Овен верна јекх јекхеске

О Јехова родела амендар те ова верна (Малахија 2:16). Акава тано бут важно, соске бизи верност нане те овел ни доверба. А бизи доверба нашти те бајрол о мангипе ко брако.

Авдиве, иси бут буќа со керена те на овел локхо те ачховел пе верно ко брако. Те шај те аракхе то брако, ту мора те кере дуј буќа. Те дикха кола тане адала.

1 КО ПРВО ТХАН ЧХИВ ТО БРАКО

СО ВАКЕРЕЛА И БИБЛИЈА: „Овен сигурна кола тане о најважна буќа“ (Филипјаните 1:10). То брако тано јекх таро најважна буќа. Ваљани те де леске посебно внимание.

О Јехова мангела са то внимание те де те ромњаке или те ромеске хем заедно те уживинен ко џивдипе (Проповедник 9:9). Ов вакерела кај никогаш на ваљани те бистре те ромња или те роме, него ваљани те керен јекх јекхе бахтале (1. Коринќаните 10:24). Кер то брачно партнери те осетинел пе кај ваљани туке хем кај ценинеа ле.

СО ШАЈ ТЕ КЕРЕ:

• Редовно одвојн туке време те ове те ромњаја или те ромеа хем ма мукх јавера буќа те лен то внимание.

• Мислин е солдуенге, а на само туке.

2 АРАКХ ТО ВИЛО

СО ВАКЕРЕЛА И БИБЛИЈА: „Секова јекх со дикхела ки џувли хем мислинела песке те пашљол лаја, ов више керѓа лаја прељуба пе вилесте“ (Матеј 5:28). Кеда некој мислинела башо румиме буќа, ов ки јекх смисла нане верно пе ромњаке или пе ромеске.

О Јехова вакерела кај ваљани „те аракхе то вило“ (Изреки 4:23; Еремија 17:9). Те шај те кере адава, мора те пазине со дикхеа (Матеј 5:29, 30). Ов сар о верно мануш о Јов, кова со денѓа песке лафи кај нане желбаја те дикхел пало јавера џувља (Јов 31:1). Никогаш ма дикх порнографија. Ов одлучно те овел ту романтична чувствија само те ромњаке или те ромеске, никаске јавереске.

СО ШАЈ ТЕ КЕРЕ:

• Сикав е јаверенге те џанен кај сиан верно те ромњаке или те ромеске.

• Размислин сар осетинела пе то брачно партнери хем сигате чхинав било сави блискост некасаја со шај те сметинел ле.