Сој шукар а сој лошно: Спрема со одлучинена бут мануша

Скоро сарине ка согласинен пе кај несаве буќа тане бут шукар или бут лошна. На пример, бут мануша мислинена кај тано лошно те мударел пе, те силујнел пе хем сексуално те злоупотребинел пе чхавен. Тари јавер страна, бут мануша мислинена кај те овел пе праведно, те сикавел пе шукарипе хем сочувство тане шукар. Ама сој тано е буќенцар сар сој, касаја те овел тут секс, дали те вакере о чачипе или сар те бајрарел пе чхавен? Бут мануша мислинена кај башо акала буќа нане шукар или лошно одлука. Ола мислинена кај скоро секоја одлука тани прифатливо. О мануша бут пути анена одлука спрема адава сар ола или о јавера мануша дикхена ки несави бути. Ама дали акава тано секогаш шукар?

ДАЛИ ВАЉАНИ ТЕ АНА ОДЛУКЕ СПРЕМА АДАВА САР АМЕН ДИКХАЈА КИ НЕСАВИ БУТИ?

Бут пути анаја одлука спрема адава сар амен дикхаја ки несави бути, јавере лафенцар спрема амаро андруно чувство башо шукар хем лошно кова со обично викинаја ле совест (Римјања 2:14, 15). Чак о чхаве шај те керен разлика машкар адава сој тано фер понашибе, а со нане, па чак те осетинен пе крива. Сар со бајроваја амари совест обликујнела пе спрема адава со сикљоваја тари амари фамилија, о мануша сој ко амаре берша, о наставникија, о мануша сој околу аменде, и религија хем и култура. Кеда анаја несаве одлуке амари совест вакерела аменге дали адаја одлука тани спрема адава со сиклилем кај тано шукар или лошно.

Амаро чувство башо адава сој шукар а сој лошно шај те теринел амен те сикава сочувство, благодарност хем те ова фер е јаверенцар. Исто аѓаар шај те чхинавел амен те кера несаве буќа коленцар со шај те повредина околен со мангаја лен или те кера нешто кова со ка анел аменге лаџ хем пало адава те осетина амен крива.

Дали тано секогаш мудро те ана одлуке спрема адава сар амен дикхаја ки несави бути? Јекх мануш со викинела пе Герик вакерела кај кеда сине терно биринѓа те живинел живото колеа со шај сине те керел са со мангела. Ама ов халило кај те керел пе адава со ту мислинеа кај тано шукар ингарела џи ко лошна последице. Покасно ов вакерѓа кај асавко живото на керела ле сине среќно соске керела сине бут неморал, дрогиринела пе сине, маќола сине хем уло насилно.

ДАЛИ ВАЉАНИ ТЕ АНА ОДЛУКЕ СПРЕМА АДАВА САР О ЈАВЕРА ДИКХЕНА КИ НЕСАВИ БУТИ?

Кеда ваљани те ана несави одлука, амен водинаја амен спрема адава сар амен дикхаја ки несави бути. Ама исто аѓаар бут пути водинаја амен хем спрема адава со о јавера ка мислинен баши амари одлука. Адава шај те поможинел амен те овел амен корист таро ленгоро искуство хем мудрост. Кеда кераја адава со амари фамилија, о амала или о мануша околу аменде мислинена кај тано шукар, ола панда повише поштујнена амен.

Дали тано секогаш мудро те ана одлуке спрема адава сар о јавера дикхена ки несави бути? Кеда сине терни, и Присила, керела сине адава со сине популарно машкар лакере амала хем сине ла сексуална односија англедер о брако. Ама иако керела сине адава со о јавера мислинена кај тано шукар, ој на сине среќно. Ој вакерела: „Кеда керава сине адава со керена о јавера на осетинава ман сине шукар. Само ингарела ма сине џи ко адава те керав буќа кола со нане мудра хем тане опасна“.

ИСИ ЛИ ПОШУКАР НАЧИН ТЕ АНА МУДРА ОДЛУКЕ?

Кеда одлучинаја сој тано шукар, а сој лошно бут аменге важно амаро мислење хем е јаверенгоро. Ама ако кераја само адава нане секогаш те ана шукар одлуке. Понекогаш шај те ана штета аменге или е јаверенге адалеске со нашти секогаш те џана со ка анен аменге амаре одлуке (Изреки 14:12). Хем чак ако амен хем о јавера мислинаја кај нешто тано шукар, сепак адава нане гаранција кај чаче тано аѓаар, хем шај ка ваљани те менина амаро мислење. Уствари нешто со англедер мислинела пе сине кај тано лошно авдиве тано прифатимо хем нешто со англедер мислинела пе сине кај тано шукар авдиве тано лошно.

Иси ли нешто пошукар со ка поможинел амен те одлучина сој шукар, а сој лошно? Иси ли несаве морална мерилија со шај те водинен амен авдиве те шај те на овел аменге криво пало несаво време откеда анѓем несави одлука?

Шукар тано адава со иси мерилија кола со на менинена пе хем коленде со шај те овел амен доверба хем шај те поможинен секаске бизи разлика коте сием. Ки следно статија ка дикха сој тано адава со најшукар шај те поможинел амен те шај те одлучина сој шукар, а сој лошно.