САЈ СКУПО — САР ТЕ ИКЉОВЕ КО КРАЈО

Прифатин о буќа аѓаар сар сој тане

Кеда похари бајрона о цене шај ни на приметинаја адава, посебно ако ко исто време бајрона о плате да. Ама кеда о цене бајрона таро јекх пути, а о плате ачховена иста, шај те ова секириме хем те овел амен стрес, посебно ако ваљани те грижина амен амаре фамилијаке.

Амен нашти те чхинава о трошакија башо живото те бајрон. Ама ако прифатинаја акава факти, уствари адава шај те користинел аменге.

СОСКЕ ТАНО ВАЖНО

Е манушенге со хаљона кај нане лен контрола упро цене со бајрона полокхо ленге...

те ачховен смириме. Кеда сием смириме размислинаја пошукар хем анаја пошукар одлуке.
те циден пе таро лошна навике. На пример, лошно навика шај те овел те на платинен пе сметке или те трошинен пе паре башо буќа со нане потребна.
те на овел акошибе ки фамилија башо паре.
те аракхен начин те икљовел пе ко крајо е проблемеа. Адава значинела те трошинел пе похари паре хем те одлучинел пе со чаче ваљани ленге.

СО ШАЈ ТЕ КЕРЕ

Ов прилагодливо. Кеда о цене бајрона таро јекх пути, мудро тано ако шај те трошина похари паре хем те кина само адава сој аменге потребно. Несаве мануша трошинена повише паре таро адава со иси лен хем адава керела ленгири ситуација те овел панда попхари. Аѓаар ола само уморинена пе. Ако иси тут фамилија нормално тано те секирине тут сар те ане ленге адава сој ленге потребно, сепак нека овел тут ки годи акава: Тле фамилијаке потребно тано мангипе, време хем внимание повише таро било со јавер!

„Кој тумендар адалеа со ка секиринел пе шај барем хари те продолжинел пло живото?“ (Лука 12:25).

„Никогаш ма секиринен тумен башо тајсутно диве соске о тајсутно диве иси ле пле секирацие, доволно тано со секова диве иси ле пле проблемија“ (Матеј 6:34).

Ако трошинеа повише паре таро адава со иси тут, адава шај те керел тли ситуација те овел панда попхари.