Поможин е јаверенге те истрајнен ко пхаре времија

1. Преку касте о Јехова бут пути одговоринела ко молитве пле слугенгере?

ДАЛИ џанљан кај о Јехова шај преку туте те одговоринел ки некаскири молитва? Бизи разлика дали сиан старешина, слуга-помошнико, пионери или објавители ту шај те поможине. Исто аѓаар шај те поможине бизи разлика дали сиан терно, пхуро, пхрал или пхен. Кеда некој со мангела е Јехова родела лестар помош, амаро Девел бут пути користинела старешинен хем јавере слуген те поможинен хем те утешинен е јаверен (Кол. 4:11). Бут радујнаја амен со шај те служина е Јеховаске хем амаре пхраленге ко асавко начин. Адава шај те кера ле посебно кеда појавинела пе несаво заразно насвалипе, природно катастрофа или прогонство.

ПОМОЖИН Е ЈАВЕРЕН ЏИКОТЕ ИСИ ЗАРАЗНО НАСВАЛИПЕ

2. Соске шај те овел пхаро те поможина е јаверенге кеда иси заразно насвалипе?

² Кеда иси несаво заразно насвалипе шај те овел аменге пхаро те поможина е јаверенге. На пример шај мангаја те џа ко несаво пхрал те посетина ле, ама нане безбедно те кера адава. Или шај мангаја те канина ко ручко некас сој слабо паренцар, ама шај адава да нашти те кера ле. Освен адава, ако некаске тари амари фамилија ваљани помош адава шај те керел аменге пхаро те поможина е пхраленге. Сепак, амен мангаја те поможина амаре пхраленге хем о Јехова радујнела пе кеда амен кераја са со шај те поможина лен (Изр. 3:27; 19:17). Со шај те кера?

3. Со сикљоваја таро пример несаве старешиненгоро? (Еремија 23:4).

³ Со шај те керен о старешине. Ако сиан старешина, запознајн шукар е пхрален. (Читин Еремија 23:4.) И Деси, и пхен со спомнинѓем ла ки англуни статија, вакерела: „О старешине тари мли група секогаш сине манцар хем е јаверенцар ки служба хем дружинена пе сине аменцар“.b Адава керѓа е старешиненге полокхе те поможинен е пхењаке кеда појавинѓа пе и пандемија КОВИД-19 хем кеда некобор џене тари лакири фамилија муле таро вирус.

4. Соске о старешине шај сине те поможинен е пхењаке хем со сикљоваја таро адава?

⁴ И Деси објаснинела: „Адалеске со о старешине сине манге амала, полокхо сине манге те вакерав ленге сар осетинава ман хем башо со секиринава ман“. Со шај те сикљон о старешине? Грижинен тумен е пхраленге англедер те појавинел пе несави криза. Овен амала ленцар. Ако нашти те посетине лен лично адалеске со појавинѓа пе несаво заразно насвалипе, тегани пробин те контактирине ленцар ко јавер начин. И Деси вакерела: „Понекогаш ко исто диве повише старешине јавинѓе пе манге или пишинѓе манге пораке. О стихија со читинѓе манге бут поможинѓе ман иако џанава лен сине.

5. Сар шај о старешине те дознајнен со ваљани е пхраленге хем е пхењенге, хем сар шај те поможинен ленге?

⁵ Јекх начин сар шај те дознајне со ваљани е пхраленге хем е пхењенге тано аѓаар со ка пуче лен тактична пучиба (Изр. 20:5). Дали иси лен доволно хајбаске, иљачија или јавера буќа? Дали шај ка ачхон бизи бути или нане те овел лен доволно паре те платинен и кирија? Дали ка ваљани те поможина ленге те добинен помош тари влада? И Деси добинѓа материјално помош таро пхраља ама највише поможинѓа ла о мангипе со сикавѓе лаке о старешине хем о охрабрување со денѓе ла тари Библија. Ој вакерела: „О старешине молинѓе пе заедно манцар. Иако на сетинава ман точно со вакерѓе ама сетинава ман сар осетинѓум ман, сар ка пхене о Јехова вакерѓа манге ’на сиан коркори‘“ (Иса. 41:10, 13).

6. Со шај бут џене те керен таро собрание те шај те поможинен е јаверенге? (Дикх и слика.)

⁶ Со шај о јавера те керен. Амен очекујнаја о старешине те грижинен пе е пхраленге хем е пхењенге ко собрание. Ама о Јехова мангела сарине амен те охрабрина хем те поможина е јаверен (Гал. 6:10). Чак несави тикни бути шај бут те охрабринел адале сој насвало. О чхаве шај те цртинен нешто охрабрувачко ки картичка хем те бичхален несаве пхралеске. О терне шај те пазаринен или те керен нешто јавер несаве пхењаке. О јавера таро собрание шај те керен нешто хајбаске некаске сој насвало хем те мукхен ленге англо удар. Џанѓола пе кеда иси заразно насвалипе сариненге таро собрание ваљани охрабрување. Шај те ачхова хари повише пало состанок те шај те кера лафи е пхраленцар хем е пхењенцар, бизи разлика дали лично или преку видео конференција. Е старешиненге да ваљани охрабрување. Несаве бичхалѓе картичке баши благодарност е старешиненге кола сој посебно зафатиме кеда иси несаво заразно насвалипе. Кобор тано шукар кеда даја амаро дело те охрабрина амен машкар аменде хем те изградина амен јекх јекхеа (1. Сол. 5:11).

ПОМОЖИН Е ЈАВЕРЕНГЕ КЕДА ДОЖИВИНЕНА ПРИРОДНО КАТАСТРОФА

7. Соске шај те овел пхаро некаске пали несави природно катастрофа?

⁷ Јекх природно катастрофа шај таро јекх пути бут те менинел некаскоро живото. Несаве шај те нашавен адава со бершенцар стекнинѓе, пумаро кхер или чак те мерел лендар некој. Акала страшна буќа случинѓе пе исто аѓаар амаре пхраленге хем пхењенге. Со шај те кера?

8. Со шај о старешине хем о поглаварија те керен англедер те овел несави природно катастрофа?

⁸ Со шај те керен о старешине. Шај те поможинен е пхраленге те спреминен пе англедер те случинел пе несави катастрофа. Поможинен сариненге таро собрание те џанен со ваљани те керен те шај те овен безбедна хем те контактиринен е старешиненцар. И Маргарет која со сине спомними ки англуни статија вакерела: „О старешине ко потребе е собраниескере керѓе лафи башо адава кај панда иси опасност таро баре пожарија. Ола вакерѓе кај ако о властија родена те мука амаро кхер или ако и ситуација овела опасно мора одма те мукха амаре кхера“. Адала информацие сине баш ко време соске пало панџ курке сине баро пожар. Ки Фамилијарно рат о поглаварија шај те керен лафи башо адава со мора секој тари фамилија те керел. Ако ту хем те чхаве сиен спремна веројатно ка ачховен смириме хем нане те даран кеда ка случинел пе несави природно катастрофа.

9. Сар шај о старешине те организиринен пе англедер хем пали несави природно катастрофа?

⁹ Ако сиан надгледнико ки група ма аџикер те случинел пе несави природно катастрофа те шај те овел тут о точна телефонска броја хем адресе таро пхраља сој ки тли група. Кер списако хем често проверин дали адала информацие тане точна. Тегани кеда ка овел несави природно катастрофа ка шај секоле објавителеа те контактирине хем те дикхе со ваљани леске. Де одма адала информацие е координатореске таро старешинство хем ов ка контактиринел е покраинско надгледникоја. Кеда иси асавки соработка тегани шај те поможинел пе ко најшукар начин. Пало пожар со сине ко тхан коте со живинела сине и Маргарет, о покраинско надгледнико на суќа 36 саатија. Ов исто аѓаар организиринѓа е старешинен те шај ола те контактиринен хем те грижинен пе 450 пхраленге хем пхењенге кола со мукхле пумаре кхера (2. Кор. 11:27). Ко асавко начин ола шај сине те поможинен сариненге каске со ваљани те аракхен тхан коте со шај сине те совен.

10. Соске е старешиненге тано бут важно те грижинен пе башо е пхраленгере духовна хем емоционална потребе? (Јован 21:15).

¹⁰ Е старешинен иси лен одговорност те поможинен е објавителенге ко духовно хем ко емоционално поглед (1. Пет. 5:2). Одма пали катастрофа о старешине поможинена е пхраленге те овен безбедна, те овел лен хајбаске, шеја хем тхан коте со шај те гаравен пе. Ама е пхраленге ка ваљанел масеконцар пало адава духовно хем емоционално поддршка. (Читин Јован 21:15.) О Харолд, кова со служинела ко Одбор е подружницакоро хем кова со керѓа лафи буте пхраленцар хем пхењенцар со доживинѓе природно катастрофа, вакерела: „Ваљани те накхел време те шај те осетинен пе пошукар. Ола шај ка почминен те живинен сар англедер ама нашти локхе те бистрен ако муло лендар некој, ако нашавѓе нешто скапоцено со сине лен или ако ленгоро живото сине ки опасност. Секогаш кеда ка сетинен пе ко акала буќа шај те осетинен бари дукх. Асавке чувствија тане нормална хем на значинела кај нане лен доволно вера“.

11. Кола јавера да потребе шај те овен е фамилиен?

¹¹ О старешине применинена о совет „те ровен околенцар со ровена“ (Рим. 12:15). О старешине шај ка ваљани те сикавен околенге со доживинѓе природно катастрофа кај о Јехова хем о пхрала понадари да мангена лен. О старешине мангена те поможинен е фамилиенге те ачховен духовно активна аѓаар со ка охрабринен лен те молинен пе, те проучинен, те џан ко состанокија хем ки служба. Ола исто аѓаар шај те охрабринен е родителен те поможинен пумаре чхавенге те дикхен ко поважна буќа со иси лен кола со и природно катастрофа нашти те уништинел лен. Тумен о родителија, вакерен е чхавенге кај о Јехова секогаш ка овел ленгоро амал хем кај ов секогаш ка поможинел ленге. Хем објаснинен ленге кај иси лен пхраља хем пхења ко цело свето кола со секогаш тане спремна те поможинен ленге (1. Пет. 2:17).

12. Со шај о јавера те керен те шај те поможинен ки природно катастрофа? (Дикх и слика.)

¹² Со шај о јавера те керен. Ако случинела пе природно катастрофа паше ко тхан коте со живинеа, пуч е старешинен сар шај те поможине. Шај ка ваљани те примине ко тло кхер околен со мукле пумаре кхера или околен со поможинена кеда иси природно катастрофа. Шај те ингаре ленге хајбаске хем буќа кола со ваљанена ленге. Ако несави катастрофа случинела пе ко подур тхан, сепак шај те кере нешто. Со? Шај те молине тут ленге (2. Кор. 1:8-11). Исто аѓаар шај те де прилог башо активностија со керена пе ко цело свето (2. Кор. 8:2-5). Ако шај те патујне џи ко тхан коте со иси катастрофа, пуч е старешинен со шај те кере. Ако викинена тут те поможине, веројатно ка добине несави обука те шај ко најшукар начин те поможине.

ПОМОЖИН Е ПХРАЛЕНГЕ ТЕ ИСТРАЈНЕН КО ПРОГОНСТВО

13. Саве проблемија иси амаре пхрален ко пхувја коте со амаре активностија тане забраниме?

¹³ О живото амаре пхраленгоро тано попхаро ко пхувја коте со амаре активностија тане забраниме. Ама освен о прогонство лен мучинена лен јавера да проблемија сар на пример финансиска проблемија, насваљовена или мерела лендар некој. Ама адалеске со иси забрана о старешине нашти секогаш те џан ко пхраља хем те охрабринен лен. Адава случинѓа пе е Андрееске, коле со спомнинѓем ле ки англуни статија. Јекхе пхења тари лескири група проповедибаске сине ла финансиска проблемија. Пало несаво време сине ла собраќајка хем адалеске ваљани сине некобор пути те овел операција хем нашти сине те керел бути. О Јехова џанља со ваљани е пхењаке хем иако сине забрана хем пандемија ов поможинѓа лаке преку о пхраља хем ола керѓе адава со шај.

14. Сар шај о старешине те овен пример баши доверба ко Јехова?

¹⁴ Со шај о старешине те керен. О Андреј молинѓа пе хем керѓа адава со шај. Со керѓа о Јехова? Ов поттикнинѓа некоборе џенен таро собрание со шај сине те керен повише те поможинен е пхењаке. Несаве ингарена ла сине ко доктори пле врдаја, јавера дена ла сине паре. О Јехова наградинѓа ленгоро заедничко трудо хем храброст (Евр. 13:6). Тумен о старешине, ден е јаверенге задаче те шај те поможинен кеда амари активност тани забраними (Ерем. 36:5, 6). Ама највише таро са нека овел тумен доверба ко Јехова. Ов ка поможинел тумен те грижинен тумен е пхраленге хем е пхењенге.

15. Сар шај те аракха амаро јекхипе кеда иси прогонство?

¹⁵ Со шај о јавера те керен. Џикоте иси забрана шај ка ваљани те кхеда амен ко потикне групе. Адалеске акана тано најважно те ова ко мир јекх јекхеа. Борин тут против о Сатана, а на против тло пхрал. Накх преку е пхраленгере грешке или ма аџикер бут време те накхел те шај те решине о проблеми (Изр. 19:1; Еф. 4:26). Ов спремно те поможине е јаверенге (Тит 3:14). Адалеске со о јавера поможинѓе е пхењаке, адава сариненге влијајнѓа позитивно ки група проповедибаске. Ола уле паше сар јекх фамилија (Пс. 133:1).

16. Спрема Колошаните 4:3, 18, сар шај те поможина амаре пхраленге хем пхењенге кола сој прогониме?

¹⁶ Бут милја пхраља хем пхења служинена е Јеховаске иако амаре активностија тане забраниме ко адала пхувја. Несаве лендар тане ко затвор баши ленгири вера. Шај те молина амен ленге хем ленгере фамилиенге. Исто аѓаар шај те молина амен околенге со чхивена пумаро живото ки опасност те шај те поможинен акале пхраленге хем пхењенге ко духовно хем ко физичко поглед хем те бранинен лен ко судо.c (Читин Колошаните 4:3, 18.) Никогаш те на бистра кај амаре молитве шај те поможинен са акале пхраленге хем пхењенге! (2. Сол. 3:1, 2; 1. Тим. 2:1, 2).

17. Сар шај те спремине тут панда акана башо прогонство?

¹⁷ Ту хем тли фамилија панда акана шај те спреминен тумен башо прогонство (Дела 14:22). Ма пробин те замислине туке са о лошна буќа со шај те случинен пе. Наместо адава кер позорало тло амалипе е Јеховаја хем поможин тле чхавенге те керен о исто. Ако понекогаш осетинеа тут вознемиримо, вакер адава е Јеховаске ки молитва (Пс. 62:7, 8). Сар фамилија, керен лафи башо са о причине соске шај те овел амен доверба ки лесте.d Слично сар ко случај е природно катастрофенцар, тле чхаве ка шај полокхе те истрајнен ко прогонствија ако англедер спреминеа тут башо адава, соске тегани ка овен храбра хем ка овел лен мир адалеске со сикавѓан лен те овел лен доверба ко Јехова!

18. Сави иднина аџикерела амен?

¹⁸ О мир таро Девел заштитинела амен (Фил. 4:6, 7). Преку лесте о Јехова поможинела аменге те ачхова смириме, чак кеда појавинела пе несаво заразно насвалипе, природно катастрофа хем прогонствија кола со шај те влијајнен упро амаро живото. Ов користинела е старешинен те шај те грижинен пе аменге хем дела сариненге аменге и прилика те поможина јекх јекхеске. О мир колесте со уживинаја авдиве шај те поможинел аменге те спремина амен башо побаре неволје, па чак баши „бари неволја“ (Мат. 24:21). Ко адава време ка ваљани те ачхова смириме хем те поможина е јаверенге те керен о исто. Ама пали адаја бари неволја нане више те овен амен проблемија кола со ка даравкерен амен. Ко адава време конечно ка уживина ко адава со о Јехова отсекогаш мангела сине аменге — о чачутно мир кова со ка трајнел вечно! (Иса. 26:3, 4).