САЈ СКУПО — САР ТЕ ИКЉОВЕ КО КРАЈО

Ов задоволно адалеа со иси тут

О мануша сој тане задоволна адалеа со иси лен, задоволна да тане таро пумаро живото. Кеда ленгере околностија менинена пе, ола прилагодинена пе хем на трошинена повише паре таро адава со заработинена.

СОСКЕ ТАНО ВАЖНО

О психолого Џесика Келер приметинѓа кај о задоволна мануша обично тане попозитвна. Исто аѓаар, ој вакерела кај ола похари завидинена е јаверенге. Адалеске на чудинела амен со о мануша сој задоволна обично тане посреќна хем иси лен похари стрес. Уствари, несаве таро најсреќна мануша нане лен бут паре. Акава посебно важинела башо окола со бут ценинена о буќа кола со нашти те кинен пе паренцар, сар сој и радост со осетинаја ла кеда накхаваја време амаре фамилијаја хем амаленцар.

„Ако иси амен хајбаске хем урајбаске, те ова задоволна акале буќенцар“ (1. Тимотеј 6:8).

СО ШАЈ ТЕ КЕРЕ

Ма споредин тут е јаверенцар. Ако спорединеа кобор хари буќа иси тут, а кобор буќа иси е јаверен, аѓаар шај те на ове задоволно, па чак те почмине те завидине ленге. Освен адава, ако кереа асавке споредбе адава шај те на сикавел сар тани чаче и ситуација. Несавен со иси лен бут буќа, уствари шај тане батиме ко борчија. И Никол која со живинела ко Сенегал вакерела: „На ваљани манге бут буќа те шај те овав среќно. Ако сиум задоволно, шај те овав среќно чак кеда е јаверен иси лен повише мандар“.

Предлог: Избегин те дикхе рекламе или објаве ко социјална мреже кола со истакнинена о барвалипе хем о луксузно живото е јаверенгоро.

„Чак кеда некас иси ле бут, лескоро живото на авела таро адава со иси ле“ (Лука 12:15).

Ов благодарно. Побаре тане о шансе некој те овел задоволно ако тано благодарно. О мануша сој тане благодарна, обично на мислинена кај ваљани ленге или кај заслужинена нешто повише. О Робертон, таро Хаити, вакерела: „Одвојнава манге време те размислинав башо шукар буќа со о јавера керѓе манге хем ме фамилијаке. Пало адава, вакерава ленге кобор ценинава адава со ола керѓе. Исто аѓаар сикавава ме чхаве коле иси ле офто берш те вакерел фала башо са со добинела“.

Предлог: Секова диве пишин башо кола буќа сиан благодарно. Адава шај те овел о шукар састипе, и фамилија, о чачутне амала, па чак о бут шуже бое кеда перела о кхам.

„Кас иси радосно вило, секова диве тано ко хајбе хем ко пијбе“ (Изреки 15:15).

Понекогаш, сариненге аменге тано пхаро те ова задоволна адалеа со иси амен. Ама амаро трудо ка исплатинел пе! Кеда биринаја те ова задоволна, амен биринаја те ова среќна — нешто со нашти те кинел пе паренцар.