ТЕ ЖИВИНА САР ХРИСТИЈАЊА
„О Павле благодаринѓа пе е Девлеске хем охрабринѓа пе“
Кеда о пхраља таро собрание ко Рим шунѓе кај о Павле авела, несаве лендар накхле околу 64 километре те шај те дикхен пе леа. Сар влијајнѓа упри лесте ленгоро верно мангипе? И Библија вакерела: „Кеда дикхља лен, о Павле благодаринѓа пе е Девлеске хем охрабринѓа пе“ (Де 28:15). Иако о Павле сине адава со охрабринела сине е пхрален џикоте посетинела сине о собранија, ки акаја прилика џикоте сине пханло, ов добинѓа охрабрување (2Ко 13:10).
Авдиве о покраинска надгледникија џана таро собрание ко собрание те шај те охрабринен е пхрален хем е пхењен. Исто сар са о јавера слуге е Девлескере, ола да понекогаш тане уморна, секириме хем обесхрабриме. Адалеске, јавер пути кеда ка авел о покраинско надгледнико пле ромњаја ко тло собрание, со шај те кере те шај те охрабрине лен ту да? (Ри 1:11, 12).
Ов присутно ко состанокија проповедибаске. О покраинско надгледнико тано охрабримо кеда о објавителија керена жртве те шај те овел лен корист таро активностија сој тане планириме адале посебно куркеске (1Со 1:2, 3; 2:20). Размислин дали шај те ове помошно пионери адава масек кеда тани и посета лестар. Шај ли те пријавине тут те џа ки служба леа или лескере ромњаја? Шај ли те џа ко библиско курси некасаја лендар? Ола мангена те соработинен различно објавителенцар, чак околенцар сој поневе или околенцар со мислинена кај пхаро ленге те проповединен.
Ов гостопримливо. Шај ли те нудине е покраинско надгледникоске хем лескере ромњаке те совен ки туте или те викине лен ко ручко? Адалеа ка сикаве кај мангеа лен. Ола на аџикерена ништо посебно (Лк 10:38-42).
Шун хем применин лескере упатствија хем советија. О покраинско надгледнико љубезно мангела те поможинел аменге те дикха сар шај панда пошукар те служина е Јеховаске. Понекогаш шај ка ваљани те дел амен строго совет (1Ко 5:1-5). Ако сием послушна хем подложна, ов бут ка овел бахтало (Ев 13:17).
Сикав ценење. Вакер е покраинско надгледникоске хем лескере ромњаке кобор поможинѓа туке ленгири посета. Акава шај те вакере ленге лично или те пишине ленге картичка (Кол 3:15).