Слика тари бина хем о мото упри лате
1922 — Англедер шел берш
„О ДЕВЕЛ дела амен и победа преку о Исус Христос!“ (1. Кор. 15:57). Акала лафија со сине бириме башо е бершескоро стихо ко 1922 берш, уверинѓе е Истражувачен е Библијакере кај ленгири верност ка овел наградими. Ко адава берш о Јехова чаче наградинѓа акале ревна проповедникон. Ов наградинѓа лен кеда ола коркори почминѓе те печатинен пумаре лила хем те користинен о радио те шај те ширинен о чачипе башо Царство. Покасно, ко исто берш панда јекх пути сине јасно кај о Јехова дела берекети пле народоске. О Истражувачија е Библијакере шај сине те кхеден пе ко јекх историско конгрес ко Седар Поинт (Охајо, САД). Акава конгрес влијајнела упри активност ки е Јеховаскири организација џи авдиве.
„ЈЕКХ БУТ ШУКАР ИДЕЈА“
Адалеске со повише пхраља хем пхења почминѓе те проповединен ваљани сине повише литература. О пхраља ко Бетел ко Бруклин печатинена сине списанија, ама башо лила користинена сине јавера фирме. Адалеске со и фирма масеконцар нашти сине те печатинел доволно лила службаке, о пхрал Ратерфорд пучља е пхрале Роберт Мартин, кова со сине одговорно баши амари печатница, со мислинела башо адава те почмина те печатина аменге коркори лила.
И печатница ки улица Конкорд, Бруклин Њујорк
О пхрал Мартин мислинѓа песке: „Акаја тани јекх бут шукар идеја. Адава би значинела кај ка пхрава јекх печатница коте со коркори ка шај те печатина амаре лила“. О пхраља леле ки кирија јекх зграда ко Бруклин која со аракхљола ки улица Конкорд број 18 хем кинѓе и опрема која со ваљани сине ленге.
На радујнѓе пе сарине со о пхраља ка пхравен печатница. О претседатели тари фирма со печатинела сине амаре лила посетинѓа амари печатница. Ов вакерѓа: „Иси тумен бут шужи опрема башо печатибе, ама нане тумен никој со џанела те керел лаја бути. Шове масеконге ка руминен цело тумари опрема“.
О Мартин вакерѓа: „Адава звучинела сине логично, ама ов на леља ко предвид амаре Господаре, кова со секогаш поможинела аменге“. Хем чаче, о Мартин сине ко право. Ки неви печатница печатинела пе сине 2.000 лила ко диве.
О работникија терѓона узо линотип машине ки печатница
БУТ МИЛЈЕ МАНУША ШУНЃЕ БАШО ХАБЕРИ ПРЕКУ РАДИО
Освен со печатинела сине лила, е Јеховаскоро народо почминѓа преку јекх нево начин те ширинел о шукар хабери — преку радио. Недела палоручко 26 февруари 1922 берш, о пхрал Ратерфорд прво пути керѓа лафи преку радио. Ов ко јекх радио таро Лос Анџелес (Калифорнија, САД) икерѓа о говор е темаја „Милиоња кола со акана живинена, никогаш нане те мерен“.
Отприлика 25.000 џене шунѓе адава говор. Несаве лендар бичхалѓе писмија џи ко пхрал Ратерфорд те шај те сикавен пумари благодарност. Јекх таро адала мануша со бичхалѓе леске писмија сине о Вилард Ашфорд кова со живинела сине ки Санта Ана, Калифорнија. Ов пофалинѓа е пхрале Ратерфорд башо интересно говор хем исто аѓаар пишинѓа: „Ки мли фамилија иси трин насвале мануша кола со нашти те икљовен кхералдан. Адалеске, те икере да сине о говор паше узо амаро кхер амен ка нашти сине те ава“.
О следна курке икерѓе пе панда говорија преку радио. Ко крајо таро берш и Стражарско кула проценинѓа кај најхари 300.000 мануша шунѓе о хабери преку радио.
Адалеске со сине охрабриме таро писмија хем коментарија со добинена сине, о Истражувачија е Библијакере одлучинѓе те керен јекх радио-станица ко Стејтен Ајленд кова со сине паше ко Бетел Бруклин. Ко следна берша о Истражувачија е Библијакере користинѓе и радио-станица WBBR, те шај те ширинен о хабери башо Царство буте манушенге хем ко бут тхана.
„АДВ“
Ки Стражарско кула таро 15 јуни 1922 берш сине објавимо кај ка икерел пе конгрес ко Седар Поинт, Охајо таро 5-13 септември 1922 берш. О Истражувачија е Библијакере сине бут бахтале кеда ресле ко Седар Поинт.
Ко пло прво говор о пхрал Ратерфорд вакерѓа е публикаке: „Сиум уверимо кај о Господари ка дел... берекети ко акава конгрес хем кај ка дел пе најбаро сведоштво сар никогаш џи акана“. О говорникија ко акава конгрес бут пути охрабринена сине е пхрален хем е пхењен те проповединен.
