Кер пошукар и служба — сар те де о лил Што учи Библијата

Соске тано важно акава: Прво „алати“ со користинаја ле ки служба те сикава е манушен башо чачипе тано о лил Што учи Библијата. Англедер те почмина некасаја те проучина акава лил, амен ваљани прво те да ле ленге. Адалеске, сарине ваљани те сикљова сар шај пошукар те да о лил Што учи Библијата ки служба (Изр. 22:29). Иси бут начинија те дел пе о лил, хем секова објавители шај те биринел кова начин ка користинел.

Сар те кера адава:

Пуч е станаре башо нешто со мислинеа кај ка интересел ле, хем тегани кер лафи башо несаво поглавје таро лил со ка одговоринел ки тема. Шај те бирине јекх таро пучиба со и тане ко почеток таро секова поглавје. Кеда ка вакерел о станари со мислинела, тегани читин јекх стихо хем сикав леске јекх пасус таро поглавје хем ако шај дискутиринен кратко баши лесте.
Јавер начин тано те користина о пучиба со и тане ко почеток таро лил хем те сикава е станареске коте ко лил шај те аракхел о одговор со дела и Библија. На пример, шај те вакере баши несави трагедија со сине ко вести хем те објаснине кај бут џене мангена те џанен о одговорија башо пучиба тари 3 страна. Или, шај те вакере кај кереа е манушенцар лафи башо адава саве шукар буќа ка овен ки иднина. Пало адава, сикав леске о слике со и тане ки 4 хем 5 страна хем пуч ле: „Кола таро акала буќа мангеа те овен?“ Јавер начин тано те вакере леске кај кратко посетинеа е манушен те шај те поможине ленге те аракхен о одговорија башо најважна пучиба ко џивдипе. Пало адава сикав е станареске о пучиба со и тане ко крајо тари 6 страна хем пуч ле кова пучибе интересинела ле.
Користин увод колеа со ка шај директно те почмине библиско студија. Шај те вакере: „Е манушенге сикаваја акава лил колеа со шај те проучинел пе и Библија. Дали некогаш дикхљан акава лил? [Мукх те одговоринел.] Ако иси ту некобор минутија, мангава те сикавав туке сар шај те користине акава лил заедно тле Библијаја“.

Ко акава масек кер акава:

Ки Фамилијарно рат вежбинен сар те ден акава лил.
Кеда сиан ки служба, вакер те партнереске со планиринеа те вакере е станареске (Изр. 27:17). Ако адаја презентација нане успешно, пробин јавер.