О Исус пхирѓа упро пани

О Исус шај сине те сасљарел насвален хем те воскреснинел е мулен, ама исто аѓаар сине ле моќ упри балвал хем упро бршим. Откеда молинѓа пе ки планина, о Исус дикхља теле ко Галилејско Море хем дикхља кај иси невреме. О апостолија сине ко чамцо хем мучинена пе сине е невремеа. О Исус хулило теле хем почминѓа те пхирел упро пани те џал ки ленде. Кеда о апостолија дикхле кај некој пхирела упро пани, бут дарандиле. Ама, о Исус вакерѓа ленге: „Ма даран, ме сиум!“

О Петар вакерѓа: „Господару, ако сиан чаче ту, наредин манге те авав ки туте“. О Исус вакерѓа леске: „Ава ки манде!“ Аѓаар, ко адава невреме, о Петар иклило таро чамцо хем почминѓа те пхирел упро пани те џал ко Исус. Ама, кеда ало паше узи лесте, дикхља о баре бранија хем дарандило хем почминѓа те тонинел ко пани. Тегани викинѓа: „Господару, спасин ма!“ О Исус астарѓа ле таро вас хем вакерѓа леске: „Соске дарандиљан? Нане тут ли вера?“

О Исус хем о Петар уклиле ко чамцо, хем одма о невреме ачхило. Шај ли те замислине туке сар осетинена пе сине о апостолија? Ола вакерѓе е Исусеске: „Ту чаче сиан е Девлескоро Чхаво“.

Акава на сине прво пути о Исус те контролиринел о време. Јекх пути, кеда о Исус хем о апостолија џана сине е чамцоја тари јавер страна таро море, ов засуќа ко чамцо. Таро јекх пути уло баро невреме. О бранија кхувена сине ко чамцо, хем почминѓа те пхерѓол пани. О апостолија викиндор уштарѓе е Исусе, хем вакерѓе леске: „Учителе, ка мера! Поможин аменге!“ О Исус уштило хем вакерѓа е мореске: „Смирин ту!“ Ко адава моменти, и балвал хем о море смиринѓе пе. О Исус вакерѓа е апостоленге: „Кај тани тумари вера?“ Ола почминѓе машкар песте те вакерен: „Чак и балвал хем о море шунена ле“. О апостолија сиклиле кај, ако иси лен целосно доверба ко Исус, на ваљани те даран таро ништо.