЧАЧУТНЕ АМАЛА

Е апостол Павлеске бут користинела сине адава со несаве таро лескере амала сине леа ко лескере мисионерска патувања (Кол. 4:7-11). Џикоте сине ко затвор ко Рим, е Павлескере амала керена сине задаче кола со ов лично на би шај сине те керел лен. На пример, о Епафродит анѓа е Павлеске несаве буќа кола со бичхалѓе леске о пхраља таро Филипи (Фил. 4:18). О Тихик бичхалела сине о писмија е Павлескере ко различна собранија (Кол. 4:7). Адалеске со лескере амала поможинена сине леске, о Павле шај сине те охрабринел е собраниен чак кеда сине пханло ко јекх кхер, а хем покасно кеда сине ко затвор. Сар шај авдиве ту те ове чачутно амал?

Авдиве да иси пхраља хем пхења кола со сикавена со значинела те овел пе чачутно амал. Размислин сар јекх пхен сикавѓа кај тани чачутни амалин е Елизабетаке, која со служинела сар општо пионери ки Шпанија. Кеда лакере дајаке аракхле рако, кова со сине ки последно фаза, и пхен бичхалела сине е Елизабетаке бут охрабрувачка пораке кола со темелинена пе сине ко библиска стихија. И Елизабета вакерела: „Акала пораке секова диве дена ман сине сила хем поможинена ман сине те на осетинав ман коркори“ (Изр. 18:24).

Шај те кера позорало о амалипе амаре пхраленцар хем пхењенцар адалеа со ка поможина ленге те џан ки служба хем ко состанокија. На пример, шај те нудине превоз несаве попхуре пхралеске или пхењаке башо состанок или баши служба. Ако кереа адава, ту ка охрабрине лен, ама ола да ка охрабринен тут (Рим. 1:12). Ама, несаве пхраља хем пхења нашти те икљовен кхералдан. Сар шај те поможине ленге да?

ОВ ЧАЧУТНО АМАЛ ОКОЛЕНГЕ СО НАШТИ ТЕ ИКЉОВЕН КХЕРАЛ

Несаве таро амаре пхраља хем пхења нашти те авен ко состанок ки дворана адалеске сој насвале или таро јавера причине. Те дикха о пример е Давидескоро колеске со аракхле лимфон. Повише таро шов масек, ов приминела сине хемотерапија. Ко адава време, о Давид хем лескири ромни и Лидија сине присутна ко состанокија онлајн.

Сар поддржинена лен сине ленгере амала ко собрание? Пало секова состанок, несаве пхраља хем пхења кола со сине ки дворана трудинена пе сине те керен лафи е Давидеа хем е Лидијаја преку видеоконференција. Освен адава, кеда о Давид хем и Лидија ка коментиринен сине, покасно добинена сине охрабрувачка пораке таро пхраља хем пхења. Адава поможинѓа е Давидеске хем е Лидијаке те на осетинен пе добором осамена.

Шај те планирина те џа ки служба несаве пхралеа или пхењаја со нашти те икљол кхералдан. Шај ка ваљани те кера несаве тикне промене те шај те соработина ленцар. Аѓаар ка сикава ленге кај на бистерѓем лен (Изр. 3:27). Шај те одвојне време те шај заедно те пишинен писмија или те сведочинен преку телефони. Окола со нашти те икљон кхерал, шај те вклучинен пе ко состанок баши служба преку видеоконференција. О Давид хем и Лидија тане бут благодарна со ленгоро собрание поможинела лен ко адава. О Давид вакерела: „Доволно сине адава со сием сине амаре групаја проповедибаске хем адава со шај сине те шуна о кратка дискусие хем и молитва те шај те ова охрабриме“. Понекогаш шај те пуче несаве пхрален, кола со нашти те икљовен кхералдан, дали би мангена те ингаре ленде кхере несаве интересенте те шај те проучинен.

Кеда соработинаја амаре пхраленцар хем пхењенцар кола со нашти те икљон кхерал, пошукар запознајнаја лен хем ленгере шуже особине хем аѓаар оваја попаше ленцар. На пример, кеда сиан ки служба асавке објавителенцар хем дикхеа кобор шукар користинена е Девлескоро Лафи те шај те ресен џи ко некаскоро вило, ту веројатно панда повише ценинеа лен. Адалеа со ка поможине тле пхраленге хем пхењенге те џан ки служба хем те овен присутна ко состанокија ка овен тут повише амала (2. Кор. 6:13).

Е Павле дела сине ле бари утеха адава со лескоро амал о Тит сине леа (2. Кор. 7:5-7). Акава пример сетинкерела амен кај шај те да утеха амаре пхраленге хем пхењенге на само амаре охрабрувачка лафенцар него хем адалеа со ка ова ленцар хем ка кера са со шај те поможина ленге (1. Јов. 3:18).

ОВ ЧАЧУТНО АМАЛ КЕДА ИСИ ПРОГОНСТВО

Амаре пхраља хем пхења ки Русија тане бут шукар пример башо адава со значинела те поможина амен машкар аменде. Размислин башо Сергеј хем лескири ромни и Татјана. Откеда и полиција кхувѓа ко ленгоро кхер те керен претрес сине ингарде ки полициско станица те испитинен лен. Е Татјана мукхле ла прво таро затвор хем иранѓа пе кхере. О Сергеј вакерела: „Само со [и Татјана] ресља кхере, јекх храбро пхен одма посетинѓа ла. Пало адава, але јавера да амаре пхраља хем пхења хем поможинѓе аменге те средина о стани адалеске со и полиција растуринѓа ле.

О Сергеј понадари вакерела: „Отсекогаш мангава сине о стихо таро Изреки 17:17, коте со пишинела: ’О чачутно амал сикавела мангипе ко секова време хем пхрал овела ко пхаре диве‘. Акала лафија панда повише значинена манге акана ко прогонство, кеда и помош таро амала бут ваљанела манге. О Јехова денѓа ман храбра амала кола сој узи манде“.a

Адалеске со иси амен са попхаре околностија, ваљанена аменге амала колендар со ка шај те рода помош. Ола панда повише ка ваљанен аменге ки бари неволја. Адалеске, те да амендар са те шај те ова чачутне амала панда авдиве! (1. Пет. 4:7, 8).