Сој шукар а сој лошно: Ту мора те бирине
О морална мерилија спрема кола ка бирина те живина бут ка влијајнен упро адава дали ка ова среќна. О Јехова о Девел џанела адава. Адалеске ов мангела те живина спрема лескере мерилија.
О Јехова мангела те овел амен мирно хем среќно живото.
„Ме, о Јехова, сиум тло Девел, кова со сикавела тут башо тло шукарипе, окова со водинела тут ко друмо колесте со ваљани те џа. Те пазине сине ко мле заповедија! Тло мир ка овел сине сар река хем тли праведност сар морска бранија“ (Исаија 48:17, 18).
Адалеске со створинѓа амен, о Девел џанела најшукар сар те живина. Ов мангела те шуна ле соске адава тано башо амаро шукарипе. Ако икераја лескере заповедија, на ваљани те пуча амен дали амаре одлуке ка овен шукар. Секогаш ка ана шукар одлуке кола со ка анен аменге мир хем среќа.
О Јехова на родела амендар те кера нешто со нашти те кера.
„Акаја заповед со дава тут авдиве нане бут пхари туке хем нане бут дур тутар“ (5. Мојсеева 30:11).
Те шај те живина спрема е Девлескере морална мерилија шај ка ваљани те менина амаро размислибе хем понашибе. Ама, о Јехова на родела бут амендар. Сар амаро Створители, ов џанела амаре способностија. Хем, кеда пошукар ка пенџара е Јехова ка дикха кај „лескере заповедија нане пхаре“ (1. Јованескоро 5:3).
О Јехова ветинела кај ка поможинел околенге со биринена те живинен спрема лескере мерилија.
„Ме, о Јехова, тло Девел, икерава тут таро тло десно вас хем вакерава туке: ’Ма дара! Ме ка поможинав туке‘“ (Исаија 41:13).
Амен шај те живина аѓаар сар со мангела о Девел соске ов ка поможинел амен. Адава керела преку пло Лафи, и Библија, кова со охрабринела хем дела амен надеж.
Милиоња мануша ко цело свето халиле кај ленгоро живото тано пошукар адалеске со живинена спрема о библиска мерилија. Адалеске шукар ка овел те дознајне нешто повише башо шукар советија кола сој пишиме ки Библија. Шај те почмине аѓаар со ка читине и брошура Ов бахтало засекогаш, која со темелинела пе ки Библија хем тани бесплатно достапно ки jw.org. Ки лате иси акала лекцие:
Сар шај те поможинел туке и Библија?
И Библија дела надеж
Дали шај те овел тут доверба ки Библија?
Џикото истражинеа е Девлескоро Лафи, и Библија, ка дикхе кај лакере советија нане пуране, шај те овел амен лате доверба акана хем засекогаш (Псалм 111:8). Те живина спрема о морална начелија сој пишиме ки Библија тано најшукар начин сар те живинел пе. Ама о Девел нане силаја те чхивел амен те кера адава (5. Мојсеева 30:19, 20; Исус Навин 24:15). Секој коркори мора те биринел дали ка керел адава.