САЈ СКУПО — САР ТЕ ИКЉОВЕ КО КРАЈО
Ов дарежливо
Ако туке пхаро те кине о буќа со ваљани туке, шај дикхјола туке панда попхаро те ове дарежливо. Ама адава со ка ове дарежливо уствари ка поможинел туке те икљове ко крајо е економска проблеменцар. Шај те штедине паре хем ко исто време те ове дарежливо.
СОСКЕ ТАНО ВАЖНО
Кеда даја е јаверенге, чак кеда адава тано хари, осетинаја амен среќна хем шукар. Уствари, о истражувања сикавена кај кеда даја, адава тано корисно башо амаро физичко хем емоционално састипе. На пример, шај те овен амен похари секирацие, стрес, те анел ки нормала амаро притисок па чак хем те овен амен похари дукха ко тело. А шај хем те керел пошукар те сова.
Ако даја е јаверенге, бизи разлика дали паре или нешто јавер, ка овел аменге полокхо те прифатина помош кеда аменге ка ваљани. О Хавард, кова со живинела ки Англија, вакерела: „Адалеске со трудинаја амен те ова дарежлива хем те поможина е јаверенге, ме хем ми ромни на осетинаја амен добором лошно кеда аменге ваљани помош“. Нормално, адала со дена таро вило на очекујнена пало адава о јавера да те керен ленге о исто. Сепак, шај те керен песке чачутне амала кола со спремно ка поможинен лен кеда ка ваљанел ленге.
СО ШАЈ ТЕ КЕРЕ
Делин е јаверенцар. Ако нане тут бут ко материјално поглед, сепак шај нешто те де, чак ако адава нане несаво посебно хајбе. О Данкан хем лескири фамилија, кола со живинена ки Уганда, тане чороле, ама сепак мангена те делинен адава со иси лен е јаверенцар. О Данкан вакерела: „О неделе, ме хем ми ромни канинаја гостија хем на кераја нешто посебно хајбаске. Шукар осетинаја амен кеда накхаваја време е јаверенцар“.
Џанѓола пе, кеда деа е јаверенге ваљани те ове разумно. Сигурно на би мангеа те де добором бут, со ко крајо тле фамилија нане те овен ла о буќа со ваљанена лаке (Јов 17:5).
Предлог: Кеда ка викине гостија, кер нешто едноставно хајбаске или шај чак само те де пијбаске. Ако иси тут несаве буќа со на ваљани туке, дали шај те поклонине лен несаве амаленге или комшиенге кола со шај ка користинен лен хем ка ценинен лен?
Де ко јавера начинија. Несаве таро најшукар поклонија тане бизо паре. На пример, шај те да амаро време хем амаро внимание аѓаар со ка кера шукар буќа е јаверенге. Чак јекх љубезно лафи шај те овел поклон! Адалеске вакер е јаверенге кобор бут ценинеа лен или мангеа лен.
Предлог: Шај те поможине некаске околу о кхерутне буќа, те поправинел пе нешто кхере или те пазаринел пе. Пишин несаве амалеске картичка или порака, чак само те вакере кај мислинеа ки лесте.
Ако родеа начинија те ове дарежливо, ка овел тут поисполнимо хем посреќно живото.