Бут џене тане присутна ко конгрес со икерѓа пе ко Седар Поинт, Охајо ко 1922 берш
Петок 8 септември 8.000 џене кхувѓе ки сала хем едвај аџикерена сине те шунен о говор таро пхрал Ратерфорд. Ола очекујнена сине те објаснинел о значење тари кратенка „АДВ“ која со аракхљола сине ко ленгере печатиме покане. Кеда бешле, несаве приметинѓе кај сине бари ролна платноја закачими ко подиум. О Артур Клаус кова со ало ко конгрес тари Тулса (Оклахома, САД) бешља коте со шај сине пошукар те шунел о говорија. Ко адава време нашти сине шукар те шунел пе соске на сине микрофонија хем звучникија, адалеске сине бут важно те аракхел пе тхан попаше узи бина.
„Внимателно шунаја сине секова лафи“
Те шај те на сметинен џикоте о пхрал Ратерфорд икерела сине пло говор, о претседавачи вакерѓа кај нане те дозволинен те кхувен андре окола со каснинена џикоте трајнела о говор. Ко 9:30 почминѓа о пхрал Ратерфорд те цитиринел е Исусескере лафија таро Матеј 4:17: „О Царство сој ко небо тано паше“. Кеда керѓа лафи башо адава сар о мануша ка шунен башо Царство, ов објаснинѓа: „О Исус објавинѓа кај џикоте трајнела лескири присутност ка кхедел пле народо хем ка анел ки песте околен сој леске верна“.
О пхрал Клаус кова со бешела сине ки главно сала вакерѓа: „Внимателно шунаја сине секова лафи“. Таро јекх пути пело леске мука хем мора сине те икљол тари сала. Иако на мангела сине те икљол соске џанља кај нане те мукхен ле палем те кхувел андре џикоте трајнела о говор.
Пало некобор минутија осетинѓа пе пошукар. Џикоте иранела пе сине ки сала, шунела сине баро аплауз. Адава керѓа те овел панда понестрпливо. Добором сине одлучно те шунел о крајо таро адава говор со чак ако ваљани сине те уклел ко крови би керела сине адава. О пхрал Клаус коле со сине ле 23 берш аракхља начин сар те уклел ко крови. О таванска пенџерке сине пхравде хем кеда ало паше џи ки ленде вакерѓа кај адатхар шај сине бут пошукар те шунел о говор.
Ама о Артур на сине коркори ко крови, несаве таро лескере амала сине исто атхе. Јекх лендар, о Френк Џонсон, ало те пучел ле: „Иси тут ли тикни чхурик ки џепа?“
О Артур вакерѓа: „Оја, иси ман“.
О Френк вакерѓа: „Цело време молинѓем амен те аракха некас со иси ле чхурик. Дикхеа ли акаја бари ролна таро платно? Адава тано о мото хем закачимо тано ко акала шајке, шун шукар со вакерела о судија.a Хем кеда ка вакерел ’објавинен, објавинен‘, чхин одма акала штар шеле“.
О Артур, е чхурикаја ко вас, заедно е јаверенцар аџикерела сине те шунел о лафија со ка вакерел лен о пхрал Ратерфорд со ка овен знако кеда ка ваљани те чхинен о шеле. О пхрал Ратерфорд ресља ко најважно дело таро пло говор. Тари бари ревност чак почминѓа погласно те вакерел: „Овен верна хем чачутне слуге е Господареске. Продолжинен ки борба са џикоте о Вавилон нане целосно уништимо. Проповединен о хабери ко секова тхан. О свето мора те џанел кај о Јехова тано Девел хем кај о Исус тано Цари е царенгоро хем Господари е господаренгоро. Акава тано о најважно диве ки историја. Дикхен, о Цари владинела! Туменге тани денди и задача те вакерен адава сариненге, адалеске објавинен, објавинен, објавинен е Царе хем лескоро Царство“.
О Артур сетинела пе сар ов хем о пхраља чхинѓе о шеле хем сар о мото хари похари пхравѓола сине. Ко мото со пхравдило пишинела сине: „Објавинен е Царе хем о Царство“. Адава сине о значење тари кратенка „АДВ“.b
ЈЕКХ ВАЖНО ЗАДАЧА
О конгрес ко Седар Поинт поможинѓа е пхраленге те концентриринен пе ко проповедибе башо Царство. Окола со сине спремна те керен адава сине бахтале со шај те учествујнен ки адаја задача. Јекх колпортери (акана пенџардо сар пионери) тари Оклахома (САД) пишинѓа: „Проповединаја сине ко тхана коте со бут мануша керена сине бути ко рудникија башо јаглен хем сине бут чороле“. Ов вакерѓа кај о мануша кеда ка читинен сине о списание Златно веко бут пути почминена сине те ровен. Башо проповедибе ов вакерѓа: „Бут сием бахтале со шај те утешина лен“.
Адала Истражувачија е Библијакере халиле кобор тане важна е Исусескере лафија сој пишиме ко Лука 10:2: „И жетва тани бари ама иси само хари работникија“. Ко крајо е бершескоро ола сине панда поодлучна таро било кеда англедер те објавинен о хабери башо Царство са повише манушенге.
a Понекогаш е пхрале Ратерфорд викинена ле сине „судија“ соске понекогаш керела сине бути сар судија ко Мисури (САД).
b АДВ сине кратенка таро англиско лафи „advertise“ кова со значинела објавин или сведочин.