О Исус парварѓа буте манушен

Кратко англедер и Пасха ко 32 берш а.е., о апостолија иранѓе пе таро проповедибе. О Исус дикхља кај тане уморна, уклило ленцар ко чамцо, хем заедно цидинѓе ки Витсаида те шај те одморинен пе. Ама, кеда але узо брего, о Исус дикхља кај бут мануша але адатхе хем аџикерена ле. Иако мангља те овел коркори е апостоленцар, ов сине љубезно е манушенцар. Сасљарѓа саринен со сине насвале хем почминѓа те сикавел лен. Цело диве вакерела ленге сине башо е Девлескоро Царство. Англедер те раќол, о апостолија але ко Исус хем вакерѓе леске: „О мануша сигурно тане бокхале. Бичхал лен те џан те кинен песке нешто хајбаске“.

О Исус вакерѓа: „На ваљани те џан. Ден лен нешто акате те хан“. О апостолија пучле ле: „Мангеа те џа хем те кина ленге маро?“ О Филип, јекх таро апостолија, вакерѓа: „Ама, чак те овел амен бут паре, палем ка нашти те кина доволно маро сариненге“.

О Исус пучља лен: „Кобор иси тумен хајбаске?“ О Андреј вакерѓа: „Иси амен панџ маре хем дуј тикне мачхе“. Ама, адава нане доволно башо са акала мануша. О Исус вакерѓа: „Анен манге о маре хем о мачхе“. Пало адава, вакерѓа е манушенге те бешен ки чар ко групе по 50 хем по 100 џене. О Исус леља о маре хем о мачхе, дикхља ко небо хем молинѓа пе. Пало адава, денѓа о хајбе е апостоленге, а ола делинена ле сине е манушенге. О 5.000 мурша, хем са о џувља хем о чхаве, хале са џикоте на чалиле. Ко крајо, о апостолија кхединѓе о хајбе со ачхило те шај ништо те на фрдел пе. Пхерѓе 12 корпе хајбаја. Адава сине чаче баро чудо, нели?

О мануша сине добором воодушевиме со мангле те чхивен е Исусе те овел ленгоро цари. Ама, о Исус џанља кај панда на ало о време со о Јехова одрединѓа ле те овел цари. Адалеске, вакерѓа е манушенге те џан песке, а е апостолен бичхалѓа лен те џан тари јавер страна таро Галилејско Море. Откеда о апостолија уклиле ко чамцо, о Исус гело коркори ки планина. Соске? Соске мангља те одвојнел време те молинел пе пле Дадеске. Бизи разлика кобор те овел сине зафатимо, о Исус секогаш одвојнела сине време те молинел пе.