САЈ СКУПО — САР ТЕ ИКЉОВЕ КО КРАЈО

Паметно трошин о паре

Адава со бајрона о цене керела те овел аменге попхаро о живото. Ама на ваљани те мислина кај нашти ништо те кера. Шај иси несаве буќа со шај те кере те овел пошукар тли ситуација.

СОСКЕ ТАНО ВАЖНО

Ако барем хари на трудинеа тут паметно те трошине о паре, адава шај те анел туке побаре финансиска проблемија хем секирацие. Чак ако иси тут хари паре, иси несаве буќа со шај те кере те шај те поможинен тут паметно те трошине о паре.

СО ШАЈ ТЕ КЕРЕ

Пружин те пре кобор сој дугачко ти черга. Ако трошинеа добором кобор со иси тут, веројатно ка овел тут побари контрола упри тли финансиско ситуација хем ка ове спремно те платине ако иклило несаво трошако со на очекујнѓан.

Ако планиринеа кобор трошинеа, а кобор заработинеа, адава ка поможинел тут те на трошине повише паре таро адава со иси тут. Џикоте кереа асавко плани шукар ка овел те размислине со чаче туке потребно. Пало адава, де тутар са те икере тут ко адава плани хем ов спремно те менине ле ако менинела пе тли плата или о цене. Џанѓола пе, ако сиан ко брако тло брачно партнери да ваљани те овел вклучимо ко одлуке.

Предлог: Наместо те кине буќа картичкаја, ако шај платин кеш. Несаве халиле кај аѓаар иси лен побари контрола упро паре со иси лен. Па чак, адава поможинела ленге те на кхувен ко дугија. Освен адава, одвојн туке време те дикхе о извештаија тари банка. Ка овел тут похари стрес ако џанеа кобор паре иси тут.

Нане секогаш локхо те на трошине повише паре таро адава со иси тут. Ама, јекх практично хем шукар плани башо адава сар те трошине те паре шај бут те поможинел туке. Исто аѓаар, нане бут те секирине тут башо паре.

„[Рачунин] о трошако“ (Лука 14:28).

Де тутар са те аракхе тли бути. Со шај те кере те шај те аракхе тли бути? Аке некобор предлогија: Џа ки бути ко време. Нека овел тут позитивно стави спрема тли бути, ов спремно те поможине е јаверенге хем ов буќарно. Сикав поштовање. Икер тут ко правилија хем де са тутар те ове пошукар ко тле вештине.

Ма фрде те паре ко непотребна буќа. Пуч тут: „Дали често трошинава паре ко скупа буќа или ко буќа со на ваљани манге, па чак сој манге штетна?“ На пример, бут мануша о паре со мучно заработинена фрдена лен ки дрога, ко комари, ко пушибе или ко бут пијбе алкохол. Акала навике шај те керен те нашавен пумаро састипе хем пумари бути.

„Среќно тано о мануш со ка аракхел мудрост... Пошукар тано те добине мудрост него сребро“ (Изреки 3:13, 14).

Чхив паре ки страна башо итна ситуацие. Кеда шај, чхив нешто ки страна башо итна трошакија или ако иклиле несаве трошакија со на планиринѓан. Адала паре шај те поможинен тут те на секирине тут ако ту или некој тари тли фамилија насваљовела, нашавела пли бути или ако случинела пе нешто со на очекујнѓан.

„О време хем о буќа со нашти те предвидинен пе аракхена секоле мануше“ (Проповедник 9:11).

Идее сар те штедине паре

Почесто кер туке хајбаске кхере.

Ако често хаја авријал или ако редовно кинеа готово хајбе хем пијалокија, адава шај бут те коштинел тут. Џанѓола пе, ваљани те одвојне време хем те трудине тут те кере хајбаске кхере. Ама аѓаар шај бут те штедине. А аѓаар ту ка контролирине кобор квалитетно тано о хајбе со ка ха.

Размислин шукар со ваљани те кине.

Кер туке списако пазарибаске хем икер тут ки лесте. Избегин ки сиг те кине буќа со на планиринѓан.
Кин побари количина таро несаве буќа кеда ка аракхе лен поефтино ако иси тут паре башо адава. Сепак нека овел тут ки годи кај ваљани те овел тут тхан коте со ка шај те чхиве о буќа со шај сигате те руминѓовен.
Размислин дали шај те кине поефтина буќа ако о квалитети тано шукар.
Кин онлајн те шај те аракхе пошукар понуде те шај те на ле буќа кола со на планиринѓан те ле лен хем те овел тут пошукар контрола упро адава кај трошинеа о паре. Ако ко тхан коте со живинеа шај те кине онлајн, дали адава ка овел шукар опција туке?
Ако шај роде попустија хем користин купонија. Споредин о цене хем кеда ка кине несаво уред размислин башо адава кобор струја ка трошинел хем кобор ка овен о трошакија одржибаске.

Шукар размислин англедер те кине неве буќа.

Адала со керена о телефонија хем о јавера производија нонстоп икалена неве моделија те шај повише те заработинен. Адалеске пуч тут: „Дали чаче ваљани манге понево модели? Ако оја, дали мора те кинав ле одма? Хем, дали чаче ваљани манге о најнево модели?“

Поправин о буќа со румисалиле хем кин користиме буќа.

Одржин о буќа со иси тут кхере те шај повише те користине лен хем ако шај поправин лен кеда ка руминѓовен. Исто аѓаар, шај те штедине паре ако кинеа буќа со више користинѓе лен о јавера.

Садин туке овошје хем зеленчук.

Дали шај те кере туке јекх тикни бавча коте со ка садине овошје хем зеленчук? Аѓаар шај похари те трошине паре хајбаске, туке хем тле фамилијаке, а шај адава со садинеа те де ле те шај те добине нешто јавер, те бикине ле или те поклонине ле.

„О планија околескере со трудинела пе сигурно анена корист“ (Изреки 21:5).

„Нонстоп пратинаја о цене таро буќа со секова диве користинаја лен. А исто аѓаар, пазинаја кобор често користинаја амаре картичке“(Мајлс, Англија).

„Англедер те џа те пазарина, сар фамилија секогаш кераја списако е буќенцар сој аменге потребна“(Џереми, Америка).

„Амен стално пазинаја дали шај те кина адава со мангаја те кина хем чхиваја паре ки страна ако иклиле несаве трошакија со на планиринѓем“(Јаел, Израел).

„Сикавѓем амаре чхавен те поправинен о буќа наместо те кинен неве. Акава важинела хем башо врда хем башо буќа со иси амен кхере. Исто аѓаар, ме хем ми ромни трудинаја амен те на кина о најневе моделија“(Џефри, Америка).

„Иси амен похари трошакија аѓаар со садинава зеленчук хем аѓаар со аракхава кхања. Чак шај те поклонинав е јавере манушенге таро мло зеленчук“(Хоно, Мјанмар).

Јекх ромни кхедела разно зеленчук тари пли бавча.