Сикљов таро поискусна објавителија
Амен бут ценинаја е искусна објавителен ко собрание. Несаве лендар служинена верно е Јеховаске бут берша. А јавера добинѓе побаро искуство ки служба ко последна некобор берша. Акала објавителија тане сведокија кај о Исус водинела о собрание ко акала последна диве соске дикхена сар побутер проповединела пе хем керела пе ученикија (Мат. 28:19, 20). Кеда џана ки служба ола добинена „сила која со накхавела и нормално“ те шај те издржинен секова проблеми или искушение (2. Кор. 4:7). Бут шај те сикљова таро искусна објавителија. Секогаш кеда шај, ола радосно вакерена е јаверенге адава со сиклиле (Пс. 71:18). Адалеске, ваљани те трудина амен те сикљова лендар. Сар шај те кера адава?
Ки служба. Те шај о неве или о похари искусна објавителија те овен пошукар ки служба, ваљани ленге помош. Бут ка поможинел лен адава со ка дикхен е духовно зрела објавителен сар керена и служба. (Дикх и статија „Продолжи ревносно да проповедаш“ ки Стражарска кула таро 15 февруари 2015 берш, о тринто пасус таро поднаслов „Помагај им на новите објавители“.) Сар поможинѓа туке адава со џаја сине ки служба искусна објавителенцар?
Шај ли те договорине ту те џа ки служба поискусно објавителеа? Ако о објавители тано насвало, шај понекогаш те џа лесте кхере те интересентеа хем заедно те проучинен. Кеда ка завршинен и студија, пуч е објавителе те дел ту несаво совет хем предлог.
Дружин ту ленцар. Одвојн туке време пошукаре те запознање е искусна објавителен. Викин некас лендар ки тли Фамилијарно рат. Ако тано насвало, тегани шај те договоринен тумен и Фамилијарно рат те икерен ла ки лесте кхере. Тегани шај те пуче некобор пучиба сар на пример: Сар шунѓан башо чачипе? Саве берекетија сине тут? Саво напредок дикхљан ко акала берша со накхле? Соске и служба башо Јехова керела тут бахтало?
Ов разумно хем дикх реално ко буќа. Сар секој амендар, е објавителен да со служинена бут берша иси лен различна дарија ки служба (Рим. 12:6-8). Несаве тане ко попхуре берша хем нашти бут време те накхавен аменцар. Ама палем, амен бут шај те сикљова лендар соске иси лен баро искуство џикоте верно служинена е Јеховаске.