10 ЛЕКЦИЈА
Сар шај те пенџаре која тани и чачутни религија?
1. Дали иси само јекх чачутни религија?
‚Пазинен тумен таро ховавне пророкија‘ (МАТЕЈ 7:15).
О Исус сикавѓа пле ученикон кај иси само јекх чачутни религија. Ој тани сар јекх друмо со легарела ко вечно џивдипе. Ов вакерѓа кај ‚хари џене аракхена‘ адава друмо (Матеј 7:14). О Девел прифатинела само адаја религија која со пле сикљојба темелинела ко чачипе таро лескоро лафи и Библија. Са о чачутне Девлескере слуге тане обединиме ки јекх религија. Читин Јован 4:23, 24; 14:6; Ефешаните 4:4, 5.
Дикх о видеоклипи Дали о Девел прифатинела са о религие?
2. Со вакерѓа о Исус башо ховавне христијанија?
‚Ола вакерена кај пенџарена е Девле, ама адалеа со керена сикавена кај на пенџарена ле чаче‘ (ТИТ 1:16).
О Исус вакерѓа кај ка овен дисаве мануша со ка сикавен е јаверен ховавне буќа. Авријалдан, ола сикавена пе сар чачутне Девлескере слуге. Ола вакерена кај тане христијанија. Ама, ту шај те пенџаре саве чаче тане ола. Сар? Само адала со и ки чачутни религија џивдинена хем џана пало е Исусескоро пример. Читин Матеј 7:13-23.
3. Сар шај те пенџаре и чачутни религија?
Размислин башо акала панџ буќа:
Адала со и ки чачутни религија прифатинена кај и Библија тани таро Девел. Ола трудинена пе те џивдинен според о начелија тари Библија. Адалеске, и чачутни религија одвојнела пе таро јавера религие со темелинена пе ко манушикане сикљојба (Матеј 15:7-9). Адала со и ки чачутни религија на сикавена јекх, а керена јавер. Читин Јован 17:17; 2. Тимотеј 3:16, 17.
О чачутне христијанија славинена е Девлескоро анав, Јехова. О Исус славинела сине е Девлескоро анав адалеа со вакерела ле сине јаверенге. Ов поможинела сине е манушен те пенџарен е Девле хем сикавѓа лен те молинен пе баши адава те овел славимо е Девлескоро свето анав (Матеј 6:9). Која религија вакерела јаверенге е Девлескоро анав? Читин Јован 17:26; Римјаните 10:13, 14.
О чачутне христијанија вакерена јаверенге башо е Девлескоро Царство. О Девел бичхалѓа е Исусе те вакерел е манушенге о шукар хабери башо Царство. Е Девлескоро Царство тано единствено надеж е манушенге. О Исус вакерела сине баши лесте са џикоте на муло (Лука 4:43; 8:1; 23:42, 43). Ов вакерѓа кај окола со ка џан пало лескоро пример, ка вакерен јаверенге о шукар хабери. Ако некој керела туја лафи башо е Девлескоро Царство, со мислинеа, тари сави религија тано? Читин Матеј 24:14.
Адала со џана пало е Исусескоро пример нане дело таро акава лошно сумнал. Шај те пенџаре лен пало адава со на мешинена пе ки политика или ко војне (Јован 17:16; 18:36). Исто аѓаар, адалеа со керена хем сар размислинена разликујнена пе таро јавера мануша. Читин Јаков 4:4.
О чачутне христијанија таро вило мангена пе јекх јекхеа. Тари Библија ола сиклиле те почитујнен е манушен тари секоја нација. Бут пути о ховавне религие поддржинена о војне, ама о чачутне христијанија одбинена те керен адава (Михеј 4:1-3). Наместо адава, ола користинена пло време хем адава со иси лен, те поможинен хем те охрабринен јаверен. Читин Јован 13:34, 35; 1. Јованово 4:20.
4. Шај ли те пенџаре која тани и чачутни религија?
Која религија темелинела пло сикљојбе ки Библија, славинела е Девлескоро анав хем проповединела кај е Девлескоро Царство тани единствено надеж е манушенге? Која религија на поддржинела о војне хем о мануша со и ки лате чаче мангена пе? Со мислинеа? Читин 1. Јованово 3:10-12.