5 ТЕМА

Сар те накхен шукар тумаре родителенцар

„Сикавен. . . љубезност, понизност, ачховен смириме хем стрплива“ (Колошаните 3:12).

Кеда прандинеа ту, тумен о дуј џене овена јекх неви фамилија. Иако секогаш ка манге те родителен хем ка поштујне лен, акана најважно мануш ко то џивдипе туке ти ромни или то ром. Тумаре родителенге шај ка овел пхаро те прифатинен акава. О советија тари Библија ка поможинен тумен те аракхен јекх средина хем те накхен шукар тумаре родителенцар џикоте керена тумаро брако те овел позорало. Акала советија исто аѓаар важинена кеда керела пе лафи башо деверо, золва, јатрва, како, тетка, братучетија хем јавера тари фамилија.

1 ДИКХЕН КО ТУМАРЕ РОДИТЕЛИЈА САР СО ВАЉАНИ

Брачно пари накхавена време пе родителенцар

СО ВАКЕРЕЛА И БИБЛИЈА: „Поштујн те даде хем те даја“ (Ефешаните 6:2). Секогаш ваљани те поштујне те родителен, бизи разлика кобор берш иси ту. Хаљов кај те брачно партнере да иси ле родителија хем ов ваљани те грижинел пе ленге да. „О мануш кова со иси ле мангипе нане љубоморно“, адалеске никогаш ма осетин ту несигурно ако ти ромни или то ром тано паше пе родителенцар (1. Коринќаните 13:4; Галатите 5:26).

СО ШАЈ ТЕ КЕРЕ:

Ма вакер: „Ти фамилија секогаш керела ман неспособно“ или „Са со керава, те дајаке нане шукар“.
Трудин ту те дикхе о буќа сар со дикхела лен ти ромни или то ром.

2 ОВ ОДЛУЧНО КЕДА ВАЉАНИ

СО ВАКЕРЕЛА И БИБЛИЈА: „О мануш ка мукхел пе даде хем пе даја хем ка спојнел пе пе ромњаја, хем ола ка овен јекх тело“ (1. Мојсеева 2:24). Кеда ка прандине ту, те родителија шај ка мислинен кај панда тане одговорна туке хем шај ка манген те мешинен пе ко то брако побутер него со ваљани.

Ту хем то брачно партнери ваљани те керен лафи башо адава кобор ка дозволинен е родителенге те мешинен пе туменге ко брако хем љубезно вакерен ленге адава. Керен ленцар искрено лафи, ама пазинен те на поврединен лен (Изреки 15:1). Ако сиен смириме, љубезна хем стрплива адава ка поможинел тумен те накхен шукар тумаре родителенцар (Ефешаните 4:2).

Ром хем ромни керена лафи; ром хем ромни дена пумаре родителенге поклон

СО ШАЈ ТЕ КЕРЕ:

Ако мислинеа кај тумаре родителија бут мешинена пе туменге ко брако, тегани кер смирено лафи те ромњаја или те ромеа башо адава.
Договоринен тумен сар те решинен адава проблеми.

ТРУДИН ТУ ТЕ ХАЉОВЕ ЛЕН

Важно тано те хаљове те родителен сар осетинена пе хем сар дикхена ко буќа. Ола на мислинена туменге лошнипе. Ола чаче мангена туменге са најшукар. Шај ка овел ленге пхаро те дикхен тумен сар јекх неви фамилија, шај чак ка осетинен пе кај цидена лен ки страна. Ако икерена о советија тари Библија хем ако искрено керена лафи тумаре родителенцар, тегани ка шај те сикавен кај поштујнена лен бизо те анен туменге проблемија ко брако.