10 ПУЧИБЕ
Сар шај и Библија те поможинел ман?
СО БИ КЕРЕА ТУ?
Замислин туке и ситуација: О Ерсани накхела пле врдаја таро јекх непознато тхан. Таро знакија со иси хем тари околина хаљола кај нане ко тхан коте со ваљани те овел. О Ерсани халило кај нашавдило. Ов сигурно гело ко погрешно друмо.
Со би кереа сине ту кеда би овеа сине ко е Ерсанескоро тхан?
АЧХОВ ХЕМ РАЗМИСЛИН!
Иси тут некобор опције:
А. Те пуче некас.
Б. Те користине карта или навигација.
В. Те возине понадари, хем те мислине кај шај те снаџине тут.
Јасно, и опција В тани најлошно.
И опција Б тани пошукар тари прво. И карта хем и навигација шај те сикавен туке о исправно друмо са џикоте на ресеа.
И Библија шај те поможинел туке ко асавко начин.
О најбикимо лил шај...
те дел тут советија те шај те икљове ко крајо е проблеменцар
те поможинел тут те шај пошукар те пенџаре тут хем те ове пошукар личност
те сикавел туке сар шај те овел тут најшукар живото
ОДГОВОРИЈА БАШО НАЈВАЖНА ПУЧИБА КО ЖИВОТО
Само со лаја те кера лафи, пучаја башо бут буќа.
Кој керѓа о небо?
Кој керѓа о черења?
Покасно почминаја те пуча амен башо буќа сој тане околу аменде.
Соске овена лошна буќа?
Соске о мануша мерене?
Со ако о одговорија цело време тане ки Библија?
Бут мануша вакерена кај и Библија тани пхерди парамисенцар, кај тани бут пурани или бут пхари хаљојбаске. Дали и Библија тани чаче асавки или само о мануша мислинена аѓаар? Шај ли о мануша те овен погрешно информириме баши Библија?
На пример, о мануша мислинена кај о Девел владинела е светоја. Ама, сар шај те овел адава? Ко свето иси бут лошна буќа! Ки лесте иси бут дукха хем муке, насвалипе хем мерибе, чоролипе хем катастрофе. Шај ли јекх Девел пхердо мангипаја те керел асавке буќа?
Мангеа ли те џане о одговорија башо акава? Шај ка изненадинел тут со вакерела и Библија башо адава кој владинела е светоја!
Сигурно приметинѓан кај о советија сој тане денде ки акаја брошура тане темелиме ки Библија. Е Јеховаскере сведокија тане увериме кај и Библија шај те поможинел лен ко ленгоро живото. Соске? Адалеске со ој авела таро Девел хем корисно тани те сикавел е мануше, те сикавел кеда нешто тано погрешно, те исправинел са о буќа (2. Тимотеј 3:16, 17). Башо тло шукарипе тано те сикљове побутер таро акава лил, кова сој пурано а сепак корисно авдиве.