Поможин адаленге со на дикхена те сикљовен башо Јехова
1. Сар о Исус сикавѓа сочувство е манушенге со на дикхена сине?
1 Некобор диве англедер те мерел, о Исус сине ко Ерихон. Кеда гело песке адатхар, дуј мануша со на дикхена викинена сине пали лесте: „Господаре, нека овел ту милост спрема аменде!“ Иако е Исусеске на сине локхо соске џанела сине саве искушенија аџикерена ле, ов ачхило, викинѓа лен хем сасљарѓа лен (Мат. 20:29-34). Сар шај амен да те ова сар о Исус хем те сикава сочувство е манушенге со на дикхена?
2. Сар шај те сведочина адаленге со на дикхена кеда аракхаја лен ко различна тхана, сар на пример ки улица?
2 Ов спремно те поможине: Ако аракхеа некас со на дикхела, сар на пример ки улица, вакер то анав хем пуч дали шај те поможине ле. Ов ко почеток шај те дарал, соске иси бут мануша со мангена те ховавен адален со на дикхена. Ама, кеда ка ове љубезно хем искрено тегани леске ка овел полокхо те прифатинел тли помош. Исто аѓаар, нека овел ту ки годи кај, кобор ка ваљани те поможине е манушеске зависинела таро адава кобор ов на дикхела. Ако мукхља те поможине ле, пало адава шај те вакере леске кај ту сикавеа е манушен тари Библија. Пуч ле дали шај те читине леске јекх стихо, сар со и Псалм 146:8 или Исаија 35:5, 6. Ако џанела те читинел Брајово писмо, пуч ле дали мангела те ане асавке публикацие те шај те сикљол побутер тари Библија. Исто аѓаар, шај те ане леске аудио снимке тари jw.org. Ако иси ле компјутери хем програма која со читинела о тексти таро екрани, шај ка мангел те читинел о статие тари амари интернет-страница. (Дикх ки рамка „Ко со ваљани те пазине кеда поможинеа некаске со на дикхела“.)
3. Сар шај те рода ко амаро подрачје е манушен со на дикхена?
3 Роде е манушен со на дикхена: Кеда џаја таро кхер ко кхер, ретко аракхаја манушен со на дикхена, соске бут лендар на осетинена пе шукар те керен лафи некасаја со на пенџарена ле. Адалеске, ваљани бут те трудина амен те рода асавкен те шај те сведочина ленге (Мат. 10:11). Иси ли ту колега ки бути или соученико со на дикхела? Почмин ту те кере леа лафи. Ако ко тло подрачје иси школа башо мануша со на дикхена, пуч ки школско библиотека дали ка манген библиско литература ко Брајово писмо. Пенџареа ли некас со иси ле некој ки фамилија со на дикхела? Дали ко тло подрачје иси несави организација со поможинела е манушенге со на дикхена или дали иси доми асавке манушенге? Објаснин некаске тари ленгири фамилија, е манушеске со керела бути ки рецепција, или е директореске кај амен е Јеховаскере сведокија поможинаја е манушенге со на дикхена, хем пуч дали мангена те да лен литература ко Брајово писмо или аудио снимке. Читин ленге стихија тари Библија со вакерена кај о Девел ка сасљарел засекогаш са е манушен со на дикхена. Ако објаснинеа и причина соске аљан те посетине лен, адава ка поможинел ту те аве ко контакт асавке манушенцар.
4. Со шај те сикљова тари искуство со сине е Џенета?
4 Јекх пхен со на дикхела, и Џенет, посетинѓа јекх доми башо мануша со на дикхена хем почминѓа те керел лафи јекхе терне манушњаја. Ој вакерѓа лаке кај о Исус сасљарѓа несаве манушен со на дикхена хем кај адалеа сикавѓа со ка керел са околенге со на дикхена. И Џенет вакерѓа лаке о стихија таро Откровение 21:3, 4 хем објаснинѓа лаке сар е Девлескоро Царство ка керел са адава со пишинела ко стихија. И манушни прво хари размислинѓа хем после вакерѓа: „Никогаш на шунѓум асавке лафија некастар со на дикхела. Бут мануша мислинена кај амен на дикхаја соске сиам казниме башо несаво грево со керѓам амен или амари фамилија“. И Џенет бичхалѓа лаке преку имејл о линк таро лил Што учи Библијата хем акана ола проучинена и Библија дуј пути ко курко.
5. Иако амен нашти сар о Исус те сасљара е манушен со на дикхена, сар шај те поможина ленге?
5 Амен нашти сар о Исус те сасљара е манушен со на дикхена. Ама, шај те поможина сариненге со на дикхена ко духовен поглед те хаљовен о чачипе таро е Девлескоро Лафи, а машкар ленде тане о мануша да со чаче на дикхена (2. Кор. 4:4). О Исус сасљарѓа е дује манушен паше узо Ерихон соске ‚сине леске жал‘ баши ленде (Мат. 20:34). Ако амен да сиам сар о Исус, ка шај те поможина ленге те сикљовен башо Јехова, о Девел со ка сасљарел са е манушен засекогаш